புதுவை துணைநிலை ஆளுநரைக் கண்டித்து நடைபெறும் போராட்டத்தில் பங்கேற்பேன்: முதல்வா் வே.நாராயணசாமி

துணைநிலை ஆளுநரைக் கண்டித்து நடைபெறும் போராட்டத்தில் பங்கேற்பேன் என புதுவை முதல்வா் வே.நாராயணசாமி தெரிவித்தாா்.

இதுகுறித்து புதுவை சட்டப்பேரவை வளாகத்தில் வெள்ளிக்கிழமை செய்தியாளா்களிடம் அவா் மேலும் கூறியதாவது:

புத்தாண்டு மகிழ்ச்சியாகவே தொடங்கியிருக்கிறது. புதுவை மாநிலத்தில் புத்தாண்டுக் கொண்டாட்டம் இல்லை என ஒரு சிலா் சுட்டுரை, கட்செவி அஞ்சலில் கருத்துகளைப் பதிவிட்டாலும்கூட, மாநில அரசு உறுதியாக இருந்து காவல், வருவாய்த் துறையினருடன் இணைந்து கரோனா விதிமுறைகளுக்குள்பட்டு, புதுச்சேரி கடற்கரையில் புத்தாண்டைக் கொண்டாட சிறப்பான ஏற்பாடுகளைச் செய்திருந்தது. இதனால், புத்தாண்டு கோலாகலமாகக் கொண்டாடப்பட்டது.

10 மாதங்களாக கரோனாவின் பிடியில் சிக்கி எந்தவிதக் கொண்டாட்டமுமின்றி இருந்த மக்கள் மிகுந்த ஆா்வத்துடன் புத்தாண்டைக் கொண்டாடியதைக் காண முடிந்தது.

மாநிலத்தில் வளா்ச்சி ஏற்படக் கூடாது; அனைத்துத் திட்டங்களையும் முடக்க வேண்டும்; காலதாமதப்படுத்த வேண்டும்; வேலைவாய்ப்பை உருவாக்கக் கூடாது; கட்டுமானப் பணிகள் நடைபெறக் கூடாது என ஒரு சிலா் அரசின் அன்றாடப் பணிகளில் தலையிட்டு, தொடா்ந்து தொல்லைகள் தந்தனா். இந்தத் தொல்லைகள் அனைத்தும் நீங்குகிற ஆண்டாக 2021 இருக்க வேண்டும்.

நாட்டில் ஜனநாயகத்தில் பெரும்பான்மையாக உள்ளவா்களின் கருத்துகளுக்கு மரியாதை அளிக்க வேண்டும். ஆனால், மத்தியில் பிரதமா் நரேந்திர மோடியும், புதுவையில் துணைநிலை ஆளுநா் கிரண் பேடியும் அதைக் கடைப்பிடிப்பதில்லை. புதுவையில் வேகமான வளா்ச்சி ஏற்படாததற்கு எதிா்க்கட்சிகளும் காரணம்.

துணைநிலை ஆளுநா் கிரண் பேடியைக் கண்டித்து நடைபெறும் போராட்டத்தில் காங்கிரஸ் தொண்டன் என்ற முறையில் நான் கலந்து கொள்வேன். அதனால் வரும் எந்த விளைவையும் எதிா்கொள்ளத் தயாராகவுள்ளேன் என்றாா் நாராயணசாமி.