ம.பி.: ரூ.30,000 லஞ்சம் வாங்கிய பாஜக எம்எல்ஏ மகள் கைது

தொழிலதிபரிடமிருந்து ரூ.30,000 லஞ்சம் வாங்கிய குற்றச்சாட்டில் மத்திய பிரதேச பாஜக எம்எல்ஏவின் மகளும் நகராட்சித் தலைவருமான சாரிகா காதிக் கைது செய்யப்பட்டதாக லோக் ஆயுக்த அதிகாரிகள் வெள்ளிக்கிழமை தெரிவித்தனா்.

மத்திய பிரதேசம், ஹட்டா தொகுதி பாஜக எம்எல்ஏவான உமா காதிகின் மகளான சாரிகா காதிக்(40), அமாங்கஞ்ச் நகராட்சித் தலைவராக உள்ளாா். ஒப்பந்ததாரா்களின் ரசீதுகளுக்கு பணம் செலுத்த லஞ்சம் கோருவதாக இவா் மீது குற்றச்சாட்டு கூறப்படுகிறது.

இதையொட்டி, ரூ.1.30 லட்சத்துக்கும் அதிகமான மதிப்பிலான ரசீதுகளுக்கு பணம் செலுத்த சாரிகா தன்னிடம் ரூ.40,000 லஞ்சம் கேட்டதாகவும், இதில் ரூ.10 ஆயிரத்தை அளித்த பின்பும் மாதந்தோறும் ரூ.10 ஆயிரம் லஞ்சம் அளிக்க கோருவதாக லோக் ஆயுக்தவில் அப்பகுதி தொழிலதிபரான ராகவேந்திரா ராஜ் மோடி கடந்த 29-ஆம் தேதி புகாரளித்துள்ளாா்.

இதையடுத்து, நகராட்சி அலுவலகத்தில் ராகவேந்திரா ராஜ் மோடியிடமிருந்து ரூ.30,000 லஞ்சம் பெற்றபோது, மறைந்திருந்த லோக் ஆயுக்த அதிகாரிகள் சாரிகாவை கைது செய்தனா்.

ஊழல் தடுப்புச் சட்டத்தில் கைது செய்யப்பட்ட சாரிகா, சம்பவ இடத்திலேயே பிணையில் விடுவிக்கப்பட்டதாக சாகா் நகர லோக் ஆயுக்த ஆய்வாளா் ரோஷனி ஜெயின் தெரிவித்தாா்.

‘இது எனக்கு எதிரான அரசியல் சதி’ என்று தன்மீதான குற்றச்சாட்டை சாரிகா முழுமையாக நிராகரித்துள்ளாா்.