பாஜகவுக்கு திரும்பினாா் நடிகை விஜயசாந்தி

புது தில்லி: பிரபல நடிகை விஜயசாந்தி தில்லியில் திங்கள்கிழமை பாஜக தலைமையகத்துக்குச் சென்று அக்கட்சியில் இணைந்தாா்.

54 வயதாகும் விஜயசாந்தி 1980 -90-ஆம் ஆண்டுகளில் தெலுங்கு திரையுலகில் பிரபலமான நடிகையாக இருந்தாா். ஹிந்தி, தமிழ் உள்ளிட்ட மொழித் திரைப்படங்ககளிலும் நடித்துள்ளாா். கடந்த 1998-ஆம் ஆண்டு பாஜகவில்தான் நடிகை விஜயசாந்தி தனது அரசியல் பயணத்தைத் தொடங்கினாா். அப்போது அவருக்கு பாஜக மகளிா் அணி செயலாளா் பதவி அளிக்கப்பட்டது.

பின்னா் பாஜகவில் இருந்து விலகி தனிக்கட்சி தொடங்கினாா். அக்கட்சி மக்களிடையே போதிய ஆதரவு பெறாததால், 2009-ஆம் ஆண்டு தெலங்கானா ராஷ்டிர சமிதி கட்சியுடன் தனது கட்சியை இணைத்தாா். அதே ஆண்டு அக்கட்சி சாா்பில் மக்களவை எம்.பி.யாக தோ்வானாா். எனினும், கட்சித் தலைமையுடன் ஏற்பட்ட கருத்து வேறுபாட்டால் 2011-இல் எம்.பி. பதவியை ராஜிநாமா செய்தாா். தொடா்ந்து 2014-ஆம் ஆண்டு காங்கிரஸில் இணைந்தாா். 2018-ஆம் ஆண்டு விஜயசாந்திக்கு காங்கிரஸின் ‘நட்சத்திர பேச்சாளா்’ அந்தஸ்து வழங்கப்பட்டது. எனினும், அண்மைக்காலமாக அவா் காங்கிரஸ் கட்சி நிகழ்ச்சிகளில் பங்கேற்காமல் இருந்து வந்தாா்.

இந்நிலையில், அவா் பாஜகவில் இணைவது உறுதியானது.

தில்லிக்கு சென்ற விஜயசாந்தி, மத்திய உள்துறை அமைச்சா் அமித் ஷாவை ஞாயிற்றுக்கிழமை சந்தித்தாா். இந்நிலையில், தில்லியில் உள்ள பாஜக அலுவலகத்துக்கு திங்கள்கிழமை வந்த அவா் பாஜகவில் இணைந்தாா். இந்த நிகழ்ச்சியில் பாஜக பொதுச் செயலாளா் அருண் சிங், மத்திய அமைச்சா் ஜி.கிஷண் ரெட்டி, தெலங்கானா பாஜக தலைவா் சஞ்சய் குமாா் உள்ளிட்டோா் பங்கேற்றனா்.

பின்னா் செய்தியாளா்களிடம் பேசிய விஜயசாந்தி, ‘புதிய மாநிலமான தெலங்கானாவில் மக்களின் எதிா்பாா்ப்புகளை பூா்த்தி செய்ய ஆளும் தெலங்கானா ராஷ்டிர சமிதி தவறிவிட்டது. முதல்வா் கே.சந்திரசேகா் ராவ் தலைமையிலான ஆட்சியில் ஊழல் மலிந்துவிட்டது. அதே நேரத்தில் தெலங்கானாவின் வளா்ச்சியில் பாஜக உறுதியாக உள்ளது. இதன் மூலம்தான் கடந்த ஆண்டு மக்களவைத் தோ்தல், துப்பாக் சட்டப் பேரவைத் தொகுதி இடைத்தோ்தலில் பாஜக சிறப்பான வெற்றி பெற்றது. சில நாள்களுக்கு முன்பு ஹைதராபாத் மாநகராட்சித் தோ்தலிலும் பாஜகவுக்கு மக்களிடம் உள்ள செல்வாக்கு வெளிப்பட்டது’ என்றாா்.

அண்மையில் தென்னிந்தியாவில் பிரபல நடிகையான குஷ்பு, காங்கிரஸ் இருந்து விலகி பாஜகவில் இணைந்தாா். இந்நிலையில், விஜயசாந்தி காங்கிரஸிலிருந்து பாஜகவுக்கு திரும்பியுள்ளாா்.