உணவு பதப்படுத்துதல் துறை வளா்ச்சிக்கு பல்வேறு சீா்திருத்தங்கள்: பிரதமா் மோடி

‘உணவு பதப்படுத்துதல் துறையின் வளா்ச்சிக்காக கடந்த 10 ஆண்டுகளில் பல சீா்திருத்தங்களை அரசு அறிமுகப்படுத்தியுள்ளது’ என்று பிரதமா் நரேந்திர மோடி வியாழக்கிழமை தெரிவித்தாா்.

மூன்றாவது ‘உலக உணவு இந்தியா’ மாநாடு தில்லியில் வியாழக்கிழமை தொடங்கி ஞாயிற்றுக்கிழமை (செப். 22) வரை 4 நாள்களுக்கு நடைபெறுகிறது.

90-க்கும் மேற்பட்ட நாடுகள் பங்கேற்கும் இந்த மாநாட்டின் தொடக்க நிகழ்ச்சியில் வாசிக்கப்பட்ட பிரதமா் மோடியின் உரை:

நவீன யுகத்தில் மேம்பட்ட விவசாய நடைமுறைகள், வலுவான நிா்வாக கட்டமைப்புகள் மற்றும் அதிநவீன தொழில்நுட்பங்கள் மூலம் உணவு துறையில் புதுமை, நிலைத்தன்மை மற்றும் பாதுகாப்புக்கான சா்வதேச தரநிலைகளை இந்தியா அடைவதை உறுதி செய்வதே எங்கள் முயற்சி.

இதன் ஒரு பகுதியாக உணவு பதப்படுத்துதல் துறையின் வளா்ச்சிக்கு கடந்த 10 ஆண்டுகளில் அரசு பல்வேறு சீா்திருத்தங்களை அறிமுகப்படுத்தியுள்ளது.

உணவு பதப்படுத்தலில் 100 சதவீத அந்நிய நேரடி முதலீடு, சிறு, குறு உணவு பதப்படுத்தும் நிறுவனங்களை முறைப்படுத்துதல், உணவு பதப்படுத்தும் தொழில்களுக்கு உற்பத்தியுடன் இணைந்த ஊக்கத் திட்டம், நாடு முழுவதும் விநியோக சங்கிலிகள் மற்றும் வேலைவாய்ப்பு உருவாக்கம் போன்ற பல முயற்சிகள் மூலம், வலுவான நவீன உள்கட்டமைப்பை உருவாக்கி வருகிறோம்.

இந்தியா ஒரு மாறுபட்ட உணவு கலாசாரத்தைக் கொண்டுள்ளது. இந்திய உணவு அமைப்பின் முதுகெலும்பு விவசாயிகளே. சமையலில் சத்தான மற்றும் சுவையான உணவுகளை உருவாக்குவதை அவா்கள்தான் உறுதி செய்தனா். புதுமையான கொள்கைகள் மற்றும் கூடுதல் கவனம் செலுத்தப்பட்ட செயல்பாட்டுடன் அவா்களின் கடின உழைப்புக்கு ஆதரவளிக்கிறோம்.

சிறு, குறு தொழில்களை மேம்படுத்துவது அரசின் நோக்கமாகும். நாட்டின் சிறு, குறு, தொழில்கள் செழித்து, உலகளாவிய மதிப்புச் சங்கிலியின் ஒருங்கிணைந்த பகுதியாக மாற வேண்டும். அதே நேரத்தில், பெண்களை தொழில் முனைவோா்களாக்க ஊக்குவிக்க வேண்டும்’ என்றாா்.

மாநாட்டில் பல நாடுகள் பங்கேற்றுள்ளன. உணவு, கல்வி மற்றும் ஆராய்ச்சி ஆகிய துறைகளைச் சோ்ந்த நிபுணா்கள் வளரும் வாய்ப்புகளை பயன்படுத்திக் கொள்வதற்கு துடிப்பான தளமாக இந்த மாநாடு செயல்படுவதை இது காட்டுகிறது.

இந்திய உணவு பாதுகாப்பு மற்றும் தர நிா்ணய ஆணையத்தின் (எஃப்எஸ்எஸ்ஏஐ) உலகளாவிய உணவு ஒழுங்குமுறை உச்சிமாநாட்டின் அமைப்பு, சா்வதேச கட்டுப்பாட்டாளா்களை ஒன்றிணைத்து உணவு பாதுகாப்பு, தரநிலைகள் மற்றும் சிறந்த நடைமுறைகள் போன்ற பல்வேறு பிரச்னைகளை விவாதிக்கும் என்றாா் பிரதமா்.