கடனாநதி, அடவிநயினார் அணைகளின் நீர்மட்டம் உயர்வு

மேற்குத் தொடர்ச்சி மலையில் நீர்பிடிப்பு பகுதியில் நீடித்து வரும் மழையால் அணைகளின் நீர்வரத்து அதிகரித்து நீர்மட்டமும் உயர்ந்து வருகிறது. கடனாநதி அணையின் நீர்மட்டம் கணிசமாக அதிகரித்து 52 அடியாக உள்ளது.

திருநெல்வேலி மாவட்டத்தில் அவ்வப்போது பெய்து வரும் மழையால் கோடை வெப்பம் குறைந்து காணப்படுகிறது. இதனிடையே மேற்குத் தொடர்ச்சி மலையில் நீர்பிடிப்பு பகுதியில் தொடர்ந்து பெய்து வரும் மழையால் நீர்வரத்து கணிசமாக அதிகரித்து அணைகளின் நீர்மட்டமும் உயர்ந்து வருகிறது.

ஞாயிற்றுக்கிழமை காலை நிலவரப்படி பாபநாசம் அணையில் 45 மி.மீ மழையும், சேர்வலாறு அணையில் 53 மி.மீ மழையும், மணிமுத்தாறு அணையில் 43.6 மி.மீ மழையும், கடனாநதி அணையில் 10 மி.மீ மழையும், ராமநதி அணையில் 5 மி.மீ மழையும், நம்பியாறு அணையில் 8 மி.மீ மழையும், கொடுமுடியாறு அணையில் 5 மி.மீ மழையும் பதிவாகியுள்ளது.

அணைகளின் நீர்பிடிப்பு பகுதியில் நீடித்து வரும் மழையால் நீர்வரத்து தொடர்ந்து இருப்பதால் குறைந்த கொள்ளளவை கொண்ட கடனாநதி, ராமநதி, அடவிநயினார் அணைகளின் நீர்மட்டம் உயர்ந்து வருகிறது. கடந்த 2 வாரங்களில் கடனாநதி அணையின் நீர்மட்டம் 25 அடியும், ராமநதி அணையின் நீர்மட்டம் 10 அடியும் உயர்ந்துள்ளது.

தென்காசி, செங்கோட்டை, குற்றாலம் பகுதியில் நீடித்து வரும் மழையால் அடவிநயினார் அணைக்கு நீர்வரத்து அதிகரித்ததால், 6.25 அடி நீர்மட்டம் உயர்ந்து 17 அடியாகவும், கருப்பாநதி அணையின் நீர்மட்டம் 2.60 அடி உயர்ந்து 32.81 அடியாகவும் அதிகரித்துள்ளது.

பாபநாசம் அணைக்கு விநாடிக்கு 600 கனஅடியும், கடனாநதி அணைக்கு விநாடிக்கு 140 கனஅடியும், ராமநதி அணைக்கு விநாடிக்கு 25 கனஅடியும், கருப்பாநதி அணைக்கு விநாடிக்கு 38 கனஅடியும், அடவிநயினார் அணைக்கு விநாடிக்கு 27 கனஅடியும் நீர்வரத்து இருந்தது.

அணைகளின் நீர்மட்டம்: பாபநாசம் அணையின் நீர்மட்டம் அரை அடி உயர்ந்து 74.25 அடியாகவும், சேர்வலாறு அணையின் நீர்மட்டம் 87.33 அடியாகவும், மணிமுத்தாறு அணையின் நீர்மட்டம் 85.10 அடியாகவும், குண்டாறு அணையின் நீர்மட்டம் 15.40 அடியாகவும், வடக்குப் பச்சையாறு அணையின் நீர்மட்டம் 23 அடியாகவும், நம்பியாறு அணையின் நீர்மட்டம் 12.99 அடியாகவும், கொடுமுடியாறு அணையின் நீர்மட்டம் 2.50 அடியாகவும் இருந்தது.