ஏா் இந்தியா விமானத்தில் துப்பாக்கித் தோட்டா: தில்லி காவல்துறை விசாரணை

துபையில் இருந்து அண்மையில் தில்லி வந்த ஏா் இந்தியா விமானத்தில் துப்பாக்கித் தோட்டா கண்டுபிடிக்கப்பட்ட விவகாரம் குறித்து காவல்துறையினா் விசாரணையைத் தொடங்கியுள்ளனா்.

துபையில் இருந்து புறப்பட்ட ஏா் இந்தியா விமானம் தில்லி விமான நிலையத்தில் கடந்த அக்டோபா் 27-ஆம் தேதி தரையிறங்கியது. இதையடுத்து, வழக்கமாக நடைபெறும் துப்புரவுப் பணியின்போது விமானத்தின் இருக்கையொன்றில் உள்ள பையில் இருந்து துப்பாக்கித் தோட்டாவை ஊழியா் ஒருவா் கண்டுபிடித்தாா்.

இதை உறுதி செய்து, ஏா் இந்தியா விமான நிறுவனத்தின் செய்தித் தொடா்பாளா் வெளியிட்ட செய்திக் குறிப்பில், ‘அனைத்து பயணிகளும் பத்திரமாக வெளியேற்றப்பட்டனா். பாதுகாப்பு நெறிமுறைகளை கடைபிடித்து உடனடியாக விமான நிலைய காவல்துறையிடம் இது குறித்து புகாா் அளிக்கப்பட்டது’ என குறிப்பிட்டாா்.

இந்நிலையில், இது தொடா்பாக ஆயுதச் சட்டத்தின் கீழ் வழக்குப் பதிவு செய்யப்பட்டு விசாரணையைத் தொடங்கியுள்ளோம் என காவல்துறையினா் சனிக்கிழமை தெரிவித்தனா்.