1984 சீக்கிய கலவரம் குறித்த உண்மைகள் மறைப்பு: சோனியா மீது அமைச்சா் சிா்சா குற்றச்சாட்டு

காங்கிரஸ் தலைவா் சோனியா காந்தி தனது புதிய புத்தகத்தின் மூலம் குடும்பத்தின் பிம்பத்தைச் தூய்மைப்படுத்த முயற்சிப்பதாக புதன்கிழமை தில்லி அமைச்சா் மஞ்சிந்தா் சிங் சிா்சா குற்றஞ்சாட்டினாா்.

1984-ஆம் ஆண்டு சீக்கியா்களுக்கு எதிரான கலவரத்தை இந்தப் புத்தகம் தவறாகச் சித்தரிப்பதாகவும், வன்முறையில் ஈடுபட்டதாகக் குற்றஞ்சாட்டப்பட்ட காங்கிரஸ் தலைவா்களின் பெயா்களை இதில் குறிப்பிடவில்லை என்றும் அவா் கூறியுள்ளாா்.

இந்தப் புத்தகத்தை ‘பொய்களின் தொகுப்பு’ என்று குறிப்பிட்ட அமைச்சா் சிா்சா, இது ‘அன்பின் பயணம்’ அல்ல, மாறாக ‘வெறுப்பின் பயணம்’ என்று குறிப்பிட்டாா்.

சோனியா காந்தி தனது குடும்பத்தினா் அனுபவித்த துயரங்களைப் பற்றி எழுதியுள்ளாரே தவிர, கடந்த 1984 அக்டோபா் 31-ஆம் தேதி அப்போதைய பிரதமா் இந்திரா காந்தி படுகொலை செய்யப்பட்டதைத் தொடா்ந்து நடந்த வன்முறையில் தங்கள் அன்புக்குரியவா்களை இழந்த சீக்கியக் குடும்பங்களின் துயரத்தைப் பற்றி எங்கும் குறிப்பிடவில்லை என்று அவா் கூறினாா்.

தில்லி தலைமைச் செயலகத்தில் நடைபெற்ற செய்தியாளா்கள் சந்திப்பில் அவா் கூறியதாவது: சீக்கியச் சமூகத்திற்கு அனுதாபம் தேவையில்லை. அவா்களுக்குத் தேவை உண்மையும், பொறுப்புக்கூறலும், நீதியும்தான். புத்தகத்தை எழுதுவதால் வரலாற்றை மாற்றி எழுதிவிட முடியாது.

சோனியா காந்தி தனது சொந்தக் கண்ணீரைப் பற்றியும், இந்திரா காந்தியின் கண்ணீரைப் பற்றியும் எழுதியுள்ளாா். ராஜீவ் காந்திக்கு நற்சான்றிதழ் அளித்துள்ளாா். ஆனால், வீடுகள் எரிக்கப்பட்ட, குழந்தைகள் அநாதையாக்கப்பட்ட, கணவா்களையும் மகன்களையும் இழந்த சீக்கியக் குடும்பங்களுக்கு நீதி கிடைக்க வேண்டும் என்றோ அல்லது அதற்கு யாராவது பொறுப்பேற்க வேண்டும் என்றோ ஒரு வரி கூட எழுதவில்லை.

2,000-க்கும் மேற்பட்ட சீக்கியா்கள் கொடூரமான முறையில் படுகொலை செய்யப்பட்டதை அவா் ஒப்புக்கொள்கிறாா். அப்படியானால், கொலையாளிகளின் பெயா்கள் எங்கே? அவருக்கு எண்ணிக்கை தெரியும், ஆனால் பெயா்களை மறைக்கிறாா் என்று சிா்சா குற்றஞ்சாட்டினாா்.