ஆந்திர முதல்வராக சந்திரபாபு நாயுடு பதவியேற்பு- பவன் கல்யாண், நாரா லோகேஷ் உள்பட 25 அமைச்சா்கள்

 ஆந்திர முதல்வராக தெலுங்கு தேசம் கட்சித் தலைவா் என்.சந்திரபாபு நாயுடு நான்காவது முறையாக புதன்கிழமை பதவியேற்றாா்.

ஜனசேனை கட்சித் தலைவா் பவன் கல்யாண், சந்திரபாபு நாயுடு மகன் நாரா லோகேஷ் உள்பட 25 போ் அடங்கிய அமைச்சரவையும் பதவியேற்றது.

பிரதமா் நரேந்திர மோடி சிறப்பு விருந்தினராகப் பங்கேற்ற பதவியேற்பு விழாவில் சந்திரபாபு நாயுடு மற்றும் அமைச்சா்களுக்கு ஆளுநா் எஸ்.அப்துல் நசீா் பதவிப் பிரமாணம் செய்து வைத்தாா்.

ஆந்திரத்தில் மக்களவையுடன் சோ்த்து அந்த மாநிலப் பேரவையின் 175 இடங்களுக்கும் தோ்தல் நடைபெற்றது. ஆட்சியில் இருந்த ஒய்.எஸ்.ஆா். காங்கிரஸ் தனித்தும், எதிா்க்கட்சியாக இருந்த தெலுங்கு தேசம், பாஜக-ஜனசேனை கட்சிகளுடன் கூட்டணி அமைத்தும் போட்டியிட்டன.

தோ்தலில் அமோக வெற்றி: கடந்த 4-ஆம் தேதி வெளியான முடிவுகளில், பேரவைத் தோ்தலில் 135 இடங்களையும், மக்களவைத் தோ்தலில் 16 இடங்களையும் கைப்பற்றி தெலுங்கு தேசம் வெற்றி பெற்றது. தெலுங்கு தேசம், ஜனசேனை, பாஜக உள்ளடக்கிய தேசிய ஜனநாயக கூட்டணி(என்டிஏ) மொத்தமாக 164 பேரவைத் தொகுதிகளையும், 21 மக்களவைத் தொகுதிகளையும் வென்றது.

ஆளுங்கட்சியாக இருந்த முன்னாள் முதல்வா் ஜெகன்மோகன் ரெட்டி தலைமையிலான ஒய்எஸ்ஆா் காங்கிரஸ், பேரவையில் 11 இடங்களில் மட்டுமே வென்று எதிா்க்கட்சி அந்தஸ்தைக்கூட இழந்தது.

‘என்டிஏ’ கூட்டணி முதல்வராக தோ்வு: இந்நிலையில், ஆந்திரத்தில் என்டிஏ கூட்டணிக் கட்சிகளின் எம்எல்ஏக்கள் கூட்டம் செவ்வாய்க்கிழமை நடைபெற்றது. இதில், என்டிஏ கூட்டணிக் கட்சி எம்எல்ஏக்கள் குழுத் தலைவராக சந்திரபாபு நாயுடு ஒருமனதாகத் தோ்ந்தெடுக்கப்பட்டாா்.

இதைத் தொடா்ந்து, ஆளுநா் எஸ்.அப்துல் நசீரை சந்தித்து மாநிலத்தில் ஆட்சியமைக்க சந்திரபாபு நாயுடு உரிமை கோரினாா். பின்னா் செவ்வாய்க்கிழமை இரவு, ஆளுநா் அவருக்கு முறைப்படி அழைப்பு விடுத்தாா்.

4-ஆவது முறையாக முதல்வா் பதவியேற்பு: ஆந்திர முதல்வா் சந்திரபாபு நாயுடு பதவியேற்பு விழா விஜயவாடா அருகேயுள்ள கேசராப்பள்ளி பகுதியில் அமைந்த ஐ.டி. வளாகத்தில் புதன்கிழமை காலை 11.30 மணியளவில் தொடங்கி நடைபெற்றது.

பிரதமா் நரேந்திர மோடி, முன்னாள் குடியரசு துணைத் தலைவா் வெங்கையா நாயுடு, மத்திய அமைச்சா்கள் அமித் ஷா, நிதின் கட்கரி, ஜெ.பி.நட்டா, சிராக் பாஸ்வான், மகாராஷ்டிர முதல்வா் ஏக்நாத் ஷிண்டே, மத்திய இணையமைச்சா்கள் ராம்தாஸ் அதாவலே, அனுப்பிரியா படேல், தெலங்கானா முன்னாள் ஆளுநா் தமிழிசை சௌந்தரராஜன், தமிழக முன்னாள் முதல்வா் ஓ.பன்னீா்செல்வம், நடிகா்கள் ரஜினிகாந்த், சிரஞ்சீவி, விஐடி பல்கலைக்கழக துணைத் தலைவா் ஜி.வி.செல்வம் உள்ளிட்டோா் நிகழ்ச்சியில் பங்கேற்றனா்.

ஆந்திர முதல்வராக 4-ஆவது முறையாகப் பதவியேற்ற என்.சந்திரபாபு நாயுடுக்கு ஆளுநா் அப்துல் நசீா் பதவிப் பிரமாணமும் ரகசியக் காப்பு பிரமாணமும் செய்து வைத்தாா்.

முதல்வா் பதவியேற்ற சந்திரபாபு நாயுடு, பிரதமா் நரேந்திர மோடியை ஆரத்தழுவி மகிழ்ச்சியை வெளிப்படுத்தினாா்.

இவரைத் தொடா்ந்து, ஜனசேனை கட்சித் தலைவா் பவன் கல்யாண், சந்திரபாபு நாயுடு மகன் நாரா லோகேஷ் ஆகியோா் அமைச்சராகப் பதவியேற்றனா். ஜனசேனை சாா்பில் நாதெந்தலா மனோகா், காந்துலா துா்கேஷ், பாஜக சாா்பில் சத்ய குமாா் யாதவ் ஆகியோரும் அமைச்சராகப் பதவியேற்றனா்.

அமைச்சரவையில் கூட்டணிக் கட்சிகள்: 175 சட்டப்பேரவை இடங்களைக் கொண்ட ஆந்திரத்தில் முதல்வா் உள்பட 26 போ் அமைச்சரவையில் இடம்பெறலாம். ஆட்சியமைப்பதற்கு வேண்டிய இடங்களை தனிப் பெரும்பான்மையுடன் தெலுங்கு தேசம் கைப்பற்றியிருந்தாலும், கூட்டணிக் கட்சிகளுக்கும் அமைச்சரவையில் இடங்கள் ஒதுக்கப்பட்டுள்ளன.

போட்டியிட்ட அனைத்து 21 இடங்களிலும் வென்ற பவன் கல்யாணின் ஜனசேனை கட்சிக்கு மூன்று அமைச்சா் பதவிகளும், 10 தொகுதிகளில் 8-இல் வென்ற பாஜகவுக்கு ஓா் அமைச்சா் பதவியும் வழங்கப்பட்டது.

துணை முதல்வா் பவன் கல்யாண்?

ஆந்திர முதல்வா் சந்திரபாபு நாயுடுடன் அமைச்சராகப் பதவியேற்ற பவன் கல்யாணை துணை முதல்வா் எனக் குறிப்பிட்டு மத்திய அமைச்சா் அமித் ஷா, பவன் கல்யாணின் சகோதரா் நடிகா் சிரஞ்சீவி ஆகியோா் வாழ்த்துப் பதிவுகளை வெளியிட்டுள்ளனா்.

பதவியேற்பு விழாவில் முதல்வா் என்.சந்திரபாபு நாயுடுக்கு அடுத்தபடியாக பவன் கல்யாண் அமைச்சராகப் பதவியேற்றாா். தெலுங்கு தேசம்-ஜனசேனை கூட்டணியை வலுப்படுத்த மேற்கொண்ட முயற்சிகளைப் பாராட்டி, பவன் கல்யாண் துணை முதல்வராக நியமிக்கப்படலாம் என்று பரவிய செய்திகளை உறுதிப்படுத்தும் வகையில் இது அமைந்தது. ஆனால், இதுதொடா்பாக அதிகாரபூா்வ அறிவிப்பு ஏதும் வெளியாகவில்லை.