உத்தரகண்ட்: ஹல்த்வானி வன்முறைக்கு மூளையாக செயல்பட்டவா் தில்லியில் கைது

உத்தரகண்ட் மாநிலம், ஹல்த்வானி நகரில் அரசு நிலத்தில் சட்டவிரோதமாக கட்டப்பட்ட மதரஸாவை இடித்தபோது ஏற்பட்ட வன்முறைக்கு மூளையாக செயல்பட்ட அப்துல் மாலிக் தில்லியில் சனிக்கிழமை கைது செய்யப்பட்டாா். உத்தரகண்ட், ஹல்த்வானி நகரில் பான்பூல்புரா பகுதியில் அரசு நிலத்தை ஆக்கிரமித்து சட்டவிரோதமாக கட்டப்பட்டிருந்த மதரஸாவை (இஸ்லாமிய பள்ளி) அகற்றும் பணியை மாநகராட்சி நிா்வாகத்தினா் தொடங்கினா். சட்டவிரோத மதரஸாவை கட்டிய அப்பகுதியைச் சோ்ந்த அப்துல் மாலிக், நிா்வாகத்தின் நடவடிக்கையை கடுமையாக எதிா்த்தாா். மாநகராட்சி நோட்டீஸுக்கு எதிராக அவரின் மனைவி சஃபியா நீதிமன்றத்தில் வழக்குத் தொடுத்தாா். மாநகராட்சியின் நோட்டீஸுக்கு தடைவிதிக்க நீதிமன்றம் மறுத்துவிட்ட நிலையில், மதரஸா கடந்த 8-ஆம் தேதி இடிக்கப்பட்டது. இதற்கு எதிா்ப்புத் தெரிவித்து, அப்பகுதி மக்கள் ஏராளமானோா் திரண்டு, ஆக்கிரமிப்பை அகற்றும் பணியில் ஈடுபட்டிருந்த அதிகாரிகள், காவலா்கள் மீது கல்லெறிந்து வன்முறையில் ஈடுபட்டனா். மேலும் பெட்ரோல் குண்டுகளை வீசி, அங்குள்ள காவல் நிலையத்துக்கு தீ வைக்கவும் வன்முறையாளா்கள் முயன்றனா். இதில் காவலா்கள் பலா் பலத்த காயமடைந்தனா். இதைத் தொடா்ந்து, கலவரத்தைக் கட்டுப்படுத்த போலீஸாா் நடத்திய துப்பாக்கிச் சூட்டில், வன்முறையாளா்கள் 6 போ் உயிரிழந்தனா். வன்முறை தொடா்பான 3 வழக்குகள் மட்டுமின்றி, உயிரிழந்தவரின் பெயரில் நிலத்தின் உரிமையைச் சட்டவிரோதமாக மாற்றி, ஆக்கிரமிப்பு கட்டுமானத்தில் ஈடுபட்டதற்காக மாலிக், சஃபியா உள்பட 6 போ் மீது புதிய வழக்கு பதியப்பட்டது. அதில் இந்திய தண்டனைச் சட்டத்தின் பிரிவுகள் 120 பி (குற்றச்சதி), 417 மற்றும் 420 (மோசடி) ஆகியவற்றின்கீழ் குற்றம் சுமத்தப்பட்டது. இதைத் தொடா்ந்து தலைமறைவாகிய மாலிக் மற்றும் அவரது மகன் அப்துல் மொய்துக்கு எதிராக ‘லுக் அவுட்’ நோட்டீஸ் பிறப்பிக்கப்பட்டது. அவா்களின் சொத்துகள் முடக்கப்பட்டன. குஜராத், தில்லி, மகாராஷ்டிரம், உத்தர பிரதேசம், பிகாா் ஆகிய மாநிலங்களில் பதுங்கியிருக்கலாம் எனச் சந்தேகிக்கப்பட்ட அப்துல் மாலிக், அப்துல் மொய்த் ஆகியோரைப் பிடிக்க 6 தனிப்படைகள் அமைக்கப்பட்டன. தில்லியில் தீவிர தேடுதல் பணியில் ஈடுபட்டு வந்த உதவி ஆய்வாளா் அனீஸ் அகமது தலைமையிலான தனிப்படையினா், அங்கு பதுங்கியிருந்த அப்துல் மாலிக்கை சனிக்கிழமை கைது செய்து, ஹல்த்வானி அழைத்து வந்தனா். தற்போது போலீஸ் காவலில் உள்ள அவா் விரைவில் நீதிமன்றத்தில் ஆஜா்படுத்தப்படுவாா் எனத் தெரிவிக்கப்பட்டுள்ளது. மாலிக் மட்டுமின்றி மேலும் 2 போ் சனிக்கிழமை கைது செய்யப்பட்டனா். இத்துடன் ஹல்த்வானி வன்முறை வழக்கில் கைது செய்யப்பட்டோரின் எண்ணிக்கை 81-ஆக அதிகரித்துள்ளது. மாலிக்கின் மகன் அப்துல் மொய்த் இன்னும் பிடிபடவில்லை. அவரைத் தேடும் பணி தொடா்ந்து வருகிறது. மாலிக் கைதில் பங்காற்றிய தனிப்படை காவலா்களுக்கு தலா ரூ.50,000 வெகுமதி வழங்கி மாநில காவல்துறை தலைமை இயக்குநா் அபினவ் குமாா் பாராட்டினாா்.