போனில் அழைத்த ரஜினி: பரவசமான நகைச்சுவை நடிகர் கிங் காங்

நகைச்சுவை நடிகர் கிங் காங்குடனான ரஜினியின் தொலைபேசி உரையாடல் சமூகவலைத்தளங்களில் பலரால் பகிரப்பட்டு வருகிறது.

ரஜினியுடன் இணைந்து அதிசய பிறவி படத்தில் நடித்துள்ளார் கிங் காங். தமிழில் பல படங்களில் நகைச்சுவை வேடங்களில் நடித்துள்ள கிங் காங் சமீபத்தில் அளித்த ஒரு பேட்டியில் 10 வருடங்களுக்கு முன்பு தனக்கு அறிவிக்கப்பட்ட விருதை ரஜினியின் கையால் வாங்க வேண்டும் எனத் தெரிவித்திருந்தார். 

இதையடுத்து கிங் காங்கை போனில் அழைத்துப் பேசியுள்ளார் ரஜினி. இதன் ஆடியோ சமூகவலைத்தளங்களில் வெளியாகியுள்ளது. அதில் ரஜினி பேசியதாவது:

10 வருடங்களுக்கு முன்பு அறிவிக்கப்பட்ட விருதை என் கையால் கொடுக்க வேண்டும் என நீங்கள் சொன்னதைக் கேட்கும்போது கஷ்டமாக இருந்தது. நீங்கள் என்னைத் தொடர்பு கொள்ள முயற்சி செய்த தகவல் எனக்கு வரவில்லை. தனிமைப்படுத்துதல் எல்லாம் முடியட்டும். நானும் ஊரில் இருக்கேன். அடுத்த மாதம் ஏதாவது ஒரு நேரத்தில் நாம் சந்திக்கலாம். (பிறகு கிங் காங்கின் தாயிடம் பேசிய ரஜினி, கிங் காங்கை எனக்கு மிகவும் பிடிக்கும். கரோனா எல்லாம் குறைந்த பிறகு அவரை நான் பார்க்கிறேன் என்றார்) படத்தில் ஏதாவது நடிக்க வேண்டுமென்றால் வெட்கப்படாமல் கேளுங்கள் கிங் காங். நீங்கள் குடும்பத்துடன் வந்து புகைப்படம் எடுத்துக்கொள்ள வேண்டும் என்கிறீர்கள். அதற்கு நிச்சயம் நான் சொல்கிறேன் என்றார். 

கிங் காங் மீது ரஜினி வெளிப்படுத்திய அன்பும் அதற்கான கிங் காங்கின் பரவசமும் ரசிகர்களிடம் வரவேற்பைப் பெற்றுள்ளது. இதனால் இந்த ஆடியோ சமூகவலைத்தளங்களில் அதிகமாகப் பகிரப்பட்டு வருகிறது.