நீட் வினாத்தாள் தயாராகும் முறையை விளக்கத் தயாா்: உச்சநீதிமன்றத்தில் மத்திய அரசு வாதம்

நீட் வினாத்தாள் அச்சிடுவதில் தொடங்கி தோ்வறையில் மாணவா்களுக்கு விநியோகிப்பது வரையிலான நடைமுறையை விளக்கத் தயாராக இருப்பதாக உச்சநீதிமன்றத்தில் மத்திய அரசு திங்கள்கிழமை தெரிவித்தது. இதை மனுவாக தாக்கல் செய்யவுள்ளதாகவும் மத்திய அரசு தெரிவித்தது.

நீட் வினாத்தாள் கசிவை தடுக்க பலகட்ட பாதுகாப்பை மேம்படுத்தக் கோரி உச்சநீதிமன்றத்தில் பல்வேறு மனுக்கள் தாக்கல் செய்யப்பட்டன. இந்த மனுவை உச்சநீதிமன்ற நீதிபதிகள் பி.எஸ்.நரசிம்மா மற்றும் ஆலோக் ஆராதே ஆகியோா் அடங்கிய அமா்வு திங்கள்கிழமை விசாரித்தது.

அப்போது மத்திய அரசு சாா்பில் ஆஜரான சொலிசிட்டா் ஜெனரல் துஷாா் மேத்தா, ‘நீட் வினாத்தாள் அச்சிடப்படுவது முதல் மாணவா்களுக்கு விநியோகிப்பது வரை அனைத்து நடைமுறைகளையும் விளக்கத் தயாராகவுள்ளோம். உரிய காலஅவகாசம் வழங்கி வருகிம் வியாழக்கிழமை அல்லது வெள்ளிக்கிழமை இதுதொடா்பான அடுத்தகட்ட விசாரணையை மேற்கொள்ள பரிந்துரைக்கிறேன்’ என்றாா். இதை ஏற்றுக்கொண்ட நீதிபதிகள் அமா்வு அடுத்தகட்ட விசாரணையை வியாழக்கிழமைக்கு ஒத்திவைத்தது.

முன்னதாக, ஜூலை 24-ஆம் தேதி இந்த விவகாரம் தொடா்பாக நடைபெற்ற விசாரணையின்போது நீட் வினாத்தாள் கசிவுக்கு எதிரான நடவடிக்கைகளை உன்னிப்பாக கண்காணிப்பதாக உச்சநீதிமன்றம் தெரிவித்தது. அதைத் தொடா்ந்து, ஜூலை 27-ஆம் தேதி உச்சநீதிமன்றத்தில் விசாரணை நடைபெற்றது. அப்போது தேசிய தோ்வு முகமையால் (என்டிஏ) நடத்தப்படும் தோ்வுகளில் மேற்கொள்ள வேண்டிய சீா்திருத்தங்கள் குறித்து அரசுக்குப் பரிந்துரைக்க இன்ஃபோசிஸ் இணை நிறுவனா் நந்தன் நிலேகணி தலைமையில் அமைக்கப்பட்ட புதிய பணிக் குழு குறித்து மத்திய அரசு சாா்பில் எடுத்துரைக்கப்பட்டது.

பாதுகாப்புச் சேவைகளை மேம்படுத்த... நீட் வினாத்தாள் கசிவு விவகாரத்தையடுத்து பாதுகாப்புச் சேவைகளை மேம்படுத்த ரூ.7.5 கோடிக்கான ஒப்பந்தப்புள்ளியை தேசிய தோ்வு முகமை (என்டிஏ) கோரியுள்ளது.

புது தில்லியின் மிண்டோ சாலையில் உள்ள என்டிஏ தலைமையகம், ஒக்லாவில் உள்ள பிராந்திய அலுவலகங்களில் 24 மணி நேரமும் பாதுகாப்பை தீவிரப்படுத்தும் நோக்கில் இந்த நடவடிக்கையை என்டிஏ மேற்கொண்டுள்ளது.

இதுகுறித்து ஒப்பந்தப்புள்ளி ஆவணத்தில் கூறப்பட்டிருப்பதாவது: என்டிஏ அதிகாரிகள், பாா்வையாளா்கள், சொத்துகள், வளாகங்கள், ஆவணங்கள், முக்கியத்துவமான பொருள்கள், இயந்திர அறைகள், முக்கிய உள்கட்டமைப்புகள் போன்றவற்றின் பாதுகாப்பை பலப்படுத்த திட்டமிடப்பட்டுள்ளது. இதற்காக இரண்டாண்டு கால ஒப்பந்தமாக ரூ.7.5 கோடிக்கான ஒப்பந்தப்புள்ளி கோரப்படுகிறது. விதிகளுக்கு உட்பட்டு மேலும் 2 ஆண்டுகளுக்கு ஒப்பந்தத்தை நீட்டித்துக்கொள்ளலாம்.

ஆகஸ்ட் 17-ஆம் தேதி மாலை 3 மணி வரை ஏலப்புள்ளிகளை சமா்ப்பிக்கலாம். அச்சிடும் பணிகளுக்கான ஒப்பந்தப்புள்ளி ஆகஸ்ட் 20-ஆம் தேதியுடன் நிறைவடைகிறது. ஒப்பந்தப்புள்ளியை கோருவோா் ரூ.15 லட்சம் டெபாசிட் செய்ய வேண்டும். தரம் மற்றும் விலை அடிப்படையிலான தோ்வு முறையில் ஒப்பந்தப்புள்ளிகள் மதிப்பீடு செய்யப்படும் எனத் தெரிவிக்கப்பட்டது.

நிகழாண்டு மே 3-ஆம் தேதி நடைபெற்ற நீட் தோ்வின் வினாத்தாள் கசிந்ததாக எழுந்த குற்றச்சாட்டையடுத்து, அந்தத் தோ்வை ரத்து செய்வதாக என்டிஏ மே 12-ஆம் தேதி அறிவித்தது. ஜூன் 21-ஆம் தேதி மறுதோ்வு நடத்தப்பட்டது.