புதுச்சேரியில் பூக்கள் விலை கடும் உயர்வு

பூக்கள் வரத்து குறைந்ததால் புதுச்சேரியில் அவற்றின் விலை பல மடங்கு உயர்ந்து விற்பனை ஆனதால் பொதுமக்கள் அதிர்ச்சி அடைந்தனர்.

தீபாவளி பண்டிகை மற்றும் அதன் தொடர்ச்சியாக அமாவாசை நோன்பு, நிகழ்ச்சியை புதுவையில் மக்கள் விமரிசையாக கொண்டாடுவர். நேரு வீதியில் உள்ள பெரியமார்க்கெட், முதலியார்பேட்டை, முத்தியால்பேட்டை, அரியாங்குப்பம், பாகூர், வில்லியனூர், லாஸ்பேட்டை பகுதிகளில் உள்ள மார்க்கெட்டுகளில் மக்கள் தங்களுக்கு தேவையான பூக்களை வாங்குவது வழக்கமாகும்.

இந்நிலையில் புதுச்சேரியில் பூக்கள் உற்பத்தி இல்லாததால், பெங்களூர், கிருஷ்ணகிரி, ஊத்தங்கரை, திருவண்ணாமலை, சென்னை போன்ற பகுதிகளில் இருந்து வாகனங்கள்

மூலம் பூக்கள் கொண்டு வரப்படுகின்றன. இந்நிலையில் தீபாவளி மற்றும் அமாவாசை நோன்புக்காக பொதுமக்கள் அதிகளவில் பூக்களை வாஙகுவர்.

ஆனால் தொடர் மழையாலும், பூக்கள் வரத்து இல்லாததாலும், அவற்றின் விலை கடுமையாக உயர்ந்து விட்டது. பக்கத்து மாவட்டங்களான விழுப்புரம், கடலூரிலும் பலத்த மழை பெய்ததால் அங்கிருந்தும் புதுவைக்கு பூக்கள் வரவில்லை.

இதனால் பூக்களின் விலை பல மடங்கு உயர்ந்து விட்டது. பூக்களின் பழைய விலையும் தற்போது உயர்ந்துள்ள விலையும் கீழே றிப்பிட்டுள்ளவாறு அதிகரித்து விட்டன.

சாமந்தி ரூ.40-ரூ.300, மல்லி-ரூ.200-ரூ.600, முல்லை ரூ.160-ரூ.600, காட்டுமல்லி ரூ.200-ரூ.600, ரோஜா ரூ.80-ரூ.245, சம்பங்கி ரூ.60-ரூ.120, அரளி ரூ. 60-ரூ.150 என ஒரு கிலோவுக்கு பல மடங்கு உயர்ந்துள்ளன.

அமாவாசை நோன்புக்கு படைக்க வேண்டும் என்பதால் பொதுமக்கள் கடும் விலையிலும் பூக்களை வாங்கிச் செல்கின்றனர்.

இதுகுறித்து பெரியகடை மார்க்கெட் பூ வியாபாரிகள் சங்கத் தலைவர் பார்த்தசாரதி கூறியதாவது:

புதுவையில் பூக்கள் உற்பத்தி இல்லதால் வெளியூரில் இருந்து பூக்கள் வருகின்றன. தற்போது தொடர்ந்து 3 நாள்கள் மழையால் அங்கிருந்தும் பூக்கள் வரவில்லை. சிறிதளவே பூக்கள் வருகின்றன. பக்கத்து மாவட்டங்களில் இருந்தும் பூக்கள் வரத்து குறைந்து விட்டது. போதிய வரத்து இல்லாததால் விலையும் அதிகரித்து விட்டது என்றார்.