கர்நாடகத்தில் மழை: மத்திய அரசிடம் நிவாரணம் கோரும் முதல்வர் பொம்மை

மழை சேத மதிப்பீட்டை கர்நாடக அரசு தயாரித்துள்ளதாகவும், உரிய இழப்பீடு வழங்க மத்திய அரசை வலியுறுத்துவதாகவும் முதல்வர் பசவராஜ் பொம்மை புதன்கிழமை தெரிவித்தார். 

வெள்ள நிலைமை குறித்து ஆய்வு செய்வதற்காக இன்று காலை மத்திய உள்துறை அமைச்சகத்தின் இணைச் செயலாளர் ஆஷிஷ் குமார் தலைமையிலான மத்தியக் குழுவினருடன் அவர் ஆலோசனை நடத்தினார். 

பெங்களூரு நகரம், அண்டை மாநிலங்களான மாண்டியா மற்றும் ராமநகர் மாவட்டங்களில் ஏற்பட்டுள்ள வெள்ள நிலவரத்தை ஆய்வு செய்யக் குழுவிடம் கேட்கப்பட்டது.

ஜூலை, ஆகஸ்ட் மற்றும் நடப்பு மாதத்தில் ஏற்பட்ட வெள்ளம் காரணமாக ஏற்பட்ட விரிவான சேதங்கள் குறித்து முதல்வர் பொம்மை தகவல்களை வழங்கினார். மாநில அரசு மேற்கொண்டுள்ள நிவாரண நடவடிக்கைகள் குறித்தும் குழு உறுப்பினர்களுக்கு விளக்கப்பட்டது. 

கனமழையால் வெள்ளம் சூழ்ந்துள்ள சித்ரதுர்கா, ஹாசன், சிக்மகளூர், ஹாவேரி, தார்வாட், கடக், பிதார், கலபுர்கி ஆகிய மாவட்டங்களை மத்தியக் குழு பார்வையிட உள்ளது.

நிலச்சரிவு, கடல் அரிப்பு மற்றும் பிற சேதங்களைக் கண்ட குடகு, தட்சிண கன்னடம் மற்றும் உத்தர கன்னட மாவட்டங்களையும் பார்வையிடுமாறு முதல்வர் பொம்மை அவர்களுக்கு அறிவுறுத்தினார்.

படிக்க: மகன் உடலை உப்புக்குள் புதைத்த பெற்றோர்: இதையெல்லாமா நம்புவது?

இம்முறை ஏராளமான மீன்பிடி படகுகள், கடைகள், வணிக நிறுவனங்கள் சேதமடைந்துள்ளதாகக் குழுவினர் தெரிவித்தனர். ராமநகரில் பட்டு ரீலிங் யூனிட் மற்றும் டிவிஸ்டிங் அலகுகளும் சேதமடைந்துள்ளன.

முதல்முறையாக இதுபோன்ற பாதிப்பு ஏற்பட்டுள்ளது. இது மக்களின் வாழ்க்கையைப் பாதித்துள்ளது. மனிதாபிமான அடிப்படையில் அதிகபட்ச உதவியை வழங்கக் குழு முயற்சிக்க வேண்டும் என்று அவர் கோரினார்.

மத்தியக் குழுவில் நிதி அமைச்சகத்தின் துணைச் செயலர் மகேஷ் குமார், எரிசக்தித் துறை உதவி இயக்குநர் பவ்யா பாண்டே, ஜல்சக்தி அமைச்சகத்தைச் சேர்ந்த அசோக்குமார், மத்திய மேற்பரப்புப் போக்குவரத்து மற்றும் நெடுஞ்சாலைத் துறையின் நிர்வாகப் பொறியாளர் வி.வி.சாஸ்திரி ஆகியோர் இடம் பெற்றுள்ளனர்.

வேளாண்மை மற்றும் விவசாயிகள் நல அமைச்சகத்திலிருந்து டாக்டர் கே.மனோகரன் மற்றும் ஊரக வளர்ச்சி அமைச்சகத்தின் துணைச் செயலாளர் எஸ்.பி.திவாரி, அமைச்சர்கள் கோவிந்த் கார்ஜோல், சி.சி. பாட்டீல், பி.சி.பாட்டீல், அரக ஞானேந்திரா, தலைமைச் செயலாளர் வந்திதா சர்மா ஆகியோர் கூட்டத்தில் கலந்துகொண்டனர்.