ரயில் நிலையங்களில் சிசிடிவி கேமராக்கள்: ரூ.2,500 கோடி கடன் வாங்க ரயில்வே முடிவு

ரயில் நிலையங்கள் மற்றும் ரயில்களில் சிசிடிவி கேமராக்கள் பொருத்தும் திட்டத்துக்காக ரூ.2,500 கோடி கடன் வாங்க ரயில்வே முடிவு செய்துள்ளது. மத்திய அரசிடம் இருந்து கூடுதல் நிதி கிடைக்கப் பெறாத நிலையில், இந்த முடிவை ரயில்வே எடுத்துள்ளது.
முன்னதாக, ரயில் பயணிகளின் பாதுகாப்பை கருத்தில் கொண்டு, 5,121 ரயில் நிலையங்களிலும், 58,276 ரயில் பெட்டிகளிலும் சிசிடிவி கேமராக்கள் பொருத்தும் திட்டம் 2018-19ஆம் ஆண்டு பட்ஜெட்டில் அறிவிக்கப்பட்டது. இத்திட்டத்துக்கான மொத்த செலவு ரூ.3,000 கோடியாகும். இதில், நிர்பயா நிதியின்கீழ் ரூ.500 கோடியை மத்திய நிதியமைச்சகம் ஏற்கெனவே வழங்கியுள்ளது. 
இதுதொடர்பாக ரயில்வே உயரதிகாரி ஒருவர் கூறியதாவது:
மத்திய அரசு வழங்கிய நிதியின்கீழ் இதுவரை 436 ரயில் நிலையங்களில் சிசிடிவி கேமராக்கள் பொருத்தப்பட்டுள்ளன. மேலும், 547 ரயில் நிலையங்களில் இந்த ஆண்டு சிசிடிவி கேமராக்கள் பொருத்தப்படும். இத்திட்டத்துக்கு தேவைப்படும் மீதமுள்ள தொகையை சொந்த நிதி ஆதாரங்களின் மூலம் திரட்டிக் கொள்ளுமாறு ரயில்வே அமைச்சகத்திடம் நிதியமைச்சகம் தெரிவித்துவிட்டது. இதனால், ரயில்வேயின் நிதிப் பிரிவான ரயில்வே நிதி ஆணையத்தின் (ஐஆர்எஃப்சி) மூலம் ரூ.2,500 கோடி கடன் பெறுவதற்கு முடிவு செய்யப்பட்டுள்ளது.
குளிர்சாதன வசதி கொண்ட பெட்டிகளில் முதல்கட்டமாகவும், இதர வகுப்பு பெட்டிகளில் அடுத்தகட்டமாகவும் சிசிடிவி கேமராக்கள் பொருத்தப்படும். ஒரு பெட்டியில் 8 கேமராக்கள் என்ற வீதத்தில் பொருத்தப்படும். இத்திட்டத்துக்காக, புறநகர் ரயில்களில் 10,349 பெட்டிகள், ராஜதானி, சதாப்தி போன்ற சொகுசு ரயில்களில் 4,038 பெட்டிகள், அதிவிரைவு, விரைவு ரயில்களில் 27,000 பெட்டிகள் அடையாளம் காணப்பட்டுள்ளன. அடுத்த 2 ஆண்டுகளுக்குள் இத்திட்டப் பணிகள் நிறைவடையும் என்றார் அந்த அதிகாரி.