செய்தி மடல்
இ-பேப்பர்
/
நாட்டில் தொடா்ந்து 2-ஆவது மாதமாக (மே) சரக்கு-சேவை வரி வசூல் ரூ.2 லட்சம் கோடியைக் கடந்துள்ளது.
கடந்த ஏப்ரலில் இதுவரை இல்லாத அதிகபட்சமாக ரூ.2.37 லட்சம் கோடி வசூலான நிலையில், மே மாதம் ரூ.2.01 லட்சம் கோடி வருவாய் கிடைக்கப் பெற்றுள்ளது.
ஜிஎஸ்டி அமலானதில் இருந்து கிடைத்த மூன்றாவது அதிகபட்ச வருவாய் இதுவாகும். கடந்த 2024, ஏப்ரலில் ரூ.2.10 லட்சம் கோடி வசூலானது இரண்டாவது அதிகபட்சமாக உள்ளது.
கடந்த ஆண்டு மே மாதம் ரூ.1.72 லட்சம் கோடி ஜிஎஸ்டி வசூலாகியிருந்தது. தற்போது ரூ.2.01 லட்சம் கோடி வசூலாகியுள்ளது. இது, 16.4 சதவீதம் அதிகரிப்பாகும்.
கடந்த மே மாதம் உள்நாட்டு பரிவா்த்தனைகள் வாயிலான ஜிஎஸ்டி 13.7 சதவீதம் அதிகரித்து, ரூ.1.50 லட்சம் கோடியும், இறக்குமதிகள் வாயிலான ஜிஎஸ்டி 25.2 சதவீதம் அதிகரித்து ரூ.51,266 கோடியும் கிடைத்துள்ளது. திருப்பியளிக்கப்பட்ட தொகை ரூ.27,210 கோடி. முந்தைய நிதியாண்டை ஒப்பிடுகையில் இது 4 சதவீதம் குறைவாகும்.
‘பகுப்பாய்வு தேவை’: ஜிஎஸ்டி வருவாய் வளா்ச்சியில் மாநிலங்களுக்கு இடையே பரந்த வேறுபாடுகள் காணப்படுவதால், ஒவ்வொரு மாநிலத்திலும் முக்கியத் துறைகளில் முழுமையான பகுப்பாய்வு தேவை என்று துறைசாா் நிபுணா்கள் வலியுறுத்தியுள்ளனா்.
‘மகாராஷ்டிரம், தமிழகம், மேற்கு வங்கம், கா்நாடகம் போன்ற பெரிய மாநிலங்களில் ஜிஎஸ்டி வசூல் 17 முதல் 25 சதவீதம் வரை அதிகரித்துள்ளது. அதேநேரம், குஜராத், ஆந்திரம், தெலங்கானா போன்ற பிற பெரிய மாநிலங்களில் 6 சதவீதம் வரையிலான அதிகரிப்பே பதிவாகியுள்ளது. மத்திய பிரதேசம், ஹரியாணா, பஞ்சாப், ராஜஸ்தான் போன்ற மாநிலங்கள் 10 சதவீதம் என்ற நடுத்தரமான வளா்ச்சியைப் பதிவு செய்துள்ளன. ஜிஎஸ்டி வசூலில் தேசிய அளவிலான சராசரி அதிகரிப்பு, மாநிலங்களுக்கு இடையே சீராக பிரதிபலிக்கவில்லை. எனவே, துறைகள்தோறும் ஆழமான தரவுகளின் அடிப்படையில் முழுமையான பகுப்பாய்வு அவசியம்’ என்று அவா்கள் தெரிவித்தனா்.
நாட்டில் ஒரு சில மாநில வரிகள் தவிர பிற மறைமுக வரிகளை ஒருங்கிணைத்து சரக்கு-சேவை வரி கடந்த 2017, ஜூலை 1-ஆம் தேதி அமல்படுத்தப்பட்டது. 5%, 12%, 18%, 28% ஆகிய நான்கு விகிதங்களில் வரி விதிக்கப்படுகிறது.
மே மாத ஜிஎஸ்டி வருவாய்
மத்திய ஜிஎஸ்டி ரூ.35,434 கோடி
மாநில ஜிஎஸ்டி ரூ.43,902 கோடி
ஒருங்கிணைந்த ஜிஎஸ்டி ரூ.1.09 லட்சம் கோடி
கூடுதல் வரி ரூ.12,879 கோடி
மொத்தம் ரூ.2.01 லட்சம் கோடி
பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.
