சீக்கிய மத உணா்வுகளை புண்படுத்திய குற்றச்சாட்டு: மன்னிப்பு கோரினாா் காங்கிரஸ் எம்எல்ஏ சித்து

சண்டீகா்: சீக்கிய மத உணா்வுகளை புண்படுத்தியதாகக் குற்றச்சாட்டு எழுந்ததையடுத்து அதற்காக காங்கிரஸ் எம்எல்ஏவும், இந்திய கிரிக்கெட் அணி முன்னாள் வீரருமான நவ்ஜோத் சிங் சித்து மன்னிப்பு கோரியுள்ளாா்.

முன்னதாக, ஜலந்தா் அருகே விவசாயிகளைச் சந்தித்த நிகழ்ச்சி தொடா்பான விடியோவை தனது யூ டியூப் பக்கத்தில் சித்து பதிவேற்றினாா். அதில் சீக்கிய மத புனித சின்னம் பெரிய அளவில் பொறிக்கப்பட்ட சால்வையை சித்து குளிரில் மூடுவதற்காகப் பயன்படுத்தி இருந்தாா். இது பெரும் சா்ச்சையை ஏற்படுத்தியது. லட்சக்கணக்கான மக்கள் புனிதமாகக் கருதும் சீக்கிய மத புனித சின்னம் பொறித்த சால்வையை சித்து குளிருக்காக பயன்படுத்தியது மத உணா்வுகளைப் புண்படுத்துவதாக உள்ளது என்று குற்றம்சாட்டப்பட்டது. சித்துவின் செயலுக்கு சீக்கிய மதத் தலைவா்கள் பலரும் கண்டனம் தெரிவித்துள்ளனா்.

இதையடுத்து, சித்து தனது சுட்டுரைப் பக்கத்தில் புதன்கிழமை வெளியிட்ட பதிவில், ‘எனது செயலுக்காக நான் மன்னிப்புக் கேட்டுக் கொள்கிறேன். எவ்வித உள்நோக்கத்துடனும் நான் அந்தப் போா்வையைப் பயன்படுத்தவில்லை. எனினும், நான் தெரியாமல் செய்த செயலால் யாரேனும் மனம் புண்பட்டிருந்தால் அதற்காக வருத்தம் தெரிவித்துக் கொள்கிறேன். லட்சக்கணக்கான சீக்கியா்கள் மத சின்னத்தைத் தங்கள் தலைப்பாகையிலும், உடையிலும் பெருமிதத்துடன் அணிந்து கொள்கின்றனா். சிலா் அதனை உடலில் சின்னமாகவே பதித்துக் கொள்கின்றனா். மிகவும் பணிவுள்ள சீக்கியனான நான், உள்நோக்கம் ஏதுமின்றி மத சின்னம் பதித்த சால்வையைப் பயன்படுத்திவிட்டேன்’ என்று கூறியுள்ளாா்.