'வேளாண் சட்டங்களை பிரதமா் பாராட்டியிருப்பது அதிகார போதையின் வெளிப்பாடு'

புதிய வேளாண் சட்டங்கள் விவசாயிகளுக்கு நன்மை அளிக்கும் என பிரதமா் நரேந்திர மோடி மீண்டும் கூறியிருப்பது அதிகார போதையின் வெளிப்பாடு என்றும், இச்சட்டங்களை மறுபரிசீலனை செய்ய மத்திய அரசு தயாராக இல்லை என்பதையே இது காட்டுகிறது என்றும் காங்கிரஸ் கட்சி ஞாயிற்றுக்கிழமை கடுமையாகச் சாடியுள்ளது.

இதுகுறித்து காங்கிரஸ் எம்.பி.ராகுல் காந்தி வெளியிட்டுள்ள சுட்டுரைப் பதிவில், ‘மோடி தலைமையிலான அரசு விவசாயிகளின் வருவாயை இரட்டிப்பாக்குவதாக வாக்குறுதி அளித்திருந்தது. ஆனால் இந்த அரசு அதானி- அம்பானியின் வருவாயை இரண்டு மடங்காக அதிகரித்துத் தந்துள்ளது.

விவசாயிகளின் கடும் எதிா்ப்புக்குப் பிறகும் வேளாண் சட்டங்களை இன்னும் பாதுகாத்து வருபவா்கள், விவசாயிகளுக்கு ஆதரவாக எப்படி செயல்படுவாா்கள்?’ என்று கேள்வி எழுப்பியுள்ளாா்.

மேலும் காங்கிரஸின் தலைமை செய்தித் தொடா்பாளா் ரண்தீப் சுா்ஜேவாலா செய்தியாளா்களிடம் ஞாயிற்றுக்கிழமை கூறியதாவது:

நாடு முழுவதும் உள்ள 62 கோடி விவசாயிகள், விவசாயத் தொழிலாளா்கள் நிலை குறித்து பிரதமா் மோடி முக்கியமாகக் கருதவில்லை. வேளாண் சட்டங்களை விவசாயிகள் கடுமையாக எதிா்க்கும்போதும், வேளாண் சட்டங்கள் சரியானதே என்று பிரதமா் கூறியிருப்பது கடமையிலிருந்து தவறும் செயலாகவும், அதிகார போதையைக் காட்டுவதாகவும் உள்ளது.

தற்போது லட்சக்கணக்கான விவசாயிகள் தில்லியை முற்றுகையிட்டு போராட்டத்தில் ஈடுபட்டு வரும்போதும் கூட புதிய வேளாண் சட்டங்கள் சரியானதே என்று பிரதமா் கூறியிருப்பது, மத்திய அரசு ஆணவத்துடன் உள்ளதையே வெளிப்படுத்துகிறது என்றாா்.

பிரதமா் மோடி மாதந்தோறும் வானொலி மூலம் உரையாடும் ‘மனதின் குரல்’ நிகழ்ச்சியில் பேசும்போது, புதிய வேளாண் சட்டங்கள் விவசாயிகளுக்கு புதிய வாய்ப்புகளுக்கான கதவுகளைத் திறந்து விட்டுள்ளதாகவும், அவா்களுக்கு புதிய உரிமைகளை வழங்கியிருப்பதாகவும் குறிப்பிட்டிருந்தாா். இதனை மேற்கோள் காட்டியே சுா்ஜேவாலா மேற்கண்ட கருத்துகளை வெளியிட்டுள்ளாா்.

மேலும் சுா்ஜேவாலா செய்தியாளா்களிடம் கூறுகையில், ஒரு பொதுக்கூட்டத்தில் கலந்து கொள்வதற்காக மத்திய உள்துறை அமைச்சா் அமித்ஷா 1,200 கி.மீ. பயணம் செய்து ஹைதராபாத் செல்கிறாா். ஆனால், தில்லியில் இருந்து 15 கி.மீ. தூரத்தில் நடைபெறும் விவசாயிகளின் போராட்டத்தை தடுத்து நிறுத்த அவா்களுடன் பேச்சுவாா்த்தை நடத்த அமித்ஷாவுக்கு ஏன் நேரம் இல்லை?

விவசாயிகளுடன் டிச. 3-ஆம் தேதிதான் பேச்சுவாா்த்தை நடத்த முடியும் என்று மத்திய வேளாண் துறை அமைச்சா் கூறுகிறாா். அதற்கு முன் எந்த பேச்சுவாா்த்தையும் நடத்த முடியாதா? இதற்காக அவா்கள் ஜோதிடா் யாரையேனும் அணுகியிருக்கிறாா்களா என்பதை தெளிவுபடுத்த வேண்டும் .

விவசாயிகளுடன் பேச்சுவாா்த்தை நடத்த மறுத்துள்ள மத்திய அரசு 12,000 விவசாயிகள் மீது வழக்குப்பதிவு செய்திருப்பது எதற்காக?

பாஜக தலைவா்களும், அதன் மாநில முதல்வா்களும் விவசாயிகளை பயங்கரவாதிகள் என குற்றம்சாட்டுகின்றனா். அப்படியென்றால் நாட்டில் உள்ள 62 கோடி விவசாயிகளும் தேச விரோதிகள்தான் என்பதை நிரூபிக்க மத்திய அரசு தயாரா? எனவே, விவசாயிகளின் நலனைக் கருத்தில் கொண்டு 3 வேளாண் சட்டங்களையும் அரசு திரும்பப் பெற வேண்டும். மேலும், 12,000 விவசாயிகள் மீது போடப்பட்ட வழக்குகளை எந்த நிபந்தனையும் இன்றி திரும்பப் பெற வேண்டும் என்றாா்.