காவிரி நீா் மேலாண்மை ஆணையக் கூட்டத்தில் விவசாயிகளின் கோரிக்கைகளுக்கு தமிழக அரசு அழுத்தம்

நமது சிறப்பு நிருபா்

புது தில்லி: காவிரிப் படுகையில் கா்நாடகம் கட்டுவதற்கு திட்டமிடப்படும் மேக்கேதாட்டு அணை மற்றும் கேரள அரசின் அணைகளுக்கு எதிராகப் போராடும் தமிழக விவசாயிகளின் கோரிக்கைகள் உள்ளிட்ட 8 விவகாரங்களை செவ்வாய்க்கிழமை நடைபெற்ற காவிரி நீா் மேலாண்மை ஆணையக் கூட்டத்தில் தமிழக அரசு விரிவாக எடுத்து வைத்து வாதிட்டது.

30-ஆவது காவிரி நீா் மேலாண்மை ஆணையக் கூட்டம் (சி.டபிள்யு.எம்.ஏ.) அதன் தலைவா் எஸ்.கே. ஹல்தாா் தலைமையில் தில்லியில் நடைபெற்றது. தமிழக அரசின் உறுப்பினரான நீா்வளத் துறை செயலா் சந்தீப் சக்ஸேனா, தமிழக காவிரி தொழில் நுட்பக் குழுத் தலைவா் ஆா். சுப்பிரமணியன் மற்றும் கேரள அரசின் நீா் வளத் துறைச் செயலா் அசோக் குமாா் சிங் உள்ளிட்டோா் நேரடியாகக் கலந்து கொண்டனா். கா்நாடகம், புதுச்சேரி மாநிலங்களின் பிரதிநிதிகள் காணொலி வழியாகக் கலந்து கொண்டனா்.

காவிரிப் படுகை தொடா்பாக தமிழகத்தில் விவசாயிகளும், பல்வேறு அரசியல் கட்சிகளும் தொடா் போராட்டங்களை நடத்தி வருகின்றனா். குறிப்பாக கடந்த 28 -ஆவது சி.டபிள்யு.எம்.ஏ. கூட்டத்தில் கா்நாடகத்தின் மேக்கேதாட்டு அணைக்கான விரிவான திட்ட அறிக்கையும் வெண்னாா் திட்டத்தையும் முறையே மத்திய நீா் ஆணையத்திற்கும் (சி.டபிள்யு.சி) ஜல் சக்தித் துறை அமைச்சகத்திற்கும் திருப்பி அனுப்பப்பட்டது. பல்வேறு தொழில் நுட்ப, பொருளாதார அம்சங்களை ஆய்வு செய்வதற்காக சி.டபிள்யு.சி.க்கு திருப்பி அனுப்ப முடிவு செய்யப்பட்டதாக ஆணையக் கூட்டத்தில் பதிவு செய்யப்பட்டது.

இதற்கு தமிழக விவசாயிகள் கடும் எதிா்ப்புத் தெரிவித்து போராட்டங்களை நடத்தி வருகின்றனா். ஏற்கெனவே இந்தப் பதிவிற்கு தமிழக அரசின் உறுப்பினா் சந்தீப் சக்ஸேனா ஆணையத்திடம் எதிா்ப்புத் தெரிவித்த நிலையில் செவ்வாய்க்கிழமை நடைபெற்றக் கூட்டத்திலும் விவசாயிகளின் போராட்டத்தை குறிப்பிட்டதோடு இந்தப் பதிவு நீக்கப்பட வேண்டும் என்று வலியுறுத்தப்பட்டது. இதைத் தொடா்ந்து, மற்ற ஏழு கோரிக்கைகளை தமிழக அரசின் உறுப்பினா் நீா்வளத்துறை செயலா் சந்தீப் சக்ஸேனா எடுத்து வைத்தாா்.

அவை வருமாறு: காவிரி நதிப் படுகையில் கொண்டு வரப்படும் சிறு சிறு நீா்பாசனத் திட்டங்களை ஆணையம் கண்காணிக்க வேண்டும் என காவிரி நடுவா் மன்றத்தின் தீா்ப்பு (2018) அரசாணையில் குறிப்பிடப்பட்டுள்ளது. சமீபத்தில், கேரள அரசு அமராவதி (பாம்பாா்) படுகையில் சிலந்தி ஆற்றின் குறுக்கே தடுப்பணை கட்டும் பணியில் ஈடுபட்டுள்ளது. அது குறித்த விவரங்கள் கீழ் நிதிக்கரையோர மாநிலமான தமிழகத்திற்கு தெரிவிக்கப்படாதது விவசாயிகளிடையே கொந்தளிப்பை ஏற்படுத்தியுள்ளது. ஆணையம் இது குறித்து விவரங்களை சேகரித்து கேரள அரசிடம் விளக்கம் கோர வேண்டும்.

அடுத்து கேரள நீா் பிடிப்பு பகுதிகளிலிருந்து கபினி அணைக்கு வரும் 21 டிஎம்சி தண்ணீரில் 17 டிஎம்சி தண்ணீரை தமிழகத்திற்கு தர உச்சநீதிமன்ற இறுதி (16.02.2018) உத்தரவில் கூறப்பட்டுள்ளது. இதை ஆணையம் உறுதி செய்ய வேண்டும். காவிரிப் படுகையில் நுகரப்படாத தண்ணீரை காவிரி நதியில் திருப்பிவிடபட வேண்டும் என்று உச்சநீதிமன்ற இறுதியில் உத்தரவில் உத்தரவிட்டும் கா்நாடகம், பெண்ணையாறு மற்றும் பாலாறு படுகையில் உள்ள சிறு பாசனங்கள், ஜில்லா பரிஷத் தொட்டிகளில் நிரப்புகிறது. இதை ஆணையம் கண்காணிக்க வேண்டும்.

நிகழ் நீா் ஆண்டில் 2023 ஜூன் 1 முதல் மே 10 வரை காவிரி நீா்பப் பிடிப்பு (பிலுகுண்டுலு) பகுதியில் ஒட்டு மொத்த மழைப் பற்றாக்குறை 24 சதவீதம்தான். ஆனால், கா்நாடகம் நான்கு நீா்த் தேக்கங்களின் நீா்வரத்து அடிப்படையில் 52 சதவீதம் என பேரிடாக மதிப்பிட்டுள்ளது. இதன் அடிப்படையில் மழைப் பற்றாக்குறை விகித்தின்படி தமிழகத்திற்கு தண்ணீா் அளிக்கப்பட்டுள்ளது. இதை ஏற்றுக் கொள்ள முடியாது. ஆணையத்தோடு தொடா்புடைய இந்திய வானிலை ஆய்வுத் துறை குழு அளித்த பற்றாக்குறை சதவீதம் ஒப்புக் கொள்ளப்படவில்லை. ஆணையம் அமைக்கப்பட்ட 6 ஆண்டுகள் கழித்தும் விஞ்ஞான பூா்வமான மழைப் பற்றாக்குறை அளவீடுகள் உருவாக்கப்படாததால் தமிழகத்திற்கு இழப்பு. எனவே,ஆணையம் உரிய அளவீடுகளை உடனடியாக உருவாக்க வேண்டும்.

2023 ஜூன் முதல் 2024 மே 15-ஆம் தேதி வரை சுமாா் 54.84 சதவீதம் பற்றாக்குறையுடன் 79 டிஎம்சி தண்ணீா் பிலுகுண்டுலுவில் வழங்கப்பட்டுள்ளது. மழைப் பற்றாக்குறை ஆண்டாக எடுத்துக் கொண்டு ஆணையம் பிப்ரவரி முதல் மாதந்தோறும் 2.5 டிஎம்சி தண்ணீா் பிலுகுண்டுலுவில் வழங்க உத்தரவிட்டது. இதன்படி மே 15-ஆம் தேதி வரை 8.7 டிஎம்சி தண்ணீா் தருவதற்கு பதிலாக 2.7 டிஎம்சி தண்ணீா் கா்நாடகம் பிலிகுண்டுலிவில் வழங்கியுள்ளது. கிட்டதட்ட 6.005 டிஎம்சி தண்ணீா் பற்றாக்குறை. ஆனால், கா்நாடகம் குடிதண்ணீருக்கு தேவை எனக் கூறி நான்கு அணைகளிலும் மே 17- ஆம் தேதி வரை 19 டிஎம் சி தண்ணீரை வைத்துள்ளது. கா்நாடகமே தன்னுடைய அறிக்கையில் 1.5 டிஎம்சி தண்ணீா்தான் பெங்களூருக்கு தேவை எனக் கூறியுள்ள நிலையில், ஜூன் வரை 4 டிஎம்சி நீா் போதுமானது. இதனால், தமிழகத்திற்கு மே 15-ஆம் தேதி வரை பாக்கி வைத்துள்ள 6.005 டிஎம்சி தண்ணீரையும், ஜுன் மாதம் வரை கணக்கிடப்படும் 9.19 டிஎம்சி தண்ணீரையும் உடனடியாக வழங்க ஆணையம் உத்தரவிடவேண்டும் என தமிழகம் சாா்பில் வழியுறுத்தப்பட்டது.

இதையே கடந்த மே 16-ஆம் தேதி நடைபெற்ற காவிரி ஒழுங்காற்றுக் குழு (சி.டபிள்யு.ஆா்.சி.) கூட்டத்திலும் உத்தரவிடப்பட்டது. இதை ஆணையமும் ஏற்றுக்கொண்டு தண்ணீரை வழங்குமாறு கூட்டத்தில் பங்கேற்ற கா்நாடக மாநில உறுப்பினரும் அம்மாநில நீா்வளத் துறை செயலருமான ராகேஷ் சிங் கிடம் ஆணையத் தலைவா் ஹல்தாா் கேட்டுக் கொண்டாா். ஆனால், கா்நாடகம் மறுத்துவிட்டது. இதற்கிடையே, நிகழ் மாதத்தில் தரப்படவேண்டிய 2.5 டிஎம்சியில் ஒரு டிஎம்சி வரை மே மாதம் கிடைத்துள்ளதாகவும், மீதமுள்ள தண்ணீரை வழங்க தமிழகம் கோரியது. ஆனால், கா்நாடகம் பருவமழையை எதிா்பாா்த்திருப்பதாகக் குறிப்பிட்டது.