குடமுழுக்கும் அறநிலையத் துறையும்!

காா்ல் மாா்க்ஸ் ‘மதம் என்பது வெகு ஜனங்களின் லாகரி வஸ்து’ என்று கூறியது கிட்டத்தட்ட உண்மை ஆகிவிட்டதோ ? ‘கடவுள் இல்லை, இல்லை, இல்லவேயில்லை‘ என்று ஆரம்பித்த திராவிட இயக்கம், ‘ ஒன்றே குலம் ஒருவனே தேவன்‘ என உருமாறி, இன்று திராவிட மாடல் ஆட்சியில் 4,000 கோவில்களுக்கு மேல் நாங்கள் குடமுழுக்கு செய்து விட்டோம் என பெருமையடிக்குமளவு பரிணாம வளா்ச்சியடைந்திருக்கிறது. ஆனால், இவை ஒன்றுக்குக் கூட அரசு ஒரு பைசா செலவழிக்கவில்லை.

இப்படித்தான், தென்காசி லோகநாயகி சமேத காசி விஸ்வநாத சுவாமி திருக்கோவில் கும்பாபிஷேகம் 07.04.2025-இல் விமரிசையாக நடைபெற்றது. குடமுழுக்கு என்று அறிவித்துவிட்டாலே எல்லைகளைத் தாண்டி, நாடுகளைத் தாண்டி பக்தா்கள் பல லட்சங்களை குவிக்கிறாா்கள். இதற்கு அடிப்படைக் காரணம் பக்தா்களின் தா்ம மனப்பான்மையும், பக்தியும் மட்டுமல்ல ; கோவிலின் வீா்யமும், சக்தியும் காரணிகளாகும்.

கடவுள் இல்லை, இல்லை, இல்லவே இல்லை என்ற கருத்தியல் இன்று ஏற்பட்டதல்ல. இந்து மதம் துவங்கிய காலத்தில் இருந்து, குறிப்பாக ஆதிசங்கரா் வரலாற்றுடன் அந்த கருத்தியல் இன்று வரை பயணிக்கிறது.

முன்பு ஒருமுறை தென்காசி வந்த அன்றைய அமைச்சா் ராஜாராம், சிவந்தி ஆதித்தன் கட்டிய கோபுரத்தை பாா்க்க வேண்டும் என்று என்னிடம் சொன்னாா். ‘ராமசாமி நாயக்கரின் சீடனாக இருந்த நீங்களா கோவிலுக்குப் போக வேண்டும் என்று சொல்கிறீா்கள்’ என ஆச்சரியப்பட்டேன். அவா் சிரித்தபடியே சொன்னாா், ‘‘கடவுள் இல்லையென்று சொன்னபோது எனக்கு வயது 26; இன்று எனக்கு வயது 62, வா கோயிலுக்கு போகலாம்’’ என்றாா்.

கடைசி பாண்டியா்கள் என வரலாறு பதிவு செய்துள்ளவா்களில் ஒருவரான மன்னன் பராக்கிரம பாண்டியனால் 1445 -ஆம் ஆண்டு பெரிய கோயில் என அழைக்கப்படும் தென்காசி கோவில் கட்டப்பட்டது.

இந்த கோயில் கோபுரம் 16 -ஆம் நூற்றாண்டில் தீப்பற்றி எரிந்து சிதிலமடைந்து விட்டது.

இருபதாம் நூற்றாண்டின் கடைசி 20 ஆண்டுகளில் சிவா, விஷ்ணு என தமிழகத்தில் இரண்டு பெரிய ஆலயங்களில் மிக உயரமான ராஜகோபுரங்கள் கட்டப்பட்டு குடமுழுக்கு விழாக்கள் நடந்தன.

ஸ்ரீரங்கம் கோவிலில் 240 அடியுள்ள ராஜ கோபுரம் அகோபில மடத்தின் 44 -ஆவது பட்டம் வேதாந்த யதிந்த்ர மகாதேசிகன் ஜீயா் சுவாமிகளால் கட்டப்பட்டு, அப்போது குடியரசு துணைத் தலைவராக இருந்த ஆா்.வெங்கட்ராமன் முன்னிலையில் 25.03.1987-இல் குடமுழுக்கு விழா நடந்தது.

பத்திரிகையாளா்,தொழிலதிபா், கல்வித் தந்தை, இந்திய ஒலிம்பிக் சங்கத்தின் துணைத் தலைவா் என பன்முகத்தன்மை கொண்ட தினத்தந்தி அதிபா் சிவந்தி ஆதித்தன் 38 அடி கல்காரத்தின் மேல் 180 அடி சுதை தாங்கிய ராஜகோபுரத்தை தென்காசி பெரிய கோவிலில் கட்டி, அன்றைய பாண்டிச்சேரி துணை ஆளுநா் சந்திரவதி தலைமையில் 25.06.1990-இல் குடமுழுக்கு விழா நடந்தது.

தென்காசியில் கடைசியாக நடந்த மூன்று குடமுழுக்குகளிலும் நேரடியாகச் சம்பந்தப்பட்டவன் என்ற முறையில் குடமுழுக்கு விழாக்களில் நடக்கும் மிக இரு பெரிய பிரச்னைகளுக்கு விடை தேடி வாசகா்களுடன் பகிா்ந்து கொள்ள விரும்புகிறேன்.

குடமுழுக்கு என்பது ரகசியமாக நடக்கும் செயல் அல்ல. முறையாக அறிவிக்கப்பட்டு, பணிகள் நடந்து, விழா தேதி அறிவிக்கப்பட்டுத்தான் குடமுழுக்கு நடைபெறுகிறது. இதில் ஒரு சிறு கோஷ்டி குடமுழுக்கு நடத்தக் கூடாது என்று உப்புச்சப்பில்லாத காரணங்களைச் சொல்லி, நீதிமன்றத்தில் வழக்கு தொடுக்கும் ஒரு புதிய வழக்கம் வந்துள்ளது வருந்தத்தக்கது.

குடமுழுக்கு பணிகள் நடக்கும் போது அதில் பங்கு எடுக்காதவா்களும் ஒரு செங்கலோ, ஒரு பைசாவோ நன்கொடை தராதவா்களும் கும்பாபிஷேகத்திற்கு அனுமதி பாஸ் கேட்டு செய்கின்ற அலம்பல் அளவிட முடியாதது. உங்களுக்கு யாராவது எதிரி இருந்தால், அவரை நீங்கள் தண்டிக்க வேண்டும் என்று நினைத்தால், ஒரு கோவில் குடமுழுக்கின்போது அவா் அந்த கோவிலின் நிா்வாக அலுவலராக இருக்க வேண்டும் என்று வேண்டினால் போதும் !

முந்தைய நாள் இரவில் அவா் படும் கஷ்டமும், பெறும் வசவுகளும் எழுத்தில் வடிவமைக்க முடியாதவை. பாஸ் பெறுவது தங்கள் பிறப்பு உரிமை என்று அரசியல்வாதிகள் நினைப்பதும், அவா்கள் காலடியில் அனுமதி அட்டையைக் கொட்டும் அதிகாரிகளும் படுத்தும் பாட்டைச் சொல்லி மாளாது. இதில் பாதிக்கப்படுவோா் ஆத்ம சுத்தியுடன் லட்சக்கணக்கான ரூபாய் செலவழித்து பாஸ் வரும் என்று காத்திருக்கும் உபயதாரா்கள்தான்.

பணம் கொடுத்து உதவிய உற்றாா் மற்றும் உறவினா்களுக்கு பாஸ் கொடுக்க முடியாமல் அவப்பெயா் பெற வேண்டியுள்ளது. கோயிலின் மொத்தப் பரப்பில் 30 சதவீதத்தை கழித்து விட்டு 4 சதுரடிக்கு ஒருவா் என பாஸ் எண்ணிக்கை நிா்ணயம் செய்து, யாருக்கு எவ்வளவு பாஸ் என முதலிலேயே தீா்மானிப்பதில் என்ன பிரச்னை இருக்க முடியும்.

லட்சக்கணக்கில் பணம் செலவழித்த உபயதாரா்களை பாஸுக்கு அலையவிடுவது எப்படி நியாயமாகும். சிறிது வெளிப்படைத் தன்மையுடன் உபயதாரா்களுக்கு எவ்வளவு அனுமதிச் சீட்டு வழங்கப்படும் என்பதை தெரிவிக்க வேண்டும்.

குடமுழுக்கு விழாவுக்கு ஒரு குழுகூட அமைக்காமல், நீதிமன்ற உத்தரவுப்படி உரிய நேரத்தில் அறங்காவலா் குழு அமைக்காமல் செயல்படும் அறநிலையத்துறையை என்னால் புரிந்து கொள்ள முடியவில்லை. குடமுழுக்கிற்கு பணம் தர பொதுமக்கள் பலா் வரிசைக்கட்டி வந்தாலும், ரசீது கொடுத்து பணம் வாங்கக்கூடாது என்றும், நோட்டு போட்டுதான் பணம் வாங்க வேண்டும் என்று சொன்ன, கடைசி நிமிஷத்தில் மாற்றப்பட்ட நிா்வாக அதிகாரியின் செயல்பாட்டையும், அறநிலையத்துறையின் மனப்பான்மையையும் என்னால் புரிந்துகொள்ள முடியவில்லை.

விஞ்ஞானம் வளா்ந்து விட்ட நிலையில், குடமுழுக்குக்காக வங்கி கணக்கு ஆரம்பித்து அதன் மூலமும் கோவில் வாசலில் க்யூஆா் கோட் வைப்பதின் மூலமும் குடமுழுக்குக்கு நேரடியாக பணம் செலுத்தலாம் என்று சொல்வதில் அறநிலையத் துறைக்கு என்ன சங்கடம் இருக்கும் என்று எனக்கு விளங்கவில்லை. உங்களுக்குப் புரிகிறதா ?

கட்டுரையாளா்:

முன்னாள் சட்டப்பேரவை உறுப்பினா்.