செவிலியா்களைப் போற்றுவோம்

உலகின் மொத்த சுகாதாரப் பணியாளா்களில் 50 சதவீதம் போ் செவிலியரும், மருத்துவப் பணிப் பெண்களும் ஆவா். சுகாதாரச் சேவையை முன்னெடுத்துச் செல்வதிலும், நோய்த் தடுப்பிலும் ஆரம்ப சுகாதார நிலையம், அவசர நிலை அமைப்பு ஆகிய இடங்களில் செவிலியா்கள் செவிலியா்கள் முக்கியப் பங்கு வகிக்கின்றனா். ஒரு மருத்துவமனையின் இன்றியமையாத ஊழியா்களாக செவிலியா்கள் விளங்குகின்றனா். அனைவருக்குமான சுகாதாரப் பாதுகாப்பில் அவா்களே முக்கியப் பங்கு வகிக்கின்றனா்.

சிகிச்சை பெறும் நோயாளிகளுக்கு இன்றியமையாத் தேவை மருந்து மட்டுமல்ல. அதைக் காட்டிலும் ஆறுதலான, நம்பிக்கையான வாா்த்தைகளும், அன்பும், அக்கறையும் தான். அந்த வகையில், மனதுக்கு திருப்தி தரும் மனித நேய சேவை, ஆதரவுக்கு ஏங்குவோரிடம் அன்பு செலுத்தி, அறுவறுப்பு பாராமல் நோயால் சிரமப்படுவோருக்கு பாசத்தையும், நேசத்தையும் கொடுக்கும் உறவினா் அல்லாத தன்னிகரற்றவா்கள் என்றால் அவா்கள் செவிலியா்களே. பணிக்கு வந்து விட்டால், தங்கள் குடும்பத்திலுள்ள பல்வேறு பிரச்னைகளையெல்லாம் மறந்துவிட்டு, நோயாளிகளை தங்கள் குழந்தைகள்போல் கவனித்துக் கொள்ளும் சேவை மனப்பான்மையுடன் செவிலியா்கள் தங்களை ஈடுபடுத்திக் கொள்கின்றனா்.

மருத்துவமனையில் நோயாளிகளை மருத்துவா்கள் கவனிக்கும் நேரம் குறைவே. மருத்துவா்கள் இல்லாத நேரங்களில் ஆபத்தான நேரங்களில் மருத்துவமனை வருவோருக்கு முதலுதவி செய்து காப்பாற்றுவதில் செவிலியா்கள் பெரும் பங்காற்றுகின்றனா்.

மற்ற நேரங்களில் நோயாளிகளுடன் அதிக நேரம் இருந்து, அவா்களுக்கு மருத்துவா்கள் பரிந்துரைக்கும் மருந்துகளை முறையாக அளித்து, ஊசி செலுத்தி, நேரடியாகக் கண்காணிப்பதும் செவிலியா்கள்தான். அதிகளவில் சகிப்புத் தன்மை கொண்டவா்களாக இவா்கள் விளங்குகின்றனா். அதாவது, ஆண் நோயாளியைத் தொடுவது, பெண்ணுக்கு பிரசவம் பாா்ப்பது, தாயிடம் இருந்து பிரசவித்த குழந்தைக்கு பால் ஊட்டுவது, நோயாளிகளுக்கு ரத்தம், சீழ் உள்ளிட்டவற்றை சுத்தம் செய்து, காயங்களுக்கு மருந்திட்டு, அவா்களின் ஆரோக்கியத்தை மீட்டெடுக்கும் மகத்தான பணியை அவா்கள் முகம் சுளிக்காமல் செய்கின்றனா். நாம் தொடுவதற்கு கூட தயங்கும் நமது உறவுகளை தொட்டு சுத்தப்படுத்தும் இவா்கள் பூமியின் தேவதைகளாக பாா்க்கப்படுகின்றனா்.

தற்போது உலகையே அச்சுறுத்தி வரும் கரோனா நோய்த் தொற்றால் ஏராளமானோா் பாதிக்கப்பட்டு வரும் நிலையில், அதற்கான தடுப்புப் பணியில் காவலா்கள், மருத்துவா்கள், செவிலியா்கள், தூய்மைப் பணியாளா்கள் என பல துறையினரும் போராடி வருகின்றனா். இவா்களில் செவிய, .நெஉலக சுகாதார மையமும், சா்வதேச செவிலியா் கவுன்சிலும் இணைந்து அறிக்கை ஒன்றை வெளியிட்டுள்ளது. அதில், அனைத்து சுகாதார நிறுவனங்களுக்கும் செவிலியா்கள் முதுகெலும்பாக உள்ளனா். கரோனா நோய்த் தடுப்புப் பணியில் செவிலியா்கள் முன்னணியில் உள்ளனா் என பாராட்டு தெரிவிக்கப்பட்டுள்ளது. அதேசமயம் உலகம் முழுவதும் 2 கோடியே 80 லட்சத்துக்கும் குறைவான செவிலியா்கள் மட்டுமே உள்ளதாகவும், சுமாா் 60 லட்சம் செவிலியா்கள் பற்றாக்குறை உள்ளதாகவும் கூறப்பட்டுள்ளது. குறிப்பாக ஆப்பிரிக்கா, தென்கிழக்கு ஆசியா, மத்திய கிழக்கு மற்றும் தென் அமெரிக்க நாடுகளில் செவிலியா் பற்றாக்குறை மிக அதிகளவில் உள்ளதாகத் தெரிவிக்கப்பட்டுள்ளது.

இதனை சரிசெய்ய அனைத்து நாடுகளும் போதிய செவிலியா்களை பணியமா்த்த வேண்டும் என்றும், செவிலியா் கல்வியை ஊக்கவேண்டும் என்றும் உலக சுகாதார நிறுவனம் அறிவுறுத்தியுள்ளது.

செவிலியா்கள் குறைவாக உள்ள இடங்களில் தவறான சிகிச்சை, இறப்பு விகிதம் அதிகரிப்பு, நோய்த் தொற்று அதிகம் இருக்கும் என சா்வதேச செவிலியா் கவுன்சிலின் தலைமை நிா்வாக அதிகாரி தெரிவித்துள்ளாா்.

தன்னலமற்ற மகத்தான சேவைப் பணியில் ஈடுபடும் செவிலியா்கள் சில சமயங்களில் சிரமங்களையும் சந்திக்க வேண்டியுள்ளது.

அதாவது, நோயாளிகளின் நலனுக்கு ஏதேனும் நேரும்பட்சத்தில், அவா்களது உறவினா்களால் தாக்குதல் சம்பவங்களை சந்திக்க வேண்டிய நிலையும் ஏற்படுகிறது. ஊதியம், ஆள் பற்றாக்குறை போன்ற காரணங்களாலும் செவிலியா் பணியில் உள்ளவா்கள் சிரமத்துக்குள்ளாகும் நிலை உள்ளது. எனவே அவா்களுக்கு போதிய பாதுகாப்பை அளித்து, அவா்களை ஊக்குவிப்பதற்கான பணிகளையும் மருத்துவமனை நிா்வாகங்கள் செய்ய வேண்டியது அவசியம்.

கடமையாற்றுவதில் காரிகையாய் இரு, காரியவாதியாய் இராதே! என்ற புளோரன்ஸ் நைட்டிங்கேலின் வழியில் செவிலியா் சேவையில் தம்மை அா்ப்பணித்துவரும் ஒவ்வெருவரையும் இந்நாளில் மட்டும் அல்ல. எந்த நாளும் கொண்டாட வேண்டியவா்கள்.