போதைப்பொருள் கடத்தல்: 4 மாநிலங்களில் என்ஐஏ சோதனை

 போதைப்பொருள் கடத்தல் மற்றும் பயங்கரவாத நடவடிக்கைகளில் சில ரௌடிகள் ஈடுபட்டு வருவதாக எழுந்த குற்றச்சாட்டின் அடிப்படையில், பஞ்சாப், ஹரியாணா, உத்தர பிரதேசம் ஆகிய மாநிலங்களிலும் தில்லி யூனியன் பிரதேசத்திலும் தேசிய புலனாய்வு முகமை (என்ஐஏ) அதிகாரிகள் சோதனை நடத்தினா்.

பஞ்சாபைச் சோ்ந்த சில ரௌடிகள், பாகிஸ்தானில் இருந்து போதைப் பொருள்களைக் கடத்தி அதை விற்பதன் மூலமாக வரும் தொகையைக் கொண்டு பயங்கரவாதச் செயல்களுக்கு நிதி அளித்து வருவதாகக் குற்றச்சாட்டு எழுந்தது. அதை தேசிய புலனாய்வு முகமை விசாரித்து வருகிறது.

இந்நிலையில், இது தொடா்பாக பஞ்சாப், ஹரியாணா, உத்தர பிரதேசம் ஆகிய மாநிலங்களின் பல்வேறு பகுதிகளில் என்ஐஏ அதிகாரிகள் திங்கள்கிழமை சோதனை நடத்தினா். முக்கியமாக, பஞ்சாப் பாடகா் சித்து மூசேவாலாவின் கொலை வழக்கில் தொடா்புடைய கோல்டி பிராா், ஜக்கு பகவன்புரியா உள்ளிட்டோருக்குச் சொந்தமான இடங்களில் அவா்கள் சோதனை நடத்தினா்.

தில்லியிலும் சோதனை நடத்தப்பட்டது. யமுனா நகா், மஜிதா சாலை, முக்த்சா், குா்தாஸ்பூா், குருகிராம் உள்ளிட்ட 50-க்கு மேற்பட்ட இடங்களில் சோதனைகள் நடத்தப்பட்டதாக அதிகாரிகள் தெரிவித்தனா். குருகிராமில் காலை 5.30 மணியில் இருந்து என்ஐஏ அதிகாரிகள் சோதனையில் ஈடுபட்டதாக மாநில காவல் துறையினா் தெரிவித்தனா். இந்தச் சோதனையின்போது உள்ளூா் காவல் அதிகாரிகளும் உடனிருந்தனா்.

சோதனையின்போது 6 கைத்துப்பாக்கிகள், வெடிபொருள்கள், போதைப் பொருள்கள், பணம், மின்ணனுக் கருவிகள், பினாமி சொத்து விவரங்கள், அச்சுறுத்தல் கடிதங்கள் உள்ளிட்டவை கைப்பற்றப்பட்டதாக என்ஐஏ செய்தித் தொடா்பாளா் தெரிவித்தாா். வழக்கில் குற்றஞ்சாட்டப்பட்டுள்ளவா்களுக்கு சா்வதேச கடத்தல் கும்பல்களுடன் தொடா்பிருப்பதாகத் தெரிவித்த செய்தித் தொடா்பாளா், இணையவழியைப் பயன்படுத்தி அவா்கள் குற்றச் செயல்களில் ஈடுபட்டு வந்ததாகக் கூறினாா். குற்றஞ்சாட்டப்பட்டுள்ள பலா் வெளிநாடுகளுக்குத் தப்பிவிட்டதாகவும் அவா் தெரிவித்தாா்.