நடிகை ஸ்ரீதேவியின் நினைவு நாளையொட்டி அவரது மகளும் பிரபல பாலிவுட் நடிகையுமான ஜான்வி கபூர் உருக்கமாக பதிவிட்டுள்ளார்.
தயாரிப்பாளர் போனி கபூர் - மறைந்த நடிகை ஸ்ரீதேவி ஆகியோரின் இளைய மகளான ஜான்வி கபூர் வெற்றியை எதிர்பார்த்து காத்திருக்கிறார். தமிழில் வெற்றிபெற்ற கோலமாவு கோகிலா பட ஹிந்தி ரீமேக்கான 'குட் லக் ஜெர்ரி'யில் நயன்தாரா வேடத்தில் ஜான்வி நடித்திருந்தார். இப்படம் நேரடியாக டிஸ்னி பிளஸ் ஹாட்ஸ்டாரில் வெளியாகி கலவையான விமர்சனங்களைப் பெற்றது.
அதனைத் தொடர்ந்து சில ஹிந்தி படங்கள் சுமாரான வெற்றியைத் தந்தன.
இதையும் படிக்க: 'ஆகஸ்ட் 16,1947' படத்தின் முதல் பாடல் வெளியீடு...
இதற்கிடையே, தமிழில் ஜான்வி கபூர் விரைவில் அறிமுகமாகவுள்ளதாக தகவல் பரவி வந்தது. இத்தகவலை மறுக்கும் விதமாக ஜான்வி கபூர் இதுவரை எந்தத் தமிழ் படத்திலும் நடிக்க ஒப்பந்தமாகவில்லை என்றும் தவறான தகவலை பரப்ப வேண்டாம் என்றும் அவரின் தந்தையும் தயாரிப்பாளருமான போனி கபூர் தெரிவித்திருந்தார்.
இந்நிலையில், ஸ்ரீதேவியின் 5 ஆம் ஆண்டு நினைவு நாள்(பிப்.24) நெருங்க உள்ளதால் ஜான்வி கபூர் தன் இன்ஸ்டாகிராம் பக்கத்தில், ‘அம்மா..இப்போதும் அனைத்து இடங்களிலும் உன்னைத் தேடிக்கொண்டிருக்கிறேன். நான் செய்யும் எல்லாவற்றிலும் உன்னை பெருமைப்படுத்துவேன் என நம்புகிறேன். எங்கு சென்றாலும் எதைச் செய்தாலும் அது துவங்குவதும் முடிவதும் உன்னால்தான்..’ என உருக்கமாக பதிவிட்டுள்ளார்.