'ஐ லவ் யூ' கூறுவது பாலியல் குற்றம் ஆகாது: மும்பை உயர்நீதிமன்ற கிளை

மும்பை: 'ஐ லவ் யூ' எனக் கூறுவது பாலியல் குற்றம் ஆகாது என கருத்து தெரிவித்துள்ள மும்பை உயர்நீதிமன்ற நாக்பூர் கிளை, வாலிபருக்கு நாக்பூர் அமர்வு நீதிமன்றம் வழங்கிய மூன்று ஆண்டு சிறைத்தண்டனையையும் ரத்து செய்துள்ளது.

கடந்த 2015 ஆம் ஆண்டு அக்டோபர் 23 ஆம் தேதி மகாராஷ்டிரம் மாநிலம் நாக்பூரில் பள்ளி பேருந்தில் இருந்து இறங்கி வீடு திரும்பிக் கொண்டிருந்த 17 வயது சிறுமியை வழி மறித்து மோட்டார் சைக்கிளில் வந்த ஒரு வாலிபர் "நான் உன்னை நேசிக்கிறேன்" (ஐ லவ் யூ) கூறியுள்ளார்.

இதுகுறித்து சிறுமி தனது பெற்றோரிடம் தெரிவித்தார். இதனைத் தொடர்ந்து அவரது பெற்றோர் காவல் நிலையத்தில் புகார் அளித்தனர். புகாரைத் தொடர்ந்து வாலிபர் மீது இந்திய தண்டனைச் சட்டம் மற்றும் போக்சோ சட்டப்பிரிவுகளின் கீழ் வழக்குப்பதிவு செய்து கைது செய்தனர்.

இந்த வழக்கை விசாரித்த நாக்பூர் அமர்வு நீதிமன்றம், குற்றம் சாட்டப்பட்ட வாலிபருக்கு 3 ஆண்டுகள் சிறைத்தண்டனை விதித்து 2017 ஆம் ஆண்டு தீர்ப்பு வழங்கியது.

நாக்பூர் அமர்வு நீதிமன்றம் வழங்கிய தீர்ப்பை எதிர்த்து அந்த வாலிபர் தரப்பில் மும்பை உயர்நீதிமன்ற நாக்பூர் கிளையில் மேல்முறையீடு செய்யப்பட்டது.

வழக்கை விசாரித்த நீதிபதி ஊர்மிளா ஜோஷி பால்கே தலைமையிலான அமர்வு, வாலிபருக்கு கீழ் நீதிமன்றம் விதித்த மூன்றாண்டு சிறைத் தண்டனையை ரத்து செய்து தீர்ப்பளித்தது.

நீதிமன்றம் வழங்கிய தீர்ப்பில் கூறியிருப்பதாவது:

'ஐ லவ் யூ' என்ற வாலிபர் தனது உணர்வை வெளிப்படுத்தியதன் பின்னணியில் பாலியல் நோக்கம் இருப்பதற்கான எந்த சூழலும் இல்லை. தகாத முறையில் தொடுதல், வலுக்கட்டாயமாக ஆடைகளை கழற்றுதல், அநாகரிகமான சைகைகளை செய்தல் அல்லது பெண்களை அவமதிப்பது, ஆபாசமாக நடந்து கொள்வது போன்றவைகள்தான் பாலியல் குற்றங்களாகும்.

இந்த வழக்கில் பாலியல் நோக்கம் இருப்பதற்கான எந்தொரு ஆதாரமும் இல்லை. எனவே, 'ஐ லவ் யூ' என்று கூறுவது மானபங்கம் அல்லது பாலியல் வன்கொடுமையின் கீழ் வராது. "யாராவது ஒருவர் இன்னொருவரை நேசிப்பதாகச் சொன்னாலோ அல்லது தனது உணர்வுகளை வெளிப்படுத்தினாலோ அது ஒருவித பாலியல் நோக்கம் இருக்க வேண்டியதற்கான அவசியமில்லை."

மேலும், குற்றம் சாட்டப்பட்டவரின் மனநிலையை உறுதிப்படுத்த, பாதிக்கப்பட்டவருடன் பாலியல் தொடர்பை ஏற்படுத்துவதே குற்றம் சாட்டப்பட்டவரின் உண்மையான நோக்கம் என்பதைக் குறிக்கும் எந்த ஒரு சூழ்நிலையும் இல்லை.

"பாலியல் வன்கொடுமை என்பது நியாயமான சந்தேகத்திற்கு அப்பாற்பட்டது என்று நிரூபிக்கப்படவில்லை" என்றும், அதே நேரத்தில் விசாரணை நீதிமன்ற நீதிபதி போக்சோ சட்டத்தின் கீழ் கொடுக்கப்பட்ட "பாலியல் வன்கொடுமை" என்பதன் வரையறை மற்றும் தண்டனையை கருத்தில் கொள்ளவில்லை என்றும், சட்ட விதிகளின் உண்மையான அர்த்தத்தை கருத்தில் கொள்ளாமல், குற்றம் சாட்டப்பட்டவரை குற்றவாளி என்று தீர்ப்பளித்தது தவறானது. எனவே, சம்மந்தப்பட்ட வாலிபருக்கு கீழ் நீதிமன்றம் விதித்த சிறைத் தண்டனையை ரத்து செய்ததுடன் சிறுமியிடம் 'ஐ லவ் யூ' என்று கூறிய வாலிபரை உயர்நீதிமன்றம் விடுதலை செய்து செவ்வாய்க்கிழமை உத்தரவிட்டது.

Summary

"The sexual assault without penetration has not been proved by the prosecution beyond reasonable doubt," said the bench, while adding that the Judge of the trial court had not considered the definition and punishment of "sexual assault" given under the POCSO Act, and without considering the true import of the provision, convicted the accused, which is erroneous.