2021 -வாக்கும் போக்கும்! | 16-ஆவது சட்டப்பேரவைக்கான 2021 தோ்தல் குறித்த தலையங்கம்

தமிழகத்தின் 16-ஆவது சட்டப்பேரவை உறுப்பினா்களைத் தோ்ந்தெடுப்பதற்கான வாக்குப்பதிவு இன்று நடைபெற இருக்கிறது. முந்தைய தோ்தல்களிலிருந்து இந்தத் தோ்தல் மாறுபடுகிறது. ஜெயலலிதாவும், கருணாநிதியும் களத்தில் இல்லாத சட்டப்பேரவைத் தோ்தல் என்பதால், இதை ஒரு திருப்புமுனைத் தோ்தல் என்றேகூட வா்ணிக்கலாம்.

புதிய பாதையில் தமிழக அரசியல் பயணிப்பதன் தொடக்கமாக இருக்கப் போகிறது இன்று நாம் வாக்களித்து தோ்ந்தெடுக்க இருக்கும் சட்டப்பேரவை. அடுத்து வரும் காலங்களில் தமிழக அரசியலில் கோலோச்சப் போவது யாா் என்பதையும், இனிவரும் காலங்களில் காணாமல் போகும் அரசியல் கட்சிகள் எவை எவை என்பதையும் நிா்ணயிக்கும் தோ்தலில் நாம் வாக்களிக்க இருக்கிறோம்.

மக்களாட்சி என்பதை குறைகளே இல்லாத ஆட்சி என்று சொல்ல முடியாது. குறைகள் குறைந்த ஆட்சி முறை, அவ்வளவுதான். அதேபோல, நாடாளுமன்ற ஜனநாயகத்தில் தோ்தல் என்பது நல்லவா்களுக்கும், கெட்டவா்களுக்கும் நடக்கும் தா்மயுத்தம் ஒன்றுமல்ல. களத்தில் இருப்பவா்களில் ஏற்புடையவா் யாா்? திறமைசாலி யாா் என்பதைத் தீா்மானிக்கும் உரிமையை வாக்காளா்களுக்கு வழங்குகிறது என்கிற அளவில் ஏனைய ஆட்சி முறைகளைவிட இது சிறந்தது.

இன்று நடக்க இருக்கும் தமிழக சட்டப்பேரவைக்கான வாக்கெடுப்பில் 3,998 போ் களமிறங்கி இருக்கிறாா்கள். இவா்களில் 3,585 போ் ஆண்கள் என்றால், வெறும் 411 பெண் வேட்பாளா்கள்தான் களமிறக்கப்பட்டிருக்கிறாா்கள். மூன்றாம் பாலினத்தவா் இரண்டு போ்.

தமிழகத்திலுள்ள மொத்த வாக்காளா்கள் 6,28,69,955. அதில் ஆண்கள் 3,09,23,651, பெண்கள் 3,19,39,112, மூன்றாம் பாலினத்தவா் 7,192 போ். 3,19,39,112 பெண் வாக்காளா்கள் இருக்கும் நிலையில், முக்கிய அரசியல் கட்சிகளால் களமிறக்கப்பட்டிருக்கும் பெண் வேட்பாளா்கள் வெறும் 411 போ்தான் என்பதைப் பாா்க்கும்போது, இது ஆணாதிக்க சமுதாயத்தின் பிரதிநிதித்துவமாகத் தோற்றமளிக்கிறது. அதைவிட வேடிக்கை என்னவென்றால், பிரதான கட்சிகளான அதிமுகவும், திமுகவும் பெரும்பாலான பெண் வேட்பாளா்களை தனித் தொகுதிகளில் மட்டுமே களமிறக்கி இருக்கின்றன என்பதுதான்.

அதிமுக சாா்பில் 14 பெண் வேட்பாளா்களும், திமுக சாா்பில் 11 பெண் வேட்பாளா்களும்தான் தோ்தலில் நிறுத்தப்பட்டிருக்கிறாா்கள். பொதுத் தொகுதிகளில் அதிமுக ஏழு பெண் வேட்பாளா்களையும், திமுக நான்கு பெண் வேட்பாளா்களையும் மட்டும்தான் களமிறக்கி இருக்கின்றன என்பது 2021 சட்டப்பேரவைத் தோ்தலின் மிகப் பெரிய குறை, களங்கம்.

இன்று வாக்கெடுப்பு நடைபெற இருக்கும் தோ்தலில் போட்டியிடும் 3,998 வேட்பாளா்களில் பெருமளவில் குற்றப்பின்னணி உள்ளவா்களும் போட்டியிடுகிறாா்கள் என்பது வேதனை அளிக்கிறது. திமுக களமிறக்கி இருக்கும் 178 வேட்பாளா்களில் 136 போ் மீதும் (76%), அதிமுக களமிறக்கி இருக்கும் 191 வேட்பாளா்களில் 46 போ் மீதும் (24%) குற்ற வழக்குகள் நிலுவையில் உள்ளன. அவற்றில் திமுகவின் 50 வேட்பாளா்களும் (28%), அதிமுகவின் 18 வேட்பாளா்களும் (9%) கடுமையான குற்ற வழக்குகளை எதிா்கொள்பவா்கள்.

காங்கிரஸ் (71%), பாஜக (75%), தேமுதிக (30%), பாமக (44%) ஆகிய கட்சிகளும் கடுமையான குற்றப்பின்னணி உள்ளவா்களை களமிறக்கி இருக்கின்றன. கொலை, கொலை முயற்சி, திருட்டு, பெண்களுக்கு எதிரான குற்ற வழக்குகள், பாலியல் வன்கொடுமை வழக்கு போன்றவற்றை எதிா்கொள்ளும் வேட்பாளா்களை களமிறக்கும் அரசியல் கட்சிகள், மக்களுக்கு ஜனநாயகத்தின் மீதான நம்பிக்கையைக் குலைக்கின்றன. குற்றப்பின்னணியுள்ள வேட்பாளா்களையும், அவா்களை அதிக அளவில் களமிறக்கும் கட்சிகளையும் வாக்காளா்கள் நிராகரிக்காமல் போனால், தமிழகத்தில் சட்டம் - ஒழுங்கு சீா்குலையும் என்பதை நாம் சொல்லித் தெரிய வேண்டியதில்லை.

88,937 வாக்குச்சாவடிகளில் 1,29,165 மின்னணு வாக்குப்பதிவு இயந்திரங்களுடன் இன்றைய தோ்தல் நடைபெற இருக்கிறது. அத்தனை மின்னணு வாக்குப்பதிவு இயந்திரங்களும் ஒப்புகை சீட்டு இயந்திரங்களுடன் இணைக்கப்படாவிட்டாலும், பெரும்பாலான (91,180) இயந்திரங்கள் இணைக்கப்பட்டிருக்கின்றன என்பது மிகப் பெரிய முன்னேற்றம். மின்னணு வாக்குப்பதிவில் தவறு எதுவும் ஏற்பட்டுவிடவில்லை என்பதை ஒப்புகை சீட்டு இயந்திரங்கள் உறுதிப்படுத்தும் என்பதால் தோ்தல் முறை குறித்த ஐயப்பாட்டுக்கு இடமில்லை.

போட்டியிடும் 3,998 வேட்பாளா்களில் 1,867 போ் சுயேச்சையாகப் போட்டியிடுகிறாா்கள். அவா்களையும் சோ்த்து மொத்த வேட்பாளா்களில் படிக்காதவா்களும், ஓரளவுக்கு மட்டுமே எழுதப் படிக்கத் தெரிந்தவா்களும் என்று எடுத்துக் கொண்டால் 167 போ் மட்டுமே களத்தில் இருக்கிறாா்கள். முதல் தோ்தலில் 25%-க்கும் மேற்பட்டவா்கள் எழுதப் படிக்கத் தெரியாவா்கள் என்கிற நிலையில் இருந்து நாம் மிகப் பெரிய முன்னேற்றத்தை ஏற்படுத்தியிருக்கிறோம் என்பது பெருமைப்பட வேண்டிய வளா்ச்சி.

ஏறத்தாழ சரிபாதி வேட்பாளா்கள் படித்தவா்கள் என்பது மட்டுமல்ல, 3,000-க்கும் மேற்பட்ட வேட்பாளா்கள் 60 வயதுக்கு உட்பட்டவா்கள். 40 வயதுக்கு உட்பட்டவா்கள் 1,451 போ். இளைஞா்கள் பலா் ஆா்வத்துடன் பொது வாழ்க்கையில் ஈடுபடுவதை ஆரோக்கியமான மாற்றம் என்றுதான் கருத வேண்டும்.

16-ஆவது சட்டப்பேரவைக்கான 2021 தோ்தல், ஆட்சி மாற்றத்தை ஏற்படுத்துகிறதோ இல்லையோ, புதிய தலைவா்களை அங்கீகரிக்கும் காட்சி மாற்றத்தை ஏற்படுத்தப் போகிறது!