புது தில்லி: நாட்டிலுள்ள விவசாயிகளின் நலனுக்கு பிரதமா் நரேந்திர மோடி தலைமையிலான அரசு முன்னுரிமை அளித்து வருவதாக மத்திய உள்துறை அமைச்சா் அமித் ஷா தெரிவித்துள்ளாா்.
விவசாயிகளுக்கு நிதியுதவி வழங்குவது தொடா்பாக தில்லியில் வெள்ளிக்கிழமை நடைபெற்ற நிகழ்ச்சியில் அமித் ஷா பங்கேற்றாா். அப்போது அவா் கூறியதாவது:
வேளாண் விளைபொருள்களுக்கான குறைந்தபட்ச ஆதரவு விலை, வேளாண் சட்டங்கள் உள்ளிட்டவை தொடா்பாக காங்கிரஸ் உள்ளிட்ட எதிா்க்கட்சிகள் விவசாயிகளிடையே வதந்திகளைப் பரப்பி வருகின்றன. குறைந்தபட்ச ஆதரவு விலை தொடா்ந்து அமலில் இருக்கும். சந்தைகள் ஒருபோதும் மூடப்படாது.
பிரதமா் மோடி தலைமையிலான அரசு, விவசாயிகளின் நலனுக்குத் தொடா்ந்து முன்னுரிமை அளித்து வருகிறது. மோடி பிரதமராக இருக்கும்வரை, விவசாயிகளின் நிலங்களை எந்தவொரு பெரு நிறுவனமும் அபகரிக்க முடியாது.
வேளாண் விளைபொருள்களுக்கான உற்பத்தி செலவில் ஒன்றரை மடங்கை குறைந்தபட்ச ஆதரவு விலையாக நிா்ணயிக்க வேண்டும் என்று விவசாயிகள் பல ஆண்டுகளாகக் கோரி வந்தனா். அக்கோரிக்கையை பிரதமா் மோடி தலைமையிலான அரசு கடந்த 2014-ஆம் ஆண்டு முதல் செயல்படுத்தி வருகிறது.
விவசாயிகளின் நலனைக் கருத்தில் கொண்டே வேளாண் சட்டங்கள் இயற்றப்பட்டன. அவற்றால் விவசாயிகளுக்கு எந்த பாதிப்பும் ஏற்படாது. வேளாண் சட்டங்களில் விவசாயிகளின் நலன்களுக்கு எதிரான விதிமுறைகள் இருந்தால், அவை தொடா்பாக மத்திய அரசிடம் விவசாயிகள் முறையிடலாம். அவை குறித்து திறந்த மனதுடன் பேச்சுவாா்த்தையில் ஈடுபடுவதற்கு பிரதமா் மோடி தலைமையிலான அரசு தயாராக உள்ளது என்றாா் அமித் ஷா.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai
உடனுக்குடன் செய்திகளை அறிய தினமணி App பதிவிறக்கம் செய்யவும்.