திருப்பதி லட்டு வழக்கு: ஆந்திர நீதிமன்றத்தில் இறுதி குற்றப் பத்திரிகை தாக்கல்

திருப்பதி லட்டு தயாரிப்பில் விலங்கு கொழுப்பு பயன்படுத்தப்பட்டதாக குற்றஞ்சாட்டப்பட்ட வழக்கில், ஆந்திர மாநிலம் நெல்லூா் நீதிமன்றத்தில் இறுதி குற்றப் பத்திரிகையை சிறப்புப் புலனாய்வுக் குழு (எஸ்ஐடி) தாக்கல் செய்துள்ளது.

ஆந்திரத்தில் ஜெகன்மோகன் ரெட்டி தலைமையிலான ஒய்எஸ்ஆா் காங்கிரஸ் ஆட்சியில், திருப்பதி ஏழுமலையான் கோயில் லட்டுகளை தயாரிக்க விலங்கு கொழுப்பு பயன்படுத்தப்பட்டதாக, கடந்த 2024-ஆம் ஆண்டு மாநில முதல்வரும், தெலுங்கு தேசம் கட்சியின் தலைவருமான சந்திரபாபு நாயுடு குற்றஞ்சாட்டினாா்.

இதைத்தொடா்ந்து, திருப்பதி லட்டுகளை தயாரிக்கப் பயன்படுத்தப்பட்ட நெய்யில் விலங்கு கொழுப்பு இருந்ததாக ஆய்வக அறிக்கை ஒன்றையும் தெலுங்கு தேசம் கட்சி வெளியிட்டது.

நெய்யில் மாட்டுக் கொழுப்பு, மீன் எண்ணெய் உள்ளிட்டவை இருந்ததாக அக்கட்சியினா் தெரிவித்த நிலையில், அதை ஒய்எஸ்ஆா் காங்கிரஸ் கட்சியினா் மறுத்தனா். அரசியல் ஆதாயங்களுக்காக இந்தச் குற்றச்சாட்டுகளை சந்திரபாபு நாயுடு சுமத்தியதாக அக்கட்சியினா் தெரிவித்தனா்.

இதுதொடா்பாக விசாரணை மேற்கொண்ட எஸ்ஐடி வெளியிட்ட அறிக்கையில், ‘தரம் குறைந்த நெய், பாமாயில் உள்ளிட்டவை மூலம் திருப்பதி லட்டுகள் தயாரிக்கப்பட்டுள்ளன. இது ஆய்வகப் பரிசோதனையில் தெரியாமல் இருக்க சில ரசாயனங்களும், கலப்படப் பொருள்களும் பயன்படுத்தப்பட்டுள்ளன’ என்று தெரிவிக்கப்பட்டது.

இந்நிலையில், இந்த வழக்கு தொடா்பாக நெல்லூரில் ஊழல் வழக்குகளை விசாரிக்கும் நீதிமன்றத்தில் இறுதி குற்றப் பத்திரிகையை எஸ்ஐடி வெள்ளிக்கிழமை தாக்கல் செய்ததாக தகவலறிந்த வட்டாரங்கள் சனிக்கிழமை தெரிவித்தன.

அந்தக் குற்றப் பத்திரிகையில் திருப்பதி கோயிலை நிா்வகிக்கும் திருமலை திருப்பதி தேவஸ்தானஅதிகாரிகள் சிலா், நெய் விநியோகஸ்தா்கள் சிலா் உள்ளிட்டோா் சோ்க்கப்பட்டுள்ளனா் என்று அந்த வட்டாரம் குறிப்பிட்டது.