தைரியமிருந்தால் 2019-ல் என்னை எதிர்த்துப் போட்டியிடுங்கள்: ராகுலுக்கு சாக்ஷி மஹாராஜ் சவால்

2019 நாடாளுமன்றத் தேர்தலில் தைரியமிருந்தால் தன்னை எதிர்த்துப் போட்டியிடுமாறு காங்கிரஸ் தலைவர் ராகுலுக்கு சாக்ஷி மஹாராஜ் சவால் விடுத்தார்.

இதுதொடர்பாக உத்தரபிரதேசத்தின் உன்னோ தொகுதி பாஜக எம்பி சாக்ஷி மஹாராஜ் கூறுகையில்,

வருகிற 2019 நாடாளுமன்றத் தேர்தலில் காங்கிஸ் தலைவர் ராகுல், தைரியமிருந்தால் என்னை எதிர்த்துப் போட்டியிடட்டும். அதில் மட்டும் அவர் வெற்றி பெற்று விட்டால் நான் அரசியலில் இருந்து விலகிவிடுகிறேன். ஆனால் தோல்வியுற்றால் ராகுல், இந்தியாவை விட்டு வெளியேரி இத்தாலிக்கு சென்றுவிட வேண்டும்.

ராகுலின் யாத்திரைகளை நாங்கள் யாரும் எதிர்க்கவில்லை, பாஜக-வுக்கு அதற்கான அவசியமும் இல்லை. ஆனால் அதுபோன்று யாத்திரை மேற்கொள்ளும் போது புனிதம் காக்கப்பட வேண்டும்.

எனவே ராகுல் யாத்திரை மேற்கொள்ளும் முன்னதாக அவர் தன்னை புனிதப்படுத்திக்கொள்ள வேண்டும். ஏனெனில் புனிதமற்ற யாரும் கோயில்களுக்குள் நுழையக் கூடாது. அசைவ உணவுகள் உண்ட பின்பு கோயிலில் தரிசனம் செய்யக் கூடாது. 

சில நேரங்களில் முஸ்லிம்களின் குல்லா அணிவதையும், திடீரென சிவ பக்தராக மாறுவதையும் ராகுல் வாடிக்கையாக் கொண்டுள்ளார். உத்தரபிரதேசத்தில் மிகப்பெரிய விஷ்ணு கோயில் அமைக்கும் அகிலேஷ் யாதவின் திட்டத்தை நான் வரவேற்கிறேன். 

பாஜக-வைக் கண்டு எதிர்கட்சிகள் அஞ்சுகின்றன. அதனால் தான் அவை அனைத்தும் ஒன்று கூடி மிகப்பெரிய கூட்டணியை உருவாக்க திட்டமிடுகின்றன.