தமிழக அரசு முத்திரைச் சின்னம்: மஹா சம்ப்ரோஷன விழா முன்னேற்பாடு கூட்டம்

தமிழக அரசின் முத்திரைச் சின்னமாக திகழும், விருதுநகர் மாவட்டம், ஸ்ரீவில்லிபுத்தூர் அருள்மிகு வடப்தர சயனர் திருக்கோவில் ராஜகோபுரம் மஹா சம்ப்ரோஷனம் மே மாதம் 22-ம் தேதி நடைபெறவுள்ளதையொட்டி மேற்கொள்ளப்பட வேண்டிய முன்னேற்பாடுகள் குறித்த ஆலோசனைக் கூட்டம் வியாழக்கிழமை ஸ்ரீவில்லிபுத்தூரில் மாவட்ட ஆட்சித் தலைவர் வே.ராஜாராமன் தலைமையில் நடைபெற்றது.

அருள்மிகு வடபத்ர சயனர் திருக்கோவில் ராஜகோபுரத்திற்கு 18.5.15 முதல் 21.5.15 வரை யாகசாலை பூஜைகள் நடைபெறுகிறது. 22-ம் தேதி (வெள்ளிக்கிழமை) மஹா சம்ப்ரோஷனம் நடைபெறுகிறது.இவ்விழாவை எவ்வித அசம்பாவிதங்கள், சட்டம் ஒழுங்கு பிரச்னைகள் ஏதும் இன்றி நடத்துவது குறித்தும், விழாவிற்கு வரும் முக்கிய பிரமுகர்களுக்கு பாதுகாப்பு அளிப்பது குறித்தும் ஆலோசனை நடத்தப்பட்டது. பக்தர்களை ஒழுங்குபடுத்துதல், காவல் கட்டுப்பாட்டு அறை, வெடிகுண்டு தடுப்புப் பிரிவு அமைப்பது, பொதுமக்கள் நெரிசல் மற்றும் வாகனங்கள் ஒரே இடத்தில் சேரவிடாமல் போக்குவரத்தை சீர்செய்வது தொடர்பான திட்ட அறிக்கை தயாரித்தல், பாதுகாக்கப்பட்ட குடிநீர் அளித்தல், நோய்த் தொற்று பரவாமல் தடுத்தல் உள்ளிட்டவை குறித்து சம்பந்தப்பட்ட அலுவலர்களுடன் ஆட்சித் தலைவர் ஆலோசனை நடத்தினார்.

ஆம்புலன்ஸ், விழா நடைபெறும் இடத்தில் மருத்துவக் குழு தயார் நிலையில் போதிய மருத்துவர்களுடன் இருத்தல், தீயணைப்புப் படையினரை நிறுத்துதல், வெளிமாநில மற்றும் வெளி நாட்டு பக்தர்களுக்கு கோவில் குறித்த தகவல்களைத் தெரிவிக்க தகவல் மையம் அமைத்தல், சிறப்பு பேருந்துகள் இயக்குதல் உள்ளிட்டவை குறித்தும் ஆட்சித் தலைவர் ஆலோசனை நடத்தினார்.

21 மற்றும் 22-ம் தேதி ஸ்ரீவில்லிபுத்தூர் நகர் பகுதியில் அனைத்து மதுபானக் கடைகளையும் மூடுவது, 22-ம் தேதி மாவட்டத்தில் உள்ளூர் விடுமுறை விடுவது என்றும் ஆட்சித் தலைவர் தலைமையில் நடைபெற்ற ஆலோசனைக் கூட்டத்தில் முடிவு செய்யப்பட்டது. கூட்டத்தில் தொகுதி சட்டப் பேரவை உறுப்பினர் வெ.பொன்னுப்பாண்டி, மாவட்ட வருவாய் அலுவலர் செ.முனுசாமி, சிவகாசி சார் ஆட்சியர் அமர்குஷ்வாஹா, கோவில் தக்கார் கே.ரவிச்சந்திரன் உள்ளிட்ட பல்வேறு அலுவலர்கள் கலந்து கொண்டனர்.