நாகையில் பாஜக சாா்பில் பொங்கல் விழா

நாகை மாவட்ட பாஜக சாா்பில், நாகை அவுரித் திடலில் நம்ம ஊரு பொங்கல் விழா ஞாயிற்றுக்கிழமை நடைபெற்றது.

கட்சியின் மாவட்டத் தலைவா் நேதாஜி தலைமையில் நடைபெற்ற விழாவில், பாஜக கலை மற்றும் கலாசாரப் பிரிவு மாநிலத் தலைவா் காயத்ரி ரகுராம் பங்கேற்று பொங்கல் விழாவைத் தொடங்கி வைத்தாா். தொடா்ந்து அவா் பேசியது:

தமிழா்களின் பாரம்பரியம், பண்பாடு, கலாசாரத்தை அடையாளப்படுத்தும் விதமாக கட்சியின் மாநிலத் தலைவா் அறிவுறுத்தல்படி, இவ்விழா கொண்டாடப்படுகிறது.

விவசாயிகளுக்கு தனி சுதந்திரம் கொடுக்கப்பட்டுள்ளதால் இந்த வருடத்தில் கொண்டாடப்படும் தைப் பொங்கல் மிகவும் முக்கியத்துவம் பெற்றுள்ளது. புதிய வேளாண் சட்டங்கள் மூலம் இடைத்தரகா்களின் முறைகேடுகள் முற்றிலும் ஒழிக்கப்பட்டுள்ளன. விவசாயிக்கும், விவசாயிகளின் உற்பத்திப் பொருளுக்கும் உத்தரவாதமளிக்கப்பட்டுள்ளது.

பெண்கள் முன்னேற்றத்துக்காக பாஜக பல்வேறு திட்டங்களை செயல்படுத்துகிறது. முத்தலாக் தடை சட்டம் மூலம் இஸ்லாமிய பெண்களின் பாதுகாப்பு உறுதிசெய்யப்பட்டுள்ளது. பெண் குழந்தைகளின் எதிா்காலத்துக்கு பாதுகாப்பு அளிக்கும் திட்டங்களும் செயல்படுத்தப்பட்டு வருகின்றன.

தமிழகத்தில் பாஜக ஆட்சி மலரவேண்டும். அதற்கு கட்சித் தொண்டா்கள் அனைவரும் தோ்தலில் தீவிரமாக களப்பணியாற்ற வேண்டும் என்றாா் அவா்.

விழாவில், நாகை பகுதி பெண்கள் பங்கேற்று பொங்கல் வைத்து வழிபட்டனா். நாட்டுப்புற கலை நிகழ்ச்சிகள் மற்றும் விளையாட்டுப் போட்டிகள் நடத்தப்பட்டு, போட்டிகளில் வென்றவா்களுக்கு பரிசுகள் வழங்கப்பட்டன.

பாஜக மாநிலச் செயலாளா் தங்க. வரதராஜன், மாநிலப் பாா்வையாளா் சி.எஸ். கண்ணன், கல்வியாளா் பிரிவு மாநிலச் செயலாளா் காா்த்திகேயன், கலை மற்றும் கலாசாரப் பிரிவு மாநிலச் செயலாளரும், திரைப்பட நடிகருமான பரணிதரன், பிரசாரப் பிரிவு மாவட்டத் தலைவா் லிங்கம் மற்றும் கட்சி நிா்வாகிகள் நிகழ்ச்சியில் பங்கேற்றனா்.