திருமலை திருப்பதி: தெலங்கானாவைச் சேர்ந்த அறங்காவலர் குழு உறுப்பினரின் பதவி ரத்து

தேவஸ்தான அறங்காவலர் குழுவில் இடம்பெற்றிருந்த தெலங்கானா மாநிலத்தைச் சேர்ந்த எம்எல்ஏ-வின் உறுப்பினர் பதவியை தேவஸ்தானம் ரத்து செய்தது.
திருமலை திருப்பதி தேவஸ்தான அறங்காவலர் குழுவில் தமிழ்நாடு, ஆந்திரம், கர்நாடகம், தெலங்கானா மற்றும் வட இந்தியாவைச் சேர்ந்த சில எம்எல்ஏ-க்கள் உறுப்பினர்களாக செயல்பட்டு வருகின்றனர். மேற்கண்ட மாநிலங்களில் இருந்து வரும் பக்தர்களுக்கு திருமலையில் ஏற்படும் இன்னல்களைத் தீர்க்க ஆந்திர அரசு இந்த ஏற்பாட்டைச் செய்துள்ளது. 
இந்நிலையில், தெலங்கானா சட்டப் பேரவையைக் கலைக்குமாறு அம்மாநில முதல்வர் கே.சந்திரசேகரராவ், ஆளுநரிடம் வியாழக்கிழமை கோரிக்கை விடுத்தார். இதனால், திருமலை திருப்பதி தேவஸ்தான அறங்காவலர் குழுவில் தெலங்கானா சார்பில் உறுப்பினராகத் தேர்ந்தெடுக்கப்பட்ட வெங்கடவீரய்யாவின் பதவியை தேவஸ்தானம் ரத்து செய்துள்ளது. 
முன்னதாக, கடந்த 2003ஆம் ஆண்டு ஆந்திரத்தில் ஆட்சியில் இருந்த தெலுங்கு தேசம் கட்சி சட்டப் பேரவையைக் கலைக்க முடிவெடுத்தபோது தேவஸ்தான அறங்காவலர் குழுவின் தலைவராகச் செயல்பட்டு வந்த சலபதி ராவின் பதவி ரத்து செய்யப்பட்டது குறிப்பிடத்தக்கது.