ஜிரி வெஸ்லிக்கு பதிலடி கொடுத்தார் யுகி பாம்ப்ரி:இறுதிச் சுற்றுக்கு முன்னேற்றம்

டேவிஸ் கோப்பை டென்னிஸ் போட்டியில் தன்னை தோற்கடித்த செக் குடியரசின் ஜிரி வெஸ்லிக்கு இந்திய வீரர் யுகி பாம்ப்ரி, ஏடிபி போட்டியில் பதிலடி கொடுத்து இறுதிச் சுற்றுக்கு முன்னேறினார்.

ஏடிபி சேலஞ்சர் டென்னிஸ் போட்டி தைவானில் நடைபெற்று வருகிறது. சனிக்கிழமை நடந்த ஆடவர் ஒற்றையர் அரையிறுதிச் சுற்றில் யுகி பாம்ப்ரி - ஜிரி வெஸ்லி மோதினர்.

ஒரு மணி நேரம் 23 நிமிடங்கள் நடந்த இந்தப் போட்டியின் முடிவில், 7-6 (2), 6-0 என்ற செட் கணக்குகளில் யுகி பாம்ப்ரி வெற்றி பெற்று இறுதிச் சுற்றுக்கு முன்னேறினார். இந்த வெற்றியின் மூலம் கடந்த 20ஆம் தேதி தில்லியில் நடந்த டேவிஸ் கோப்பை டென்னிஸ் போட்டியின் உலக குரூப் "பிளே ஆஃப்' சுற்றின் 4-ஆவது ஆட்டத்தில் வெஸ்லியிடம் அடைந்த தோல்விக்கு பதிலடி கொடுத்தார் பாம்ப்ரி.

யுகி தனது இறுதிச் சுற்றில், போட்டித் தரவரிசையில் 2-ஆவது இடத்திலுள்ள தென் கொரியாவின் ஹியான் சுங்கை எதிர்கொள்கிறார். இப்போட்டியில் வெற்றி பெறும் பட்சத்தில் அவருக்கு ரூ.83 லட்சம் பரிசாக கிடைக்கும். மேலும், தரவரிசையில் அவர் 100 இடங்களுக்குள் முன்னேற வழிவகுக்கும்.

சோம்தேவ் ஜோடி தோல்வி: ஆடவர் இரட்டையர் பிரிவு அரையிறுதியில் இந்தியாவின் சோம்தேவ் தேவ்வர்மன் - ஜீவன் நெடுஞ்செழியன் ஜோடி, உள்ளூர் ஜோடியான செங் பெங் சீ - சுங் ஹா யங்கிடம் 2-6, 3-6 என்ற செட் கணக்குகளில் தோல்வியைத் தழுவியது.