பாலியல் புகார்களை விசாரிக்க விசாரணைக் குழு: அரசியல் கட்சிகளுக்கு மேனகா காந்தி கடிதம் 

புது தில்லி: பாலியல் புகார்களை விசாரிக்க விசாரணைக் குழு அமைக்குமாறு கோரி   அரசியல் கட்சிகளுக்கு மத்திய அமைச்சர் மேனகா காந்தி கடிதம் எழுதியுள்ளார்.

'மீ டூ' என்ற தலைப்பில் பெண்கள் தங்களுக்கு நேர்ந்த பாலியல் கொடுமைகளை சுட்டுரை மற்றும் சமூக ஊடகங்கள் வாயிலாக பகிர்ந்து வருகின்றனர். அண்மையில் நடிகைகள் தனு ஸ்ரீ தத்தா, கங்கனா ராவத், பாடகி சின்மயி ஆகியோர் திரைத் துறையில் தாங்கள் எதிர்கொண்ட சில கசப்பான அனுபவங்களை அதில் குறிப்பிட்டிருந்தது சர்ச்சையை ஏற்படுத்தியது.

வெளியுறவுத் துறை விவகாரங்களுக்கான இணையமைச்சர் எம்.ஜே. அக்பர், இதற்கு முன்னர் பல்வேறு பத்திரிகைகளின் ஆசிரியராகப் பணியாற்றிய அனுபவம் கொண்டவர். ஊடகத் துறையில் அவர் தீவிரமாக இயங்கியபோது பெண் பத்திரிகையாளர்கள் பலருக்கு பாலியல் ரீதியான துன்புறுத்தல்களை எம்.ஜே. அக்பர் அளித்ததாகக் குற்றச்சாட்டு எழுந்தது. இது கடும் விமர்சனங்களுக்கு வித்திட்டது.

இந்த பிரசாரத்திற்கு ஆதரவு தெரிவிக்கும் வகையில் மத்திய அமைச்சர் மேனகா காந்தி, பல்வேறு ஆக்கப்பூர்வமான நடவடிக்கையை மேற்கொள்ள திட்டங்களை முன்னெடுத்து வருகிறார். அதன் ஒரு பகுதியாக இப்போது பாலியல் புகார்களை விசாரிக்க விசாரணைக் குழுவை அமைக்க வலியுறுத்தி அரசியல் கட்சிகளுக்கு அவர் கடிதம் எழுதியுள்ளார். 

பாலியல் புகார்களை விசாரிக்கும் பொருட்டு உள் விசாரணைக் குழுவை அமைக்க கோரி அரசியல் கட்சியின் தலைவர்களுக்கு கடிதம் எழுதியுள்ளேன். இந்தியாவில் 6 தேசிய கட்சிகள் மற்றும் 90 சிறிய கட்சிகள் உள்ளது. அரசியல் கட்சிகளின் அலுவலகங்களில் நூற்றுக்கணக்கான பெண்கள் பணியாற்றுகிறார்கள். அவர்களுக்கு மிகவும் உகந்த சூழலை உருவாக்க வேண்டியது அவசியம் என்று நான் நினைக்கிறேன்,” என்று கடிதத்தில் குறிப்பிட்டுள்ளதாக தெரிவித்துள்ளார்.