திருப்பதியில் ஆந்திர மாநில காவல் துறை மாநாடு முதல்வா் ஜெகன் மோகன் தொடங்கி வைத்தாா்

திருப்பதி: திருப்பதியில் ஆந்திர மாநில காவல் துறை மாநாட்டை மாநில முதல்வா் ஜெகன் மோகன் ரெட்டி காணொலி மூலம் திங்கள்கிழமை தொடக்கி வைத்தாா்.

மாநில பிரிவினைக்குப் பின் ஆந்திரத்தில் நடக்கும் காவல் துறை முதல் மாநாடு இதுவாகும்.

இந்த மாநாட்டை முதல்வா் ஜெகன்மோகன் ரெட்டி, விஜயவாடாவில் உள்ள தனது முகாம் அலுவலகத்திலிருந்து திங்கள்கிழமை காணொலி மூலம் தொடக்கி வைத்து பேசியது: ‘மாநில காவல் துறை மாநாடு தற்போதைய காலகட்டத்துக்கு ஏற்ப நவீன தொழில்நுட்ப வளா்ச்சியில் ஏற்பட்டுள்ள மாற்றங்கள் குறித்து தெரிந்து கொள்வதற்கான ஒருங்கிணைந்த நிகழ்வாக அமைகிறது. இணையவழி தொழில்நுட்பம் மூலம் மகளிருக்கான பாதுகாப்பு ஏற்பாடுகளை தீவிரப்படுத்த ‘இக்னைட்’ என்ற புதிய தொழில்நுட்பம் பயன்படும். மக்கள் நம்பிக்கையுடன் காவல் நிலையத்தை நாடி வரும் வகையில் புதிய வசதிகள் ஏற்படுத்தப்பட வேண்டும்’ என்றாா்.

ஆந்திர காவல் துறை டிஜிபி கெளதம் சவாங், திருப்பதி எம்.ஆா்.பள்ளி காவல் துறை பயிற்சி மைதானத்தில் கொடி அசைத்து மாநாட்டைத் தொடக்கினாா்.

இம்மாநாட்டையொட்டி, திருப்பதி கல்யாணி அணைக்கட்டு பகுதியில் உள்ள காவல் துறை பயிற்சிப் பள்ளியில், வரும் 4 தினங்களுக்கு பல்வேறு போட்டிகள் நடத்தப்பட உள்ளன. தலைமைக் காவலா் மற்றும் காவலா்களுக்கு தனித்தனி போட்டிகள் நடத்தப்பட உள்ளதாக பயிற்சிப் பள்ளியின் முதல்வா் சூரியபாஸ்கா் ரெட்டி தெரிவித்தாா். புகைப்படக் கலை, கணினிப் பயிற்சிகள், மோப்ப நாய்களுக்குப் பயிற்சி, துப்பறிதல், அதிரடிச் சோதனைகள் உள்ளிட்டவை இந்தப் போட்டிகளில் அடங்கும்.

இதையடுத்து, விடியோகிராஃபி, மோப்ப நாய்கள் பயிற்சி, போதைப் பொருள் சோதனைகள், துப்பறிதல் குறித்த போட்டிகள், புதன்கிழமை அதிநவீன தொழில்நுட்பத்துடன் கூடிய போட்டிகள், வியாழக்கிழமை மோப்ப நாய்கள் மூலம் பூமியில் புதைந்திருக்கும் வெடி பொருள்களைக் கண்டறிதல், வாகனச் சோதனைகள் குறித்த போட்டி ஆகியவை நடைபெற உள்ளன என்று டிஜிபி கெளதம் சவாங் தெரிவித்தாா்.