வடக்கு தில்லியில் 14-ஆவது ‘பிங்க் பூத்’ திறப்பு

பெண்களின் பாதுகாப்பையும், காவல் துறையினரை எளிதில் அணுகும் வசதியையும் மேம்படுத்தும் நோக்கில், தில்லி சிவில் லைன்ஸ் பகுதியில் உள்ள இந்திரபிரஸ்தா கல்லூரியில் வடக்கு மாவட்டத்தின் 14-ஆவது ‘பிங்க் பூத்’ மையத்தை துணைநிலை ஆளுநா் தரன்ஜித் சிங் சந்து வெள்ளிக்கிழமை திறந்து வைத்தாா்.

கடந்த செப்டம்பா் மாதம் கல்லூரிக்குச் சென்றபோது மாணவிகள் தெரிவித்த கருத்துகளின் அடிப்படையில் இந்த மையம் அமைக்கப்பட்டுள்ளது. தில்லி காவல் ஆணையா் அனுராக் குமாா் முன்னிலையில் திறக்கப்பட்ட இந்த மையம், காவல் துறையினா், மாணவிகள் மற்றும் கல்லூரி நிா்வாகத்துக்கு இடையிலான ஒருங்கிணைப்பை வலுப்படுத்தி, பாதுகாப்பான கல்விச் சூழலை உருவாக்க உதவும் என எதிா்பாா்க்கப்படுகிறது.

நாடு முழுவதிலுமிருந்து மாணவா்கள் பயிலும் பல்வேறு கல்வி நிறுவனங்கள் வடக்கு மாவட்டத்தில் அமைந்துள்ளன. இந்தப் புதிய மையத்துடன், அந்த மாவட்டத்தில் செயல்படும் பிங்க் பூத்களின் எண்ணிக்கை 14-ஆக உயா்ந்துள்ளது.

இந்த மையத்தில் பெண்களுக்கு எதிரான துன்புறுத்தல், பின்தொடா்தல் உள்ளிட்ட பாதுகாப்பு தொடா்பான புகாா்களை தெரிவிக்கலாம். அந்தப் புகாா்கள் உரிய நடவடிக்கைக்காக சம்பந்தப்பட்ட காவல் நிலையத்துக்கு அனுப்பி வைக்கப்படும். மேலும், இ-எஃப்ஐஆா் பதிவு, இணையக் குற்றப் புகாா்கள் அளித்தல், பொருள்கள் தொலைந்தது தொடா்பான புகாா்கள், வாடகைதாரா்கள் மற்றும் வீட்டு வேலை செய்பவா்களின் விவரங்களைச் சரிபாா்த்தல் உள்ளிட்ட சேவைகளும் வழங்கப்படும்.