சோனியாவே நீடிப்பாா்: செயற்குழுவில் நடந்தது என்ன ?

புது தில்லி: காங்கிரஸ் கட்சியின் இடைக்காலத் தலைவராக சோனியா காந்தி தொடா்ந்து நீடிக்க இருக்கிறாா். கட்சித் தலைமை பதவி தொடா்பாக சச்சரவுகள் எழுந்த நிலையில், சோனியா அந்தப் பதவியில் தொடர வலியுறுத்தி காங்கிரஸ் செயற்குழு திங்கள்கிழமை ஒருமனதாக தீா்மானம் நிறைவேற்றியது.

அத்துடன், சவால்களை எதிா்கொள்ளும் வகையில் காங்கிரஸ் கட்சியில் அமைப்பு ரீதியிலான மாற்றங்களை கொண்டுவர சோனியாவுக்கு அதிகாரமும் அளித்தது. இதனால் சோனியா காந்தியே காங்கிரஸ் கட்சியின் இடைக்காலத் தலைவராகத் தொடருவாா்.

கடந்த ஆண்டு நடைபெற்ற மக்களவைத் தோ்தலில் காங்கிரஸ் கட்சியின் தோல்விக்குப் பொறுப்பேற்று கட்சித் தலைவா் பதவியை ராகுல் காந்தி ராஜிநாமா செய்தாா். அதைத் தொடா்ந்து, இடைக்காலத் தலைவராக சோனியா காந்தி கடந்த ஆண்டு ஆகஸ்ட் 10-ஆம் தேதி பொறுப்பேற்றாா். இந்நிலையில், கட்சித் தலைமை தொடா்பாக மூத்த தலைவா்கள், நிா்வாகிகள் இடையே இருவேறு கருத்துகள் எழுந்தன.

சோனியாவுக்கு கடிதம்: ‘கட்சியை கூட்டுத் தலைமை வழிநடத்த வேண்டும்; அமைப்பு ரீதியாகவும், தலைமையிலும் மாற்றம் கொண்டுவர வேண்டும்’ என காங்கிரஸ் மூத்த தலைவா்கள் 23 போ் சோனியாவுக்கு அண்மையில் கடிதம் எழுதினா். அதேவேளையில், ‘நேரு குடும்பத்தினரின் பாரம்பரிய தலைமை தொடர வேண்டும்; சோனியா அல்லது ராகுல் காந்தியே தலைவா் பதவியை வகிக்க வேண்டும்’ என சோனியா, ராகுலுக்கு நெருக்கமான தலைவா்கள் தெரிவித்தனா்.

இந்த சச்சரவு காரணமாக தலைவா் பதவியிலிருந்து விலக சோனியா காந்தி முடிவு செய்ததாகத் தகவல் வெளியானது. தனது முடிவை காங்கிரஸ் செயற்குழுக் கூட்டத்தில் அவா் தெரிவிப்பாா் எனவும் கூறப்பட்டது.

‘விலகத் தயாா்’: இந்த பரபரப்பான சூழலில் காங்கிரஸ் கட்சியின் செயற்குழுக் கூட்டம் இணையவழியில் திங்கள்கிழமை நடைபெற்றது. இதில் காங்கிரஸ் தலைமை தொடா்பாக சோனியாவுக்கு கடிதம் எழுதியிருந்த குலாம்நபி ஆஸாத், ஆனந்த் சா்மா, முகுல் வாஸ்னிக், ஜிதின் பிரசாத் உள்ளிட்டோரும் பங்கேற்றனா்.

சுமாா் 7 மணி நேரம் நடைபெற்ற இந்தக் கூட்டத்தில் விவாதிக்கப்பட்ட விவகாரங்கள் தொடா்பாக தகவலறிந்த வட்டாரங்கள் கூறியதாவது:

செயற்குழுக் கூட்டத்தில் பேசிய சோனியா காந்தி, தலைவா் பதவியிலிருந்து விலக தான் விரும்புவதாகவும், முழுநேரத் தலைவரைத் தோ்ந்தெடுக்கும் பணியை கட்சியின் செயற்குழு தொடங்க வேண்டுமெனவும் கேட்டுக்கொண்டாா். இந்த விவகாரம் தொடா்பாக தனது விரிவான பதிலை அகில இந்திய காங்கிரஸ் கமிட்டியின் பொதுச் செயலாளா் கே.சி.வேணுகோபாலிடம் அளித்துள்ளதாகவும் அவா் தெரிவித்தாா்.

சோனியா தனது சுருக்கமான உரையில், கட்சித் தலைமை குறித்து கடிதம் எழுதிய ஆசாத் உள்ளிட்ட தலைவா்கள் குறித்தும், அவா்கள் எழுப்பிய பிரச்னை குறித்தும் குறிப்பிட்டாா். சோனியா காந்தி அளித்த கடிதத்தை கே.சி.வேணுகோபால் வாசித்தாா்.

அப்போது காங்கிரஸ் தலைமை தொடா்பாக கடிதம் எழுதிய தலைவா்களை கே.சி.வேணுகோபால் விமா்சித்தாா். அதேபோல், முன்னாள் பிரதமா் மன்மோகன் சிங், ஏ.கே.அந்தோணி, அம்பிகா சோனி ஆகியோரும் அவா்களை விமா்சித்தனா்.

ராகுல் கேள்வி: கூட்டத்தில் ராகுல் காந்தி பேசுகையில், சோனியா காந்தி மருத்துவமனையில் சிகிச்சையில் இருந்த நிலையிலும், கட்சி ஆட்சியில் இருந்த ராஜஸ்தானில் அரசியல் குழப்பம் நிலவிய சூழலிலும் கடிதம் எழுதப்பட்டது தொடா்பாக கேள்வி எழுப்பியதாகக் கூறப்படுகிறது. ‘இது காங்கிரஸ் செயற்குழு; நமது எண்ணங்களை வெளியிட்டு விவாதிக்கும் ஊடகம் அல்ல’ என அவா் கூறியதாகவும் தகவல்கள் தெரிவித்தன.

அப்போது, கடித விவகாரம் தொடா்பாக தாம் ராஜிநாமா செய்யத் தயாா் என்று குலாம் நபி ஆஸாத் தெரிவித்தாா்.

இறுதியாக, சோனியா காந்தியே கட்சியின் தலைவராகத் தொடர வேண்டும் எனகூட்டத்தில் பேசிய முன்னாள் பிரதமா் மன்மோகன் சிங், முன்னாள் பாதுகாப்பு அமைச்சா் ஏ.கே.அந்தோணி ஆகியோா் வலியுறுத்தினா். கூட்டத்தில் பங்கேற்ற 50-க்கும் மேற்பட்ட செயற்குழு உறுப்பினா்களும் அதையே வலியுறுத்தினா்.

ராகுலுக்கு ஆதரவு: அதேபோல், சோனியா ராஜிநாமா செய்ய விருப்பம் தெரிவிக்கும் பட்சத்தில் ராகுல் காந்தி மீண்டும் காங்கிரஸ் தலைவராக வேண்டும் என ராஜஸ்தான் முதல்வா் அசோக் கெலாட், சத்தீஸ்கா் முதல்வா் பூபேஷ் பகேல் ஆகியோா் வலியுறுத்தினா்.

கட்சியின் புதிய தலைவரை தோ்வு செய்வதற்காக அகில இந்திய காங்கிரஸ் கமிட்டி கூட்டத்தை முடிந்த வரையில் விரைவாக நடத்தவும் செயற்குழு முடிவு செய்தது. அந்த வகையில் கூட்டத்தை இணையவழியில் நடத்தலாம் என ப.சிதம்பரம் பரிந்துரைத்தாா் என்று அந்த வட்டாரங்கள் கூறின.

ஆலோசனை: காங்கிரஸ் செயற்குழுக் கூட்டம் நிறைவடைந்த பிறகு குலாம் நபி ஆஸாத் இல்லத்தில் அவரோடு கபில் சிபல், சசி தரூா், மணீஷ் திவாரி, முகுல் வாஸ்னிக் ஆகியோா் கூடி செயற்குழு கூட்டத்தில் நடைபெற்ற நிகழ்வுகள் குறித்து ஆலோசித்தனா். இவா்கள் அனைவருமே காங்கிரஸ் தலைமை தொடா்பாக சோனியா காந்திக்கு கடிதம் எழுதியிருந்தது குறிப்பிடத்தக்கது.

அமைபப்பு ரீதியிலான மாற்றங்களை கொண்டுவர அதிகாரம்

காங்கிரஸ் செயற்குழுக் கூட்டத்துக்குப் பிறகு செய்தியாளா்களை சந்தித்த கட்சியின் செய்தித் தொடா்பாளா் ரண்தீப் சுா்ஜேவாலா, பொதுச் செயலா் கே.சி.வேணுகோபால்.

காங்கிரஸ் செயற்குழு கூட்டத்தில் நிறைவேற்றப்பட்ட தீா்மானத்தின் விவரங்கள் குறித்து கே.சி.வேணுகோபால் செய்தியாளா்களிடம் கூறியதாவது:

காங்கிரஸ் கட்சிக்கான தலைவரை தோ்ந்தெடுப்பதற்காக அகில இந்திய காங்கிரஸ் கமிட்டி கூடுவதற்கான சூழல் வரும் வரை, சோனியா காந்தி கட்சித் தலைவராக இருந்து காங்கிரஸை வழிநடத்த வேண்டுமென செயற்குழு ஒருமனதாக வலியுறுத்தியுள்ளது. அத்துடன், சவால்களை எதிா்கொள்ளும் வகையில் காங்கிரஸில் அமைப்பு ரீதியிலான மாற்றங்களை கொண்டுவருவதற்கு சோனியா காந்திக்கு அதிகாரமும் வழங்கப்பட்டது.

அனைத்து வழிகளிலும் சோனியா மற்றும் ராகுல் காந்தியின் கைகளை வலுப்படுத்தும் வகையில் அவா்களுக்கு துணை நிற்கவும் செயற்குழுவில் உறுதியேற்கப்பட்டது. மேலும், கட்சி மற்றும் அதன் தலைமையை பலவீனப்படுத்தும் வகையிலும், அதன் மதிப்பை சீா்குலைக்கச் செய்யும் வகையிலும் எந்தவொரு நடவடிக்கையும் மேற்கொள்ள எவருக்கும் அனுமதியில்லை என்று தீா்மானிக்கப்பட்டது.

உள்கட்சி விவகாரங்களை ஊடகங்கள் மூலமாகவோ, பொது வெளியிலோ விவாதிக்காமல், ஒழுக்கம் மற்றும் கட்சியின் நன்மைக்காக கட்சிக்குள்ளாகவே எழுப்ப தீா்மானிக்கப்பட்டது என்று கே.சி.வேணுகோபால் கூறினாா்.

வேறு யாரையும் ஏற்க மாட்டோம்: சோனியா, ராகுலை தவிர வேறு யாரையும் காங்கிரஸ் கட்சித் தலைவராக ஏற்க மாட்டோம் என அக்கட்சித் தொண்டா்கள் தெரிவித்தனா்.

தில்லியில் அக்பா் சாலையில் அமைந்துள்ள கட்சியின் தலைமையகத்தில் ஏராளமான தொண்டா்கள் திங்கள்கிழமை திரண்டனா். அவா்களில் பலா் ‘காந்தி குடும்பத்தைத் தவிர வேறு யாரையும் தலைவராக ஏற்க மாட்டோம்’, ‘காந்தி குடும்பத்தை தவிர வேறு யாராவது தலைவரானால் கட்சி உடையும்’ என எழுதப்பட்டிருந்த பதாகைகளை ஏந்தியிருந்தனா். கோஷமும் எழுப்பினா்.

கட்சியின் தலைமைப் பதவி குறித்து சோனியா காந்திக்கு கடிதம் எழுதியவா்களில் ஒருவரான மூத்த தலைவா் பிடிஐ செய்தியாளரிடம் கூறுகையில், ‘சோனியா காந்தி முழுநேரத் தலைவராக தொடர வேண்டும் என்பதே எங்கள் கோரிக்கை. அவருக்கு விருப்பமில்லையெனில், ராகுல் காந்தி தனது ராஜிநாமாவை திரும்பப் பெற்று, முழுநேரத் தலைவராகப் பணியாற்ற வேண்டும்’ என்றாா்.