அமைப்புசாரா தொழிலாளர்களுக்கு ரூ.1000 தீபாவளிக் கூப்பன் விநியோகம்: அமைச்சர் ராஜவேலு வழங்கினார்

அமைப்புசாரா தொழிலாளர்களுக்கு ரூ.1000 தீபாவளி பரிசுக் கூப்பன்களை நலத்துறை அமைச்சர் பெ.ராஜவேலு வெள்ளிக்கிழமை வழங்கினார்.

புதுச்சேரி அமைப்புசாரா தொழிலாளர்கள் நலச்சங்கம் சார்பில் கடந்த 31.3.15 வரை பதிவு செயதுள்ள உறுப்பினர்கள் 25799 பேருக்கு ரூ.1000 தீபாவளி பரிசுக் கூப்பன் வழங்கப்படும் என அறிவிக்கப்பட்டது.

அதன்படி சங்க அலுவலகத்தில் வெள்ளிக்கிழமை நடந்த விழாவில் பரிசுக் கூப்பன்களை அமைச்சர் ராஜவேலு வழங்கினார். தொழிலாளர் அதிகாரி (நலம்) வி.சகுந்தலா மற்றும் அலுவலர்கள் உடனிருந்தனர்.

இப்பரிசுக்கூப்பன் வரும் நவம்பர் 8-ம் தேதி வரை (சனி, ஞாயிறு உள்பட) காலை 9.30 மணியில் இருந்து மாலை 5 மணிக்குள் அமைப்புசாரா தொழிலாளர் நலச்சங்க அலுவலகத்தில் வழங்கப்படும்.

மேற்கண்ட தேதிக்குள் பரிசுக்கூப்பன் பெறத் தவறியோர் 12.11.15 முதல் 31.1.16 வரை அனைத்து அலுவலக நாள்களிலும் சங்க அலுவலகத்தில் பெறலாம். தீபாவளி பரிசுக் கூப்பன் பெற வரும் உறுப்பினர்கள் கீழ்கண்ட ஆவணங்களை கொண்டு வர வேண்டும்.

சங்கத்தால் வழங்கப்பட்ட உறுப்பினர் அடையாள அட்டை, இறுதியாக செலுத்திய சந்தா ஆண்டு ரசீது, உறுப்பினர் ஆதார் அட்டை மற்றும் நகலை கொண்டு வந்து பெறலாம் எனத் தெரிவிக்கப்பட்டுள்ளது.