''அண்ணாத்த படத்தின் டிக்கெட் விலை ரூ.2925? முதல்வரின் மகன் இப்படி செய்யலாமா?'': இயக்குநரின் பதிவுக்கு ரசிகர்கள் பதிலடி

அண்ணாத்த படத்தின் டிக்கெட் விலைகுறித்து தவறாக பதிவிட்ட பிரபல இயக்குநரை ரசிகர்கள் விமர்சித்து வருகின்றனர். 

நடிகர் ரஜினிகாந்த் நடித்துள்ள அண்ணாத்த படம் வருகிற நவம்பர் 4 ஆம் தேதி வெளியாகவுள்ளது. நீண்ட இடைவேளைக்குப் பிறகு ரஜினிகாந்த் கிராமத்துக் கதையில் நடித்துள்ளதால் படத்தின் மீதான எதிர்பார்ப்பு அதிகரித்துள்ளது. 

இந்தப் படத்தின் டிரெய்லர் சமீபத்தில் வெளியானது. டிரெய்லரின் அடிப்படையில் இந்தப் படம் அண்ணன் - தங்கை பாசத்தை அடிப்படாயாகக்கொண்டு உருவாகியுள்ளதாக புரிந்துகொள்ளமுடிகிறது. சன் பிக்சர்ஸ் நிறுவனம் தயாரித்துள்ள இந்தப் படத்தை, ரெட் ஜெயன்ட் மூவிஸ் சார்பாக உதயநிதி ஸ்டாலின் வெளியிடுகிறார். 

இதையும் படிக்க | நீண்ட இடைவேளைக்குப் பிறகு கே.எஸ்.ரவிக்குமார் இயக்கும் படம்: கதாநாயகன் யார் தெரியுமா ?

இந்த நிலையில் இயக்குநர் மு.களஞ்சியம் அண்ணாத்த படத்தின் டிக்கெட்டை பகிர்ந்து, ''ஒரு அண்ணாத்த டிக்கெட் விலை ரூ.2925. இது பகற்கொள்ளை இல்லையா ? முதல்வரின் மகன் இப்படி செய்யலாமா? அரசு அனுமதிக்கலாமா? தயாரிப்பாளர்கள் சங்கம் கண்டிக்காதா ? இந்த கரோனோ காலத்தில் இதுபோன்று கொள்ளையடித்தால் எப்படி மக்கள் திரையரங்குக்கு வருவார்கள் ? சிஸ்டம் கெட்டுப்போச்சுன்னவர் இதை கேட்க மாட்டாறா'' என்று கேள்வி எழுப்பியுள்ளார். அதாவது அவர் ஒரு டிக்கெட்டின் விலை ரூ.2925 என புரிந்துகொண்டுள்ளார். ஆனால் அந்த டிக்கெட்டில் 15 டிக்கெட்டுகளுக்கான விலை என குறிப்பிடப்பட்டுள்ளது.

அதற்கு ரசிகர்கள், ''தயவுசெய்து உங்கள் பதிவை நீக்குங்கள். அதில் 15 டிக்கெட்டுகளுக்கான விலை என்று குறிப்பட்டுள்ளது. நன்றாக பாருங்கள்'' என அவரை விமர்சித்து வருகின்றனர்.