மணிப்பூர் மக்கள், விவசாயிகள் உங்கள் குடும்பமா? மோடிக்கு பிரகாஷ்ராஜ் கேள்வி

‘மோடியின் குடும்பம்’ என்று பாஜக தலைவர்கள் எக்ஸ் தளத்தில் பெயர் மாற்றி வரும் நிலையில், நடிகர் பிரகாஷ் ராஜ் எக்ஸ் தளத்தில் கேள்வி எழுப்பியுள்ளார்.

பாட்னாவில் ஞாயிற்றுக்கிழமை நடைபெற்ற பொதுக் கூட்டத்தில் பேசிய ராஷ்டிரிய ஜனதா தளத்தின் தலைவர் லாலு பிரசாத் யாதவ், “ நரேந்திர மோடிக்கு குடும்பமே இல்லை, நீங்கள் ஹிந்துகூட இல்லை, ஹிந்து மதத்தினரின் தாய் இறந்தால், மொட்டை அடிக்க வேண்டும். ஆனால், நீங்கள் மொட்டை அடித்தீர்களா? சமூகத்தில் வெறுப்பை மட்டுமே பரப்புகிறீர்கள்” என்று கடுமையாக விமர்சித்திருந்தார்.

இதற்கு பதிலளித்த பிரதமர் மோடி, “நாட்டின் 140 கோடி மக்களும் எனது குடும்பத்தினர். நாட்டில் உள்ள கோடிக்கணக்கான மகள்கள், தாய்மார்கள், சகோதரிகள் இன்று மோடி குடும்பத்தில் உள்ளனர்.” எனத் தெரிவித்தார்.

மேலும், மத்திய அமைச்சர்கள், பாஜக தலைவர்கள் அனைவரும் தங்களின் எக்ஸ் தளத்தில் பெயருக்கு பின்னால் ‘மோடியின் குடும்பம்’ எனச் சேர்த்துள்ளனர்.

இந்த நிலையில், “மணிப்பூர் மக்கள், விவசாயிகள், வேலையில்லாத இளைஞர்கள் எல்லாம் உங்களின் குடும்பம்தானா?” எனக் கேள்வி எழுப்பியுள்ளார்.