ஹிமாசல் கிராமத்துக்கு முதல் முறையாக கைப்பேசி இணைப்பு: பிரதமா் உரையாடல்

ஹிமாசல் பிரதேசத்தின் ஸ்பிதி பகுதியிலுள்ள கியூ கிராமத்துக்கு முதல் முறையாக கைப்பேசி இணைப்பு வழங்கப்பட்டுள்ளது. இதையடுத்து, அந்தக் கிராம மக்களுடன் பிரதமா் நரேந்திர மோடி வியாழக்கிழமை உரையாடினாா்.

13 நிமிஷங்களுக்கு மேல் நீடித்த அந்த உரையாடலில், கடந்தாண்டு தீபாவளி திருநாளில் எல்லைப்பகுதி கிராமங்களைப் பாா்வையிட்டது குறித்து மக்களிடம் பிரதமா் விவரித்தாா். மேலும், அவா் கூறுகையில், ‘இக்கிராமத்துக்கு கைப்பேசி இணைப்பு வழங்கப்பட்டுள்ளது ‘எண்ம இந்தியா’ முன்னெடுப்பைத் துரிதப்படுத்தும்.

நான் ஆட்சி பொறுப்பேற்ற காலகட்டத்தில் நாட்டின் 18,000 கிராமங்களில் மின்சார வசதியில்லை. அங்கு மின்வசதி படிப்படியாக ஏற்படுத்தப்பட்டு வரும் நிலையில், அக்கிராமங்களில் தொலைத்தொடா்பு தொழில்நுட்ப இணைப்பை ஏற்படுத்துவதற்கும் அரசு முக்கியத்துவம் அளித்து பணியாற்றி வருகிறது.

முந்தைய அரசுகளால் கைவிடப்பட்ட எல்லைப்பகுதி கிராமங்களின் வளா்ச்சியை அதிகரிக்க பல்வேறு முயற்சிகளை எனது அரசு மேற்கொண்டு வருகிறது. எனது அடுத்த ஆட்சியில் தொலைத்தூர பகுதி மக்களின் வாழ்க்கைத் தரத்தை உயா்த்துவதில் கூடுதல் கவனம் செலுத்த இருக்கிறேன். ஒரே மாவட்டம்; ஒரே பொருள் திட்டத்தின்கீழ் இந்தப் பகுதி பலனடைந்திருக்கிறது’ என்றாா்.

பிரதமருக்கு பதிலளித்து பேசிய கிராமவாசி ஒருவா், ‘எங்களின் கிராமத்தில் கைப்பேசி இணைப்பு ஏற்படுத்தப்படும் என்ற செய்தி கேட்ட தருணத்தில் எங்களால் துளியும் நம்ப முடியவில்லை. அது இன்று சாத்தியமாகியுள்ள சூழலில் எங்களின் மகிழ்ச்சிக்கு அளவில்லை. கைப்பேசி பயன்படுத்துவதற்காக முன்பு நாங்கள் 8 கிலோமீட்டா் பயணிக்க வேண்டியிருந்தது’ என்றாா்.