நிலக்கரி நிலுவைத் தொகை ரூ.1.36 லட்சம் கோடி: மத்திய அரசு வழங்க ஜாா்க்கண்ட் முதல்வா் வலியுறுத்தல்

ஜாா்க்கண்ட் மாநிலத்துக்கு நிலக்கரி நிலுவைத் தொகை ரூ.1.36 லட்சம் கோடியை மத்திய அரசு உடனடியாக விடுவிக்க வேண்டும் என்று அந்த மாநில முதல்வா் ஹேமந்த் சோரன் வலியுறுத்தியுள்ளாா்.

மத்திய நிலக்கரி துறை அமைச்சக அதிகாரிகள், கோல் இந்தியா நிறுவன உயரதிகாரிகள், ஜாா்க்கண்ட் மாநில அரசு அதிகாரிகள் பங்கேற்ற ஆலோசனைக் கூட்டம் ராஞ்சியில் நடைபெற்றது. இதில் மத்திய நிலக்கரி, சுரங்கத் துறை அமைச்சா் ஜி.கிஷண் ரெட்டி, முதல்வா் ஹேமந்த் சோரன் ஆகியோரும் பங்கேற்றனா்.

அப்போது, மத்திய அரசு ஜாா்க்கண்ட் மாநிலத்துக்கு தராமல் பாக்கி வைத்துள்ள நிலக்கரிக்கான நிலுவை ரூ.1.36 லட்சம் கோடியை விடுவிக்க வேண்டும் என்று ஹேமந்த் சோரன் வலியுறுத்தினாா். இதனைப் பரிசீலித்து விரைவில் முடிவெடுப்பதாக அமைச்சா் கிஷண் ரெட்டி தெரிவித்தாா்.

இது தவிர நிலக்கரி எடுக்கப்பட்ட பிறகு மத்திய அரசு நிலக்கரி நிறுவனங்களால் கைவிடப்படும் நிலங்களை மாநில அரசிடம் உடனடியாக முறைப்படி ஒப்படைக்க வேண்டும். ஏனெனில், கைவிடப்பட்ட சுரங்கங்களில் சிலா் சட்டவிரோதமாக மீண்டும் நிலக்கரி எடுக்க முயலுகின்றனா். இது உயிரிழப்புகளும், சட்டம்-ஒழுங்கு பிரச்னைக்கும் வழி வகுக்கிறது.

நிலக்கரி சுரங்கங்களால் ஏற்படும் சுற்றுச்சூழல் பாதிப்பை குறைக்கவும் மத்திய அரசு உரிய நடவடிக்கை எடுக்க வேண்டும். கோல் இந்தியா நிறுவனத்தின் தலைமையகத்தை கொல்கத்தாவில் இருந்து ஜாா்க்கண்ட் மாநிலத்துக்கு மாற்ற வேண்டும் என்றும் சோரன் வலியுறுத்தினாா்.

கடந்த ஆண்டு நவம்பரில் நடைபெற்ற ஜாா்க்கண்ட் சட்டப் பேரவைத் தோ்தலில் முதல்வா் ஹேமந்த் சோரன் தலைமையிலான ஜாா்க்கண்ட் முக்தி மோா்ச்சா, காங்கிரஸ் உள்ளிட்ட கட்சிகள் அடங்கிய கூட்டணிக்கும், பாஜக கூட்டணிக்கும் இடையே கடும் போட்டி நிலவியது. தோ்தல் பிரசாரத்தின்போது மத்திய பாஜக அரசு நிலக்கரி நிலுவைத் தொகையை தராமல் இழுத்தடிப்பதாக சோரன் குற்றம்சாட்டினாா். தோ்தலில் சோரன் வெற்றி பெற்று முதல்வா் பதவியைத் தக்கவைத்தாா்.