தமிழக மீனவா்கள் விவகாரத்தில் மத்திய அரசு பாரபட்சம் காட்டுவது ஏன்?

புது தில்லி, ஆக.8:

தமிழக மீனவா்கள் விவகாரத்தில் மத்திய அரசு பாரபட்சம் காட்டுவது ஏன்? என்று தில்லியில் வியாழக்கிழமை நடைபெற்ற ஆா்ப்பாட்டத்தில் பங்கேற்ற தமிழக காங்கிரஸ் கமிட்டித் தலைவா் கு. செல்வப்பெருந்தகை கேள்வி எழுப்பினாா்.

‘பிரதமா் நரேந்திர மோடி தலைமையிலான தேசிய ஜனநாயகக் கூட்டணி அரசு, நாடு முழுவதும் உள்ள மீனவா்களின் போராட்டங்களை தொடா்ந்து புறக்கணித்து வருகிறது.

தமிழகம் மற்றும் புதுச்சேரியை சோ்ந்த மீனவா்கள், இலங்கை கடற்படையினரால் தொடா்ந்து கைது செய்யப்பட்டு கடும் இன்னல்களை சந்தித்து வருகின்றனா்’ என்று கூறி, மத்திய அரசின் மீனவா் விரோதக் கொள்கைகளைக் கண்டித்து அகில இந்திய மீனவா் காங்கிரஸ் சாா்பில் தில்லி ஐந்தா் மந்தரில் மாபெரும் ஆா்ப்பாட்டம் நடத்தப்படும் எனஅறிவிக்கப்பட்டிருந்தது.

அதன்படி ஜந்தா் மந்தரில் வியாழக்கிழமை ஆா்ப்பாட்டம் நடைபெற்றது.

இந்த ஆா்ப்பாட்டத்திற்குத் தலைமை வகித்து தமிழக காங்கிரஸ் கமிட்டித் தலைவா் கு. செல்வப்பெருந்தகை பேசியதாவது:

பாஜக ஆட்சிக்கு வருவதற்கு முன்பு இருந்த 10 ஆண்டுகால காங்கிரஸ் ஆட்சி அனைத்து மக்களுக்குமான ஆட்சியாக இருந்தது. பாஜக ஆட்சிக்கு வருவதற்கு முன்பு ராமேஸ்வரத்தில் முன்னாள் அமைச்சா் சுஷ்மா ஸ்வராஜ் தலைமையில் ‘கடல் தாமரை’ மாநாடு நடைபெற்றது. அதில் பேசிய அவா், பாஜக ஆட்சிக்கு வந்தால் மீனவா்கள் படகுகள் பறிமுதல் இருக்காது, மீனவா் கைதை தடுப்போம், உயிா் பலி ஏற்படாது, கடல் சா்வதேச எல்லையில் இலங்கைக்கு எதிராக இந்தியாவின் கடற்படை நிறுத்தப்படும்

என்றெல்லாம் வாக்குறுதி அளித்திருந்தாா்.

அதன்பிறகு 2014-இல் மத்தியில் ஆட்சி மாற்றம் ஏற்பட்டது. மோடி தலைமையில் பாஜக ஆட்சிக்கு வந்தபிறகு இலங்கை கடற்படையினரும், இலங்கை மீனவா்களும் தொடா்ந்து இந்திய மீனவா்களைத் தாக்கும் வேலையில் ஈடுபட்டனா். குறிப்பாக தமிழ்நாட்டு மீனவா்களைக் கொடுமையாகத் தாக்கினா். படகுகள் பறிமுதல் செய்யப்பட்டன.

மீனவா்கள் உயிா் பலி போனது. ஆனால், கடல் தாமரை மாநாட்டில் பாஜக அளித்த வாக்குறுதிகள் ஏதும் நிறைவேற்றப்படவில்லை.

பாஜகவினா் வேடிக்கைதான் பாா்த்தனா். இன்றைக்கு 178 படகுகள் இலங்கையில் பிடித்துவைக்கப்பட்டுள்ளது. 100-க்கும் மேற்பட்ட மீனவா்கள் சிறையில் அடைக்கப்பட்டுள்ளனா். ஆனால், குஜராத் மீனவா்களுக்கு ஒரு நியாயம். தமிழ்நாடு மீனவா்களுக்கு ஒரு நியாயம்.

குஜராத் மீனவா்களைக் கைது செய்தால், படகுகளைப் பறிமுதல் செய்தால் உடனே ஒன்றிய அரசு குரல் கொடுக்கிறது. ஆனால், தமிழக மீனவா்களின் படகுகளை பறிமுதல் செய்யும்போது, அவா்களைக் கைது செய்யும்போது ஏன் மத்திய அரசு வாய் திறக்க மறுக்கிறது. பாரபட்சமாக செயல்படும் மத்திய அரசு அனைத்து மீனவா்களுக்கும் பாதுகாப்பு அளிக்க வேண்டும்’ என்றாா் அவா்.

அகில இந்திய மீனவா் காங்கிரஸ் தேசியத் தலைவா் ஆா்ம்ஸ்ட்ராங் பொ்னாண்டோ பேசுகையில், ‘இலங்கை அரசால் சிறைபிடிக்கப்பட்ட 178 படகுகளையும், 93 மீனவா்களையும் விடுவிக்கக்கக் கோரி அனைத்து மீனவா்கள் சங்கங்களையும் திரட்டி இந்த ஆா்ப்பாட்டத்தை நடத்திக் கொண்டிருக்கிறோம்.

காங்கிரஸ் மத்தியில் ஆட்சியில் 2014-ஆம் ஆண்டு இருக்கும் வரை இலங்கையில் பிடிபட்ட படகுகளை, கைதான மீனவா்களை விடுவிக்க நடவடிக்கை எடுத்தது. ஆனால், மோடி அரசு ஆட்சிக்கு வந்தபிறகு நூற்றக்கணக்கான படகுகளும் பிடிபட்டுள்ளன. மீனவா்களும் கைது செய்யப்பட்டுள்ளனா். அவா்கள் உடனடியாக விடுவிக்கப்படுவதில்லை.

2014-ஆம் ஆண்டில் இருந்து ஒரு படகுகூட இன்னும் விடுவிக்கப்படவில்லை. தற்போதுள்ள 93 மீனவா்களுக்கு வரலாற்றில் இல்லாத வகையில் இலங்கை அரசு சிறைத் தண்டனை அளித்துள்ளது. மத்திய அரசு கண்டனம் கூட தெரிவிக்கவில்லை. மீனவா்கள் மீது மத்திய அரசு பாகுபாடு காட்டி வருகிறது என்றாா் அவா்.

இந்த ஆா்ப்பாட்டத்தில் காங்கிரஸ் எம்பிகள் விஜய் வசந்த் (கன்னியாகுமரி), செ. ராபா்ட் புரூஸ் (திருநெல்வேலி), ஆா்.சுதா (மயிலாடுதுறை), காங்கிரஸ் எம்எல்ஏக்கள் ஜெ.ஜெ. பிரின்ஸ் (குளச்சல்), தாரகை கத்பட் (விளவங்கோடு), தமிழ்நாடு சட்டப் பேரவை காங்கிரஸ் கட்சியின் தலைவா் ராஜேஷ்குமாா் உள்பட பல்வேறு மீனவா் சமுதாய சங்கங்களைச் சோ்ந்த பிரதிநிதிகள் பலா் கலந்துகொண்டனா்.

ராகுல் காந்தியுடன் சந்திப்பு

இந்த ஆா்ப்பாட்டத்திற்குப் பிறகு ஆா்ம்ஸ்ட்ராங் பொ்னாண்டோ தலைமையில் மீனவா்கள் சங்கப் பிரதிநிதிகள் 14 போ் காங்கிரஸ் மூத்தத் தலைவரும், மக்களவை எதிா்க்கட்சித் தலைவருமான

ராகுல் காந்தியை சந்திக்க நாடாளுமன்றத்திற்கு மாலை சென்றனா்.

நாடாளுமன்ற வரவேற்பறையில் அவா்களை சந்தித்த ராகுல் காந்தி, மீனவா்களின் பிரச்னைகள் குறித்து கேட்டறிந்தாா்.

இதுகுறித்து ஆா்ம்ஸ்ட்ராங் பொ்னாண்டோ கூறுகையில், ‘தமிழக மீனவா்கள் சந்தித்து வரும் பிரச்னைகள் குறித்து மீனவா் சங்கங்களின் பிரதிநிதிகள் காங்கிரஸ் மூத்தத் தலைவா் ராகுல் காந்தியிடம் எடுத்துரைத்தனா். அப்போது, நாடாளுமன்றத்தில் இந்த விவகாரம் குறித்து பேசப்படும் என ராகுல் காந்தி உறுதியளித்தாா்’ என்றாா் அவா்.