சில்லறை வியாபாரிகளின் வயிற்றில் அடித்து விட்டார் கருணாநிதி: கே.பாலகிருஷ்ணன்

கருணாநிதி சில்லறை வியாபாரிகள் வயிற்றில் அடித்துவிட்டு, சட்டப்பேரவை வைரவிழாவில் தனது பெயர் சொல்லாதது தான் வருத்தமாக உள்ளது என்கிறார் என மார்க்சிஸ்ட் கம்யூ கட்சி மத்தியக் குழு உறுப்பினரும், சிதம்பரம் சட்டப் பேரவை உறுப்பினருமான கே.பாலகிருஷ்ணன் தெரிவித்தார்.

கல்வி, வேலை, சுகாதாரம் கேட்டும், இயற்கை கனிம வளங்களை பாதுகாத்திட கோரியும், போதை மற்றும் சாதி மதவெறியை தடுத்திடக் கோரியும், லஞ்சம், ஊழலுக்கு எதிராகவும் இந்திய ஜனநாய வாலிபர் சங்கம் சார்பில் பிரசாரம் மேற்கொண்டு சென்னை, திருவள்ளூவர், புதுச்சேரி, ஓசூர், ராமேஸ்வரம், தேனி, கோவை, குமரி என தமிழகத்தின் எட்டு முனைகளிலிருந்து திருச்சி நோக்கி தமிழகத்தில் 4000 கிலோ மீட்டர் நடைபயணமாக நெடும்பயணம் மேற்கொள்ளப் பட்டுள்ளது.

டிச.6 அன்று புதுச்சேரியில் தொடங்கிய வாலிபர் சங்கத்தின் இந்த பயனக்குழு டிச.9-ம் தேதி கடலூர் மாவட்டத்திற்க்கு வந்தடைந்தது. பின்னர் கடலூர் மாவட்டத்தில் முக்கிய இடங்களில் மூன்று நாட்கள் நடைபயணக்குழுவினர் ஆயிரகணக்கான மக்களை சந்தித்து பிரச்சாரம் மேற்கொண்டனர். புதன்கிழமை பரங்கிப்பேட்டை பகுதியில் நடைப் பயணத்தை தொடங்கி பி.முட்லூர், ஆதிவராகநல்லூர், புவனகிரி, கீரப்பாளையம் வழியாக சிதம்பரம் வந்தடைந்தனர்.

நகர எல்லையான வண்டிகேட் பகுதியில் நடைபயணக் குழுவினரை சிதம்பரம் சட்டப்பேரவை உறுப்பினர் கே.பாலகிருஷ்ணன் தலைமையில்  நகரச் செயலாளர் ஆர்.ராமச்சந்திரன், மாவட்டச் செய்ற்குழு உறுப்பினர் பி.கற்பனைச்செல்வம் உள்ளிட்ட நகர்குழு உறுப்பினர்கள் மாலை அணிவித்து வரவேற்றனர். இதனை தொடர்ந்து காந்தி சிலை அருகே வாலிபர் சங்க நெடுபயணம் வரவேற்பு பொதுகூட்டம் நடைபெற்றது. ஜனநாயக வாலிபர் சங்க நகரச் செயலாளர் ஏ.சாதிக் அலி தலைமை வகித்தார்.

கூட்டத்தில் சட்டப் பேரவை உறுப்பினர் கே.பாலகிருஷ்ணன் பங்கேற்று பேசினார்... அவர் பேசியது:

இந்த பயணக் குழுவில் 11 வயது மாணவன் பிடல் காஸ்ரோ, சில்லறை வர்த்தகத்தின் மூலம் நாட்டை அடகு வைக்கவிடமாட்டேன் என்று பயணக் குழுவில் பங்கேற்றுள்ளது பாராட்டுக்குரியது. சில்லறை வர்த்தகத்தில் அந்நிய நேரடி முதலீடு பிரச்சனையில் தமிழக முதல்வரின் செயல்பாடு பாராட்டக் கூடியது. ஆனால் தற்போது தமிழகத்தில் பாரதி வால்மார்ட் என்ற பெயரில் சில்லறை வர்த்தகம் வருகிறது. தற்போதே வால்மார்டுக்கு ஏஜண்டுகள் செயல்பட தொடங்கி விட்டனர். அனைத்து வியாபாரத்தையும் கபளிகரம் செய்ய, ஆபத்தான விதையை போடுகின்றனர்.

தமிழகத்தில் டெல்டா மாவட்டங்களில் நீரின்றி நெற்பயிர்கள் அனைத்தும் காய்ந்து விவசாயிகள் தற்கொலை செய்து கொள்ளும் சூழல் உள்ளது. இதுபோன்று இன்னும் எவ்வளவோ நாட்டின் பிரச்சனைகள் உள்ளது. ஆனால் பாமக நிறுவனர் ராமதாஸ் காதலுக்கு எதிர்ப்பு தெரிவித்தும், காதலித்தால் சமூக விரோத செயல் என கூறி வருகிறார். சாதி சனியன் ஒழியும் போது, சாதியை தூக்கி பிடிக்க நினைப்பது நியாயமா? சாதி இருந்தால் வால்மார்ட் வர்த்தகம், விவசாயிகள் பிரச்னையெல்லாம் தீர்ந்து விடுமா? அனைத்து சாதியும், மதமும் இனைந்து தேசத்தை பாதுகாக்க வேண்டும். சாதியை புகுத்தி பிளவு படுத்தினால் யாருக்கு லாபம் என எண்ணி பார்க்கவேண்டும் என கே.பாலகிருஷ்ணன் எம்எல்ஏ தெரிவித்தார்.

முன்னதாக வாலிபர் சங்க முன்னாள் மாநிலத்தலைவர் எஸ்.ஜி.ரமேஷ்பாபு, மாநில பொருளாளர் எஸ்.பாலா, கடலூர் மாவட்டச் செயலாளர் அசோகன், மாநிலச் செயற்குழு பி.குணசுந்தரி, மாவட்டத் தலைவர் அமர்நாத், மாவட்ட பொருளாளர் கிருஷ்ணன், மாவட்ட துணைச் செயலாளர் குமரகுரு, மாவட்டச் செயற்க்குழு காந்தி, இந்திய மாணவர் சங்க மாவட்டத் தலைவர் க.சுனில் உள்ளிட்டோர் பங்கேற்றனர்.