மாநிலங்களின் கையிருப்பில் 1.15 கோடி தடுப்பூசிகள்: மத்திய அரசு

மாநிலங்கள் மற்றும் யூனியன் பிரதேசங்களின் கையிருப்பில் இன்னும் 1.15 கோடி தடுப்பூசிகள் பயன்படுத்தப்படாமல் இருப்பதாக மத்திய சுகாதாரத் துறை அமைச்சகம் ஞாயிற்றுக்கிழமை அறிவித்துள்ளது.

இதுபற்றி அமைச்சகம் வெளியிட்ட தரவுகள் விவரம்:

"இந்திய அரசு விலையில்லாமல் வழங்கியது, மாநிலங்கள் நேரடிக் கொள்முதல் மூலம் பெற்றது என மொத்தம் 31,51,43,490 தடுப்பூசிகள் மாநிலங்களுக்கு வழங்கப்பட்டுள்ளன. ஞாயிற்றுக்கிழமை காலை 8 மணி வரை கிடைத்த தரவுகளின் அடிப்படையில் வீணானவை உள்பட மொத்தம் 30,35,97,466 தடுப்பூசிகள் பயன்படுத்தப்பட்டுள்ளன. 1,15,46,024 தடுப்பூசிகள் இன்னும் பயன்படுத்தப்படாமல் மாநிலங்கள் மற்றும் யூனியன் பிரதேசங்களின் கையிருப்பில் உள்ளன.

மேற்கொண்டு 20,48,960 தடுப்பூசிகள் அடுத்த 3 நாள்களில் வழங்கப்படவுள்ளன."

நாடு முழுவதும் கடந்த ஜூன் 21 முதல் மாற்றியமைக்கப்பட்ட தடுப்பூசி திட்டத்தின்கீழ் தடுப்பூசி செலுத்தப்பட்டு வருகிறது. கடந்த 24 மணி நேரத்தில் மட்டும் 64.25 லட்சம் தடுப்பூசிகள் செலுத்தப்பட்டுள்ளது குறிப்பிடத்தக்கது.