பிரபல இயக்குநர் பிரியதர்ஷன் இயக்கிய மரைக்காயர்: அரபிக்கடலின்டே சிம்ஹம் என்கிற மலையாளப் படத்தில் மோகன்லால், அர்ஜுன், சுனில் ஷெட்டி, பிரபு, மஞ்சு வாரியர், கீர்த்தி சுரேஷ் போன்றோர் நடித்துள்ளார்கள். (இந்தப் படம் தமிழில், மரைக்காயர்: அரபிக்கடலின் சிங்கம் என்கிற பெயரில் வெளிவருகிறது.)
2019-ம் ஆண்டிற்கான சிறந்த தேசிய திரைப்படமாக மரைக்காயர்: அரபிக்கடலின்டே சிம்ஹம் படம் தோ்வு செய்யப்பட்டது. சிறந்த ஸ்பெஷல் எஃபெக்ட்ஸ், சிறந்த ஆடை வடிவமைப்பு என மொத்த மூன்று தேசிய விருதுகளை அள்ளியது.
மரைக்காயர் படம் முதலில் 2020, மார்ச் 26 அன்று வெளியாகவிருந்தது. எனினும் கரோனா பரவல் காரணமாக இதன் வெளியீடு ஒத்திவைக்கப்பட்டது.
இந்தாண்டு ஓணம் வெளியீடாக ஆகஸ்ட் 12 அன்று திரையரங்குகளில் மரைக்காயர் படம் வெளியாகும் என அறிவிக்கப்பட்டது. ஆனால் கேரளாவில் கரோனா பாதிப்பு அதிகமாக இருந்ததால் திரையரங்குகள் திறக்க அனுமதிக்கப்படவில்லை. இதனால் இந்தமுறையும் வெளியிட முடியாமல் போனது.
மரைக்காயர் படத்தை ஓடிடியில் வெளியிடவுள்ளதாகப் படத்தின் தயாரிப்பாளர் ஆண்டனி சமீபத்தில் அறிவித்தார். திரையரங்குகளில் 50% ரசிகர்களுக்கு மட்டும் அனுமதி வழங்கப்பட நிலையில் இதர படங்களுடன் மரைக்காயர் படமும் வெளியானால் லாபம் கிடைக்காது என அவர் காரணம் தெரிவித்தார். மரைக்காயர் படம் திரையரங்கில் வெளியானால் அது ரசிகர்களை மீண்டும் திரையரங்குக்கு அழைத்து வருவதோடு திரைப்பட வியாபாரத்துக்கும் மறுமலர்ச்சியை ஏற்படுத்தும் என எதிர்பார்க்கப்பட்டது. இதனால் தயாரிப்பாளரின் அறிவிப்பால் திரையரங்கு உரிமையாளர்கள் அதிர்ச்சி அடைந்தார்கள்.
இதையடுத்து படத் தயாரிப்பாளர் ஆண்டனியுடன் கேரள அமைச்சர் சாஜி செரியன் பேச்சுவார்த்தை நடத்தினார். இதன்முடிவில், மரைக்காயர் படம் முதலில் திரையரங்குகளில் வெளியாகி அதன்பிறகு தான் ஓடிடியில் வெளியாக வேண்டும் என்கிற வேண்டுகோளுக்குச் சம்மதம் தெரிவித்தார் தயாரிப்பாளர்.
இந்நிலையில் மரைக்காயர்: அரபிக்கடலின்டே சிம்ஹம் படம் திரையரங்குகளில் வெளியாவதை அதிகாரபூர்வமாக அறிவித்துள்ளார் மோகன்லால். உலகம் முழுக்க டிசம்பர் 2 அன்று திரையரங்குகளில் மரைக்காயர்: அரபிக்கடலின்டே சிம்ஹம் படம் வெளியாகும் என அவர் கூறியுள்ளார். இதனால் இப்படம் குறித்து சமூபகாலமாக நிலவிய குழப்பத்துக்கு ஒரு முடிவு ஏற்பட்டுள்ளது.