திரையரங்குகளில் தேசிய கீதம் கட்டாயமில்லை: உச்ச நீதிமன்றம் உத்தரவு! 

புதுதில்லி: திரையரங்குகளில் படம் திரையிடப்படுவதற்கு முன்பாக தேசிய கீதம் இசைக்க வேண்டும் என்பது கட்டாயம் இல்லை என்று உச்ச நீதிமன்றம் செவ்வாயன்று உத்தரவிட்டுள்ளது.

திரையரங்குகளில் படம் தொடங்குவதற்கு முன் தேசிய கீதம் இசைப்பதை கட்டாயமாக்க வேண்டும் என உத்தரவிடக் கோரி உச்சநீதிமன்றத்தில் பொதுநல வழக்கு ஒன்று தொடரப்பட்டது. இந்த வழக்கை விசாரித்த உச்சநீதிமன்றம் தேசிய கீதம் இசைப்பது கட்டாயம் என்று கடந்த 2016 ஆம் ஆண்டு உத்தரவு பிறப்பித்தது.

உச்சநீதிமன்றத்தின் இந்த உத்தரவு கலவையான எதிர்விளைவுகளை உண்டாக்கியது. இந்நிலையில் திரையரங்குகளில் தேசிய கீதம் கட்டாயம் என்ற உச்ச நீதிமன்ற உத்தரவுக்கு எதிராக ஒரு பொதுநல மனு தாக்கல் செய்யப்பட்டது.

அதேசமயம் இந்த விவகாரம் தொடர்பாக மத்திய அரசு உச்சநீதிமன்றத்தில் நேற்று ஒரு மனுதாக்கல் செய்தது. அதில் திரையரங்குகளில் தேசிய கீதம் கட்டாயம் என்ற உத்தரவை மாற்ற வேண்டும் என மத்திய அரசு வலியுறுத்தியிருந்தது. இது தொடர்பான வழிமுறைகளை மத்திய அமைச்சரவை குழு உருவாக்கும் வரை நீதிமன்ற உத்தரவை நிறுத்தி வைக்க வேண்டும் எனவும் மத்திய அரசு அந்த மனுவில் கோரியிருந்தது.

இந்நிலையில் திரையரங்குகளில் படம் திரையிடப்படுவதற்கு முன்பாக தேசிய கீதம் இசைக்க வேண்டும் என்பது கட்டாயம் இல்லை என்று செவ்வாயன்று உச்ச நீதிமன்றம் உத்தரவிட்டுள்ளது. இது தொடர்பான நீதிமன்ற உத்தரவில் தெரிவிக்கப்பட்டுள்ளதாவது:

தேசிய கீதம் எங்கு இசைக்கப்பட்டாலும் அதற்கு உரிய மரியாதை செலுத்த வேண்டும். திரையரங்குகளில் தேசிய கீதம் இசைக்கப்பட வேண்டுமா? வேண்டாமா? என்பது குறித்து மத்திய அரசு அமைக்கும் குழு முடிவு செய்யும். அதே சமயம் தேசிய கீதத்தை அவமதிப்பு செய்வதை தடுப்பது தொடர்பாக சில பரிந்துரைகளை அளிக்க  12 பேர் அடங்கிய குழு அமைப்பதாக மத்திய அரசின் பிரமாணப்பத்திரத்தில் தெரிவிக்கப்பட்டுள்ளதை  ஏற்றுக்கொள்கிறோம்.

இவ்வாறு உச்ச நீதிமன்ற உத்தரவில் தெரிவிக்கப்பட்டுள்ளது.