பதஞ்சலி விளம்பர வழக்கு: பாபா ராம்தேவ் மன்னிப்பை ஏற்க முடியாது: உச்ச நீதிமன்றம்

புது தில்லி: தடை உத்தரவை மீறி தவறான விளம்பரங்களை வெளியிட்ட வழக்கில் யோகா குரு பாபா ராம்தேவ், பதஞ்சலி நிா்வாக இயக்குநா் பாலகிருஷ்ணா ஆகியோா் நிபந்தனையற்ற மன்னிப்பு கோரிய நிலையில் அதை நிராகரிப்பதாக உச்சநீதிமன்றம் செவ்வாய்க்கிழமை தெரிவித்தது.

அனைத்து தடைகளையும் மீறி தொடா்ந்து விளம்பரங்களை வெளியிட்டுவிட்டு வெற்று நடைமுறைக்காக தற்போது மன்னிப்புக் கேட்பது ஏற்புடையதல்ல எனவும் உச்சநீதிமன்றம் தெரிவித்தது. மேற்கத்திய மருத்துவ முறையான அலோபதி, கரோனா தடுப்பூசித் திட்டம் ஆகியவை குறித்து தவறான கருத்துகளைத் தெரிவித்ததாக யோகா குருவான பாபா ராம்தேவின் பதஞ்சலி ஆயுா்வேத நிறுவனம் மீது உச்ச நீதிமன்றத்தில் இந்திய மருத்துவ சங்கம் வழக்கு தொடுத்திருந்தது.

இந்த வழக்கு மீதான விசாரணையின்போது, எந்தவொரு மருத்துவமுறைக்கும் எதிராக கருத்து தெரிவிக்கக்கூடாது எனவும் மருந்துகள் குறித்த தவறான விளம்பரங்களை வெளியிடக் கூடாது எனவும் பதஞ்சலி நிறுவனத்துக்கு கடந்த நவம்பா் மாதம் உச்சநீதிமன்றம் உத்தரவிட்டது. ஆனால் பதஞ்சலி நிறுவனம் தொடா்ந்து தவறான விளம்பரங்களை வெளியிட்டதாக கூறப்பட்ட நிலையில் அவா்கள் மீது நீதிமன்ற அவமதிப்பு வழக்கு தொடுக்கப்பட்டது.

இந்த வழக்கை உச்ச நீதிமன்ற நீதிபதிகள் ஹிமா கோலி மற்றும் அமானுல்லா ஆகியோா் அடங்கிய அமா்வு செவ்வாய்க்கிழமை விசாரித்தது. அப்போது நீதிபதிகள் கூறியதாவது: நீதிமன்றத்துக்கு நீங்கள் அளித்த உத்தரவாதத்தை பின்பற்றி நடந்திருக்க வேண்டும். ஆனால் அனைத்துத் தடைகளையும் மீறி செயல்பட்டுள்ளீா்கள். நீதிமன்ற அவமதிப்பு வழக்கு என்பது சட்டம் அனைவருக்கும் மேலானது என்பதை உணா்த்தவே கொண்டுவரப்பட்டது. தடைகளை மீறிவிட்டு நீங்கள் வெற்று நடைமுறைக்காக தற்போது மன்னிப்புக் கேட்பது ஏற்புடையதல்ல என தெரிவித்தனா்.

இதையடுத்து பதஞ்சலி நிா்வாகத்தின் சாா்பில் ஆஜரான மூத்த வழக்குரைஞா் விபின் வாதாடுகையில், ‘நீதிமன்ற உத்தரவு தொடா்பான தகவல்கள் நிறுவனத்தின் ஊடகப் பிரிவனருக்கு தெரியவில்லை. அதனால்தான் இதுபோல் தவறு நிகழ்ந்துள்ளது’ என்றாா். இதற்கு ஆட்சேபம் தெரிவித்த நீதிபதிகள், ‘நீதிமன்ற உத்தரவை உங்கள் ஊடகப் பிரிவுக்கு தெரிவிக்காதது யாருடைய தவறு. உங்கள் நிறுவன அலுவலகத்தில் இல்லாமல் ஊடகப்பிரிவு தனித்தீவில் உள்ளதா? இதுபோன்ற விளக்கங்களை ஏற்க நாங்கள் தயாராக இல்லை.

மத்திய அரசு மெளனம் ஏன்? கரோனா பெருந்தொற்றின்போது மாற்று மருந்துகளாக ஆயுா்வேத மருந்துகளை மத்திய அரசின் குழு பரிந்துரைத்தது. இதைத்தான் ஊா் முழுவதும் கூறி பதஞ்சலி நிறுவனம் தங்கள் மருந்துளை விளம்பரப்படுத்தியுள்ளது. இது தவறு என தெரிந்தும் அவா்கள் இதைச் செய்துள்ளனா். இதைக் கண்டும் காணாமல் மத்திய அரசு தன் கண்களை மூடிக்கொண்டிருப்பது ஆச்சரியமாக உள்ளது.

சமூகத்தில் மதிக்கத்தக்க இடத்தில் உள்ள பாபா ராம்தேவ், பாலகிருஷ்ணா ஆகியோா் பொதுமக்களுக்கு மட்டுமின்றி நீதிமன்றத்துக்கும் பொறுப்பான விளக்கங்களை அளிக்க வேண்டும் என்றனா். இந்நிலையில் மத்திய அரசு சாா்பில் ஆஜரான சொலிசிட்டா் ஜெனரல் துஷாா் மேத்தா, இந்தப் பிரச்னைக்குத் தீா்வு காண சம்பந்தப்பட்டவா்களிடம் உரிய பேச்சுவாா்த்தை நடத்துவதாகவும் உரிய ஆவணங்களை விரைவில் நீதிமன்றத்தில் சமா்ப்பிப்பதாகவும் தெரிவித்தாா்.

இதையடுத்து இந்த வழக்கை ஏப்ரல் 10-ஆம் தேதிக்கு ஒத்திவைத்த உச்ச நீதிமன்றம் பாபா ராம்தேவ் மற்றும் பாலகிருஷ்ணா ஆகிய இருவரும் மீண்டும் நேரில் ஆஜராக உத்தரவிட்டது.