போக்குவரத்துக்கு லாயக்கற்ற சாலை: சிதம்பரம் அருகே எம்.எல்.ஏ தலைமையில் சாலைமறியல்

சிதம்பரம் அருகே போக்குவரத்திற்கு லாயக்கற்ற நிலையில் உள்ள கொள்ளிடக்கரை சாலையை சீரமைக்க கோரி கே.பாலகிருஷ்ணன் எம்எல்ஏ தலைமையில் சாலைமறியல் வெள்ளிக்கிழமை நடைபெற்றது.

கொடியம்பாளையம் முதல் அணைக்கரை வரை கொள்ளிடம் வலது கரையை பலப்படுத்தி சாலை அமைக்கப்பட்டுள்ளது. அச்சாலை குறுகலாக அமைக்கப்பட்டதால் போக்குவரத்திற்கு லாயக்கற்று நிலையில் உள்ள கொள்ளிட்டகரை சாலையை அகலப்படுத்தி பேருந்து போக்குவரத்தை உடன் ஏற்படுத்த வேண்டும் உள்ளிட்ட பல்வேறு கோரிக்கைகளை என வலியுறுத்தி இச்சாலைமறியல் நடைபெற்றது.

சிதம்பரம் அருகே வல்லம்படுகையில் சீர்காழி செல்லும் சாலையில் வெள்ளிக்கிழமை சாலைமறியலில் ஈடுபட்டனர். சிதம்பரம் சட்டப்பேரவை உறுப்பினர் கே.பாலகிருஷ்ணன் எம்எல்ஏ தலைமை வகித்தார். ஊராட்சி மன்றத் தலைவர்கள் ஆறு.கலையரசன் (வல்லம்படுகை), எஸ்.சந்தானகுமார் (கீழகுண்டலபாடி), தவமணிராமசாமி (பெராம்பட்டு), கே.கெளதமன் (சாலியாந்தோப்பு), பி.முத்துலட்சுமி (கருப்பூர்), கே.கலியமூர்த்தி (வையூர்),  பி.மாசிலாமணி (அகரநல்லூர்), ஒன்றியக்கவுன்சிலர்கள் டி.சங்கர், ஏ.டிசெந்தில்குமார், மார்க்சிஸ்ட் கம்யூ கட்சி குமராட்சி ஒன்றியச் செயலாளர் மாசிலாமணி மற்றும் பொதுமக்கள் உள்ளிட்ட 300 பேர் மறியலில் பங்கேற்றனர்.

சிதம்பரம் உதவி ஆட்சியர் எல்.சுப்பிரமணியன், வட்டாட்சியர் க.தனசிங், ஏஎஸ்பி எம்.துரை மற்றும் போலீஸார் சம்பவ இடத்திற்கு சென்று சமரசப்படுத்தியதால் மறியல் வாபஸ் பெறப்பட்டது. இதனால் சிதம்பரம்-சீர்காழி நெடுஞ்சாலையில் சுமார் 20 நிமிடம் போக்குவரத்து பாதிக்கப்பட்டது. பினனர் உதவிஆட்சியர் எல்.சுப்பிரமணியன் தலைமையில் நடைபெற்ற பேசசுவார்த்தையில் சாலையை அகலப்படுத்தி பேருந்துகள் இயக்க பொதுப்பணித்துறை மூலம் நடவடிக்கை மேற்கொள்வது என்றும், வருகிற  டிச.25-ம் தேதி சிதம்பரம் உதவிஆட்சியர் அலுவலகத்தில் சம்பந்தப்பட்ட அதிகாரிகளை அழைத்து ஆலோசனைக் கூட்டம் நடத்துவது என முடிவு செய்யப்பட்டது.