மே. வங்கத்தில் பாஜக ஆட்சி அமைந்த சில நாள்களில்..! கொல்கத்தா வந்த அமெரிக்க வெளியுறவு அமைச்சர்!

அமெரிக்க வெளியுறவுத் துறை அமைச்சா் மாா்கோ ரூபியோ, தனது இந்தியப் பயணத்தின் முதல்கட்டமாக மேற்கு வங்கத் தலைநகா் கொல்கத்தாவுக்கு சனிக்கிழமை வந்தாா். அன்னை தெரசாவால் நிறுவப்பட்ட மிஷனரீஸ் ஆஃப் சாரிட்டி அமைப்பின் தலைமையகத்தை அவா் பாா்வையிட்டாா்.

அமெரிக்க வெளியுறவு அமைச்சா் ஒருவா், கொல்கத்தாவுக்கு வந்திருப்பது கடந்த 14 ஆண்டுகளில் இதுவே முதல் முறையாகும். கடைசியாக கடந்த 2012-இல் அப்போதைய அமெரிக்க வெளியுறவு அமைச்சா் ஹிலாரி ஹிண்டன் கொல்கத்தாவுக்கு வருகை தந்திருந்தாா்.

சமீபத்திய மேற்கு வங்க பேரவைத் தோ்தலில் பாஜக அமோக வெற்றி பெற்று, முதல் முறையாக ஆட்சியைக் கைப்பற்றியது. திரிணமூல் காங்கிரஸிடம் இருந்து பாஜகவுக்கு ஆட்சி மாறிய சூழலில், அமெரிக்க வெளியுறவு அமைச்சா் மாா்கோ ரூபியோ தனது நான்கு நாள்கள் இந்தியப் பயணத்தின் முதல்கட்டமாக கொல்கத்தாவுக்கு சனிக்கிழமை வந்தாா்.

மத்திய கொல்கத்தாவில் உள்ள அன்னை தெரசாவின் மிஷனரீஸ் ஆஃப் சாரிட்டி அமைப்பின் தலைமையகமான ‘அன்னை இல்லத்துக்கு’ தனது மனைவி ஜீனெட் உடன் வந்து பாா்வையிட்டாா். அங்கு அமைந்துள்ள அன்னை தெரசாவின் நினைவிடத்தில் இருவரும் மலரஞ்சலி செலுத்தினா்.

அதன் பின்னா் அந்த அமைப்பின் சாா்பில் நடத்தப்படும் குழந்தைகள் இல்லத்துக்கும் சென்றாா். அவருடன், இந்தியாவுக்கான அமெரிக்க தூதா் சொ்ஜியோ கோா் மற்றும் அதிகாரிகள் சென்றனா்.

இந்தியாவுக்கு முதல் அரசுமுறைப் பயணம்:

அமெரிக்க தூதா் சொ்ஜியோ கோா் வெளியிட்ட எக்ஸ் பதிவில், ‘அமெரிக்க வெளியுறவு அமைச்சா் மாா்கோ ரூபியோவின் முதல் இந்திய அரசுமுறைப் பயணம் இதுவாகும். அவரை இந்தியாவுக்கு வரவேற்பதில் நாங்கள் பெருமை கொள்கிறோம். க்வாட் வெளியுறவு அமைச்சா்கள் கூட்டம் உள்பட இந்திய - அமெரிக்க வலுவான கூட்டுறவுக்கு லட்சியமிக்க செயல்திட்டம் எங்களின் முன் உள்ளது. ஆக்கபூா்வ விவாதங்கள் மற்றும் ஒன்றிணைந்து உண்மையான முன்னேற்றத்தை எட்டுவதை எதிா்நோக்கியுள்ளோம்’ என்று குறிப்பிட்டுள்ளாா்.

கொல்கத்தாவில் தனது நிகழ்ச்சிகளை முடித்துக்கொண்டு தில்லி சென்ற மாா்கோ ரூபியோ, பிரதமா் மோடியுடன் பேச்சுவாா்த்தையில் ஈடுபட்டாா். இந்தப் பயணத்தின்போது, ஆக்ரா, ஜெய்பூா் ஆகிய நகரங்களுக்குச் செல்லவிருக்கும் அவா், தில்லியில் செவ்வாய்க்கிழமை நடைபெறும் க்வாட் (இந்தியா, அமெரிக்கா, ஜப்பான், ஆஸ்திரேலியா) கூட்டமைப்பின் வெளியுறவு அமைச்சா்கள் கூட்டத்தில் பங்கேற்கவுள்ளாா்.

வெளியுறவு அமைச்சா் எஸ்.ஜெய்சங்கா் தலைமையில் நடைபெறும் இந்தக் கூட்டத்தில், ஜப்பான் வெளியுறவு அமைச்சா் மோடேகி டோஷிமிட்சு, ஆஸ்திரேலிய வெளியுறவு அமைச்சா் பென்னி வாங் உள்ளிட்டோா் பங்கேற்கவுள்ளனா்.