இயக்குநர் வெங்கட் பிரபு நடிகர் வைபவ்வின் ரணம் படத்தினை பாராட்டி பதிவிட்டுள்ளார்.
சரோஜா படத்தில் அறிமுகமான வைபவ் பல நகைச்சுவை படங்களில் நடித்து பிரபலமானவர். மங்காத்தா படம் மிகவும் பிரபலமானது. அவரது நடிப்பில் உருவான 25வது படம்தான்‘ரணம்’. இதில், நந்திதா ஸ்வேதா, தான்யா ஹோப் உள்ளிட்ட பலர் நடிக்கின்றனர். படத்தை ஷெரிஃப் இயக்குகிறார். மது நாகராஜன் தயாரிக்க ஆரோல் கொரல்லி இசையமைக்கிறார்.
வைபவ்வின் 25-வது படம் என்பதால் படத்தின் மீதான எதிர்பார்ப்பு இருந்தது. இதன் டிரைலரை நடிகர் சிம்பு வெளியிட்டார். இந்தப் படத்தின் கதை த்ரில்லர் ஜானர் பின்னணியில் அமைக்கப்பட்டுள்ளது. இந்தப் படம் வெளியாகி நல்ல விமர்சனங்களை பெற்றுள்ளது.
இந்நிலையில் இயக்குநர் வெங்கட் பிரபு தனது எக்ஸ் பக்கத்தில் விடியோ வெளியிட்டுள்ளார். அதில் ஜாலியாக கிண்டல் செய்துள்ளார். மேலும் அவர் கூறியதாவது:
நான் அறிமுகப்படுத்திய ஒருவர் எப்படி 25 படங்களில் நடித்தார் என்பது ஆச்சரியமாக இருக்கிறது. எனக்கு அதற்குள்ளாக அதிகமாக வயதாகிவிட்டதா எனத் தெரியவில்லை. இபோதுதான் அறிமுகப்படுத்தியதுபோல் இருக்கிறது. அதைபற்றி அவரிடமே கேட்கலாம். விமர்சனங்கள் நன்றாக இருக்கிறது. கிண்டலுக்காக இல்லாமல் நிஜமாகவே படம் நன்றாக இருப்பதாக கூறுகிறார்கள் வைபவ்வுக்கு வாழ்த்துகள் என்றார்.
இதில் வைபவ், “தினமும் இரவுப் பகலாக நடித்து 25 படங்கள் நடித்துவிட்டேன். நீங்கள் பார்த்து விட்டு கருத்து கூறுங்கள். சரோஜா மாதிரி த்ரில்லர் படம். இடைவேளையில் டீ குடிக்கக் கூட செல்லாமல் படம் பார்ப்பீர்கள்” என ஜாலியாக பேசினார்.
