இந்தியன் 2 திரைப்படத்தின் முக்கியக் காட்சிகளைக் கண்ட கமல்ஹாசன் இயக்குநர் ஷங்கரை வியந்து பாராட்டியுள்ளார்.
இயக்குநர் ஷங்கர் இயக்கத்தில் கமல்ஹாசன் நடித்துவந்த இந்தியன் 2 படத்தின் முக்கியக் காட்சிகளைக் கண்ட கமல் தன் டிவிட்டர் பக்கத்தில், ‘‘இந்தியன் 2’ படத்தின் பிரதான காட்சிகளை இன்று பார்த்தேன். என் உளமார்ந்த வாழ்த்துகள் ஷங்கர். இதுவே உங்கள் உச்சமாக இருக்கக் கூடாது என்பதும் என் அவா. காரணம், இதுதான் உங்கள் கலை வாழ்வின் மிக உயரமான நிலை. இதையே உச்சமாகக் கொள்ளாமல் திமிறி எழுங்கள். பல புதிய உயரங்கள் தேடி. அன்பன் கமல்ஹாசன்” எனப் பதிவிட்டுள்ளார்.
மேலும், ஷங்கருக்கு விலை உயர்ந்த கைக்கடிகாரத்தைப் பரிசளித்து தன் மகிழ்ச்சியை வெளிப்படுத்தியுள்ளார் கமல்.
லைகா தயாரிப்பில் அனிருத் இசையில் ரவி வர்மா, ரத்னவேலு ஒளிப்பதிவில் உருவாகும் இந்தியன் 2 படத்தில் கமலுடன் இணைந்து சமுத்திரக்கனி, பாபி சிம்கா, காஜல் அகர்வால், சித்தார்த், ராகுல் பிரீத் சிங், பிரியா பவானி சங்கர் உள்ளிட்ட நட்சத்திர பட்டாளங்கள் நடித்து வருகின்றனர்.
படப்பிடிப்பு இம்மாதத்துடன் முடிவடியவுள்ளதாகவும் அடுத்தாண்டு பொங்கலை முன்னிட்டு திரையரங்குகளில் இந்தியன் 2 திரைப்படம் வெளியாகும் என்றும் தகவல்கள் வெளியாகியுள்ளது.